ខេត្តបន្ទាយមានជ័យ៖ កុមារដែលមានអាយុទើបតែជាង ១០ឆ្នាំចំនួន៣នាក់ មានប្រុស-ស្រី ដែលជាសិស្សសាលាវិទ្យាល័យអូរអំបិល ត្រូវបានជនឧក្រិដ្ឋមានគ្នីគ្នាចំនួន ៧នាក់ ពាក់ម៉ាស់ពណ៌ខ្មៅ បានជិះរថយន្តតួរីសពណ៌ស ចុះចាប់ក្មេងទាំង៣នាក់ ព្រមទាំងកង់ដាក់ចូលរថយន្តនៅមុខ
សាលាអូរអំបិល ដើម្បីយកទៅលក់នៅប្រទេសថៃ តែសំណាងអាក្រក់ត្រូវបានតម្រួតថៃ ជួយក្មេងទាំង៣នាក់ ចំណែកជនឧក្រិដ្ឋទាំងអស់គេចខ្លួនបាត់តែម្ដង។
ហេតុការណ៍ជនឧក្រិដ្ឋចាប់ពង្រត់ក្មេងយកទៅលក់នៅថៃនេះ បានកើតឡើងនៅវេលាម៉ោង៧ព្រឹក ថ្ងៃទី២៧ ខែឧសភា ឆ្នាំ២០១៤ នៅចំណុចច មុខសាលាអូរអំបិល ភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។
លោកឧត្តមសេនីយ៍ត្រី ឱ បូរិន មេបញ្ជាការកងរាជអាវុធហត្ថខេត្តបន្ទាយមានជ័យ បានឲ្យដឹងថា៖ កុមារងគ្រោះដែលត្រូវជនឧក្រិដ្ឋចាប់យកទៅលក់នៅប្រទេសថៃ ទី១៖ឈ្មោះ សុខ វិសាល ប្រុសអាយុ១២ឆ្នាំ ទី២៖ឈ្មោះ សុខ ពិសី អាយុ៦ឆ្នាំ ជាបងប្អូនបង្កើត មានឪពុកឈ្មោះ សុខ កុសល អាយុ៣៣ឆ្នាំ ជាកម្មករ និងម្ដាយឈ្មោះ គីម ចេងលី អាយុ២២ឆ្នាំ ចំណែកម្នាក់ទៀតឈ្មោះ ចាន់ រតនា ភេទប្រុសអាយុ៦ឆ្នាំ ជាបងប្អូនជីដូនមួយនឹងសិស្សពីរនាក់ខាងលើ។
លោក ឱ បូរិន បានបន្តថា៖ មុនពេលកើតហេតុ កុមារឈ្មោះ សុខ វិសាល បានឌុបប្អូនទាំង២នាក់ទៅសាលារៀន លុះជិះមកដល់មុខសាលារៀន ស្រាប់តែមានរថយន្តតូរីស១គ្រឿងបានជិះយ៉ាងលឿនហើយមកឈប់នៅកន្លែងក្មេងទាំង៣ ពេលនោះមានជនឧក្រិដ្ឋចំនួន៣នាក់ បានចុះមកពីលើរថយន្តហើយក៏ចាប់កុមារទាំង៣រុញចូលឡានហើយយកទាំងកង់ដាក់ចូលឡានទៀត ជិះចេញពីមុខសាលារៀនយ៉ាងប្រញាប់ប្រញាល់ គេពុំដឹងថា ជនឧក្រិដ្ឋនោះជិះទៅខាងណា ។
បើតាមការអះអាងរបស់កុមាររងគ្រោះបាននិយាយថា៖ ក្នុងរថយន្តនោះមានមនុស្សប្រុសស្រីចំនួន៧នាក់ ដែលពាក់សុទ្ធតែម៉ាស់ពណ៌ខ្មៅទាំងអស់ ហើយបានធ្វើការគម្រាមក្មេងរងគ្រោះទាំង៣ថា កុំឲ្យស្រែកឲ្យសោះ ។
នៅវេលាម៉ោងម៉ោង១០និង៣០នាទីព្រឹក ជនឧក្រិដ្ឋចំនួនទាំង៧នោះ បានក្មេងទាំង៣នាក់ ដើរសំដៅចូលទៅក្នុងទឹកដីថៃក្នុងផ្សាររោងក្លឿ ហើយឧក្រិដ្ឋជនចំនួន៧នាក់នោះ នាំគ្នាឃ្លាំមើលពីក្រោយព្រោះខ្លាចតម្រួតថៃចាប់បាន។ លុះក្មេងជនរងគ្រោះបានចូលទៅដល់ទឹកដីថៃ ស្រាបតែអាជ្ញាធរថៃបានសង្ស័យក្មេងទាំង៣ ហើយឃាត់ធ្វើការសាកសួរ ពេលនោះជនឧក្រិដ្ឋឃើញគេកាក់ក្មេងទាំង៣នោះ ក៏បានគេចខ្លួនបាត់តែម្ដង។ ចំណែកម្ដាយ និងជីដូន នៅផ្ទះ ពេលបាត់ចៅនិ ងកូនយូរពេក ក៏ទូរស័ព្ទទៅលោកគ្រូបង្រៀននៅសាលាអូរអំបិល តែលោកគ្រូបានឆ្លើយតបវិញថា ចៅ និងកូនរបស់គាត់មិនបានឃើញមករៀន ភ្លាមនោះ ម្ដាយ និងជីដូនបាននាំគ្នាផ្អើលឆោឡោ ហើយគាត់ពុំអាចសន្មត់ថា ចៅ និងកូនគាត់ទាំង៣ មិនអាចលង់ទឹកស្លាប់ឡើយ មានតែគេចាប់យកទៅលក់ ពេលនោះទាំងជីដូនទាំងម្ដាយ បានរត់ទៅប្ដឹងអាវុធហត្ថខេត្តបន្ទាយមានជ័យ។
ក្រោយពេលបានទទួលព័ត៌មាន លោក ឱ បូរិន ក៏បានចាប់កម្លាំងតាមដាន និងបញ្ជាឲ្យលោក វរសេនីយ៍ឯក ម៉ែន ភារម្យ មេបញ្ជាការរងកងរាជអាវុធហត្ថខេត្តបន្ទាយមានជ័យ ចុះធ្វើការទំនាក់ទំនង ជាមួយអាជ្ញាធរថៃប្រចាំផ្សាររោងក្លឿ ក៏ទទួលបានរាយការណ៍ថា មានក្មេង៣នាក់ត្រូវជនឧក្រិដ្ឋចាប់យកទៅលក់នៅប្រទេសថៃ៕
