ភ្នំពេញ៖ ក្រោយពីគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ បានកោះអញ្ជើញលោក ឡុង ហុកម៉េង ព្រះរាជអាជ្ញាអមសាលាដំបូងខេត្តមណ្ឌលគិរី មកបំភ្លឺ និងតទល់គ្នាជាមួយមន្ត្រីយោធាមួយចំនួននៃខេត្តមណ្ឌគិរី ពាក់ព័ន្ធករណីទទួលសំណូកក្នុងមួយខែ ២ម៉ឺនដុល្លារ ពីក្រុមហ៊ុនកាប់ឈើវៀតណាមឈ្មោះ អ៊ុក ញ៉ ជាថ្នូរនឹងការបើកដៃ និងមិនចាត់ការសកម្មភាពកាប់បំផ្លាញព្រៃឈើនៅចំណុចអូរហុចនោះ ក្រសួងយុត្តិធម៌បានបញ្ជាក់ថា ក្រសួងនឹងចាត់ការលើ លោក ឡុង ហុកម៉េង ប្រសិនបើរឿងនេះជាការពិត។
ឯកឧត្តម គឹម សន្តិភាព អ្នកនាំពាក្យក្រសួងយុត្តិធម៌ បានថ្លែងប្រាប់ក្រុមអ្នកសារព័ត៌មាននៅក្នុងបណ្ដាញទំនាក់ទំនងសង្គម Telegram នៅព្រឹកថ្ងៃទី៤ ខែមេសា ឆ្នាំ២០១៧នេះថា នៅក្នុងគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើក៏មានតំណាងក្រសួងយុត្តិធម៌ផងដែរ ហេតុនេះកិច្ចការស្រាវជ្រាវ លើករណីលោក ឡុង ហុកម៉េង រងការចោទថាបានទទួលលុយ ២ម៉ឺនដុល្លារក្នុងមួយខែៗ ពីឈ្មួញរកស៊ីឈើនៅចំណុចអូរហុចនោះ គឺគណៈកម្មការជាតិ និងក្រសួងបានធ្វើរួមគ្នា។
ឯកឧត្តមបញ្ជាក់ថា ក្រសួងនឹងមានចំណាត់ការប្រសិនបើរកឃើញថា លោក ឡុង ហុកម៉េង ពិតជាមានកំហុសពិតប្រាកដមែន។យោងតាមប្រភពពីមន្ត្រីកងរាជអាវុធហត្ថលើផ្ទៃប្រទេសបានឱ្យ អ្នកសារព័ត៌មាន ដឹងថា រយៈពេល២ថ្ងៃ គឺថ្ងៃទី២៨ និងទី២៩ ខែមីនា ឆ្នាំ២០១៧កន្លងទៅ លោក ឡុង ហុកម៉េង ព្រះរាជអាជ្ញាខេត្តមណ្ឌគិរី ត្រូវបានគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ ដែលមានឯកឧត្តមនាយឧត្តមសេនីយ៍ សៅ សុខា ជាប្រធាន កោះហៅមកឆ្លើយតទល់ ជាមួយឈ្មោះ យិន ចាន្ទី ពាក់ព័ន្ធករណីសូកលុយលោក ឡុង ហុកម៉េង ក្នុងមួយខែ ២ម៉ឺនដុល្លារជាថ្នូរការបិទភ្នែក បិទច្រមុះ ធ្វើមិនដឹងមិនឮ បើកដៃឱ្យឈ្មួញវៀតណាមចូលកាប់បំផ្លាញឈើខុសច្បាប់ក្នុងទឹកដីខេត្តមណ្ឌគិរី ត្រង់ចំណុចអូរហុច។
ប្រភពបញ្ជាក់ថា នៅក្នុងរបាយការណ៍ដែលគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ ទទួលបាននោះគឺឈ្មោះ ជុំ រតនា បានឆ្លើយថា បានយកលុយ ២ម៉ឺនដុល្លារក្នុងមួយខែៗ ឱ្យទៅប្រពន្ធរបស់ ឈ្មោះ យិន ចន្ទី ដែលជាអ្នកដើរប្រមូលលុយពីបទល្មើសទាំងអស់នៅក្នុងខេត្តមណ្ឌលគិរី យកទៅឱ្យលោក ឡុង ហុកម៉េង ព្រះរាជអាជ្ញាខេត្តមណ្ឌលគិរី។ដោយឡែកប្រពន្ធរបស់ឈ្មោះ យិន ចន្ទី ក៏បានសារភាពក្នុងរបាយការណ៍ផងដែរថា ខ្លួនពិតជាទទួលលុយ ២ម៉ឺនដុល្លារក្នុងមួយខែៗពីឈ្មោះ ជុំ រតនា ដើម្បីឱ្យប្តីខ្លួនឈ្មោះ យិន ចន្ទី យកទៅជូនលោក ឡុង ហុកម៉េង។ប្រភពបានឱ្យដឹងថា ទោះជាយ៉ាងណានៅថ្ងៃទី២៩ ខែមីនា ឆ្នាំ២០១៧ ការតទល់គ្នារវាងឈ្មោះ យិន ចន្ទី និងលោក ឡុង ហុកម៉េង នៅចំពោះមុខគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ គឺភាគីទាំងសងខាងបដិសេធថា មិនដែលស្គាល់គ្នាទេ។
ដោយឡែកលោក ឡុង ហុកម៉េង បានស្នើសុំគណៈកម្មការជាតិសូមក៊ំឱ្យមានការទម្លាយព័ត៌មាន នៃការតទល់គ្នារវាងលោក និងឈ្មោះ យិន ចន្ទី ពាក់ព័ន្ធលុយដាក់ខែ ពីឈ្មួញកាប់ឈើនេះ ទៅឱ្យអ្នកសារព័ត៌មានផ្សាយ។លោក ឡុង ហុកម៉េង ព្រះរាជ្ញាអមសាលាដំបូងខេត្តមណ្ឌគិរី ធ្លាប់បានបដិសេធនឹងសំនួររបស់អ្នកសារព័ត៌មានដោយលោករុញឱ្យទៅសួរលោក ម៉ម វណ្ណដា ជាអ្នកនាំពាក្យវិញ បើទោះជារឿងនេះជារឿង បុគ្គលរបស់លោកជាអ្នករងការចោទថា ប្រព្រឹត្តអំពើពុករលួយក៏ដោយ។
លោកឧត្តមសេនីយ៍ឯក អេង ហ៊ី អ្នកនាំពាក្យគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ ធ្លាប់បានបញ្ជាក់ ថា ករណីគណៈកម្មការកោះហៅលោក ឡុង ហុកម៉េង ព្រះរាជ្ញាអមសាលាដំបូងខេត្តមណ្ឌគិរី មកសាកសួរ គឺជានីតិវិធីនៃការស្រាវជ្រាវ ស៊ើបអង្កេតរបស់មន្ត្រីជំនាញ ហើយវាជារឿងសម្ងាត់ ដូច្នេះលោកក៏មិនបានដឹងដែរ៕
