កំពង់ឆ្នាំង៖ បុរសម្នាក់ត្រូវកូនស្រីរបស់ខ្លួនយកដំបងអុសវាយចំក្បាលបណ្តាលអោយបែករងរបួសធ្ងន់ ព្រោះតែគាត់ស្រវឹងនិយាយច្រើនរករឿងវាយកូនមុន កូនស្រីខ្លាចឪពុកវាយនាងរលូតកូនក៏វាយឪពុកមុនតែម្តងទៅដើម្បីការពារខ្លួន។ ហេតុការណ៍នេះបានកើតឡើងនៅ វេលាម៉ោង៧និង១៥យប់ថ្ងៃទី០៩ ខែមិថុនា ឆ្នាំ២០១៤ នៅក្នុងភូមិ ត្រពាំងពោធិ ឃុំខុនរ៉ង ស្រុកបរិបូរណ៍។
សមត្ថកិច្ចនគរបាលមូលដ្ឋានបានអោយដឹងថា៖ បុរសរងគ្រោះមានឈ្មោះ ថោ មូល អាយុ៦២ឆ្នាំ រស់នៅក្នុងភូមិឃុំកើតហេតុខាងលើ គាត់ជាមនុស្សចូលចិត្តស្រាផឹកស្រវឹងរាល់ថ្ងៃ ។ មុនពេលកើតហេតុគាត់បានស្រវឹងនិយាយប៉ប៉ាច់ប៉ប៉ោចច្រើន ធ្វើអោយកូនចៅក្នុងផ្ទះទាំង៦នាក់ធុញធ្រាន់ ពេលនោះកូនស្រីឈ្មោះ ថោ ម៉ាប់ អាយុ ២១ឆ្នាំ មានផ្ទៃពោះ២ខែ ប្តីនាងទៅធ្វើការនៅប្រទេសកូរ៉េ ក៏បានឃាត់ថា៖ កុំអោយនិយាយច្រើនពេកស្ងាត់មាត់ខ្លះៗទៅ។
ខណះនោះឪពុកគេខឹងក៏បានទាញយកដំបង អង្កត់អុសបំរុងវាយនាង ឃើញដូច្នេះដោយនាងខ្លាចឪពុកវាយនាងរលូតកូន នាងក៏បានយកដំបងជាអង្កត់អុសវាយចំក្បាលឪពុកបែករបួសធ្ងន់ មុនតែម្តងទៅ។ នៅព្រឹកថ្ងៃទី១០ ខែមិថុនា បុរសរងគ្រោះក៏បានមកប្តឹង លោកមេភូមិ និងលោកមេឃុំ អោយជួយដោះស្រាយអោយ។
ក្រោយពីបានធ្វើការអប់រំដល់ជនរងគ្រោះនិង កូនស្រីដែលបានបង្ករបួសស្នាម ជនរងគ្រោះនិងកូនស្រី ក៏បានស្រុះស្រួលជានាគ្នាវិញមិនប្តឹងផ្តល់គ្នាទៀតឡើយ។ សមត្ថកិច្ចបានអោយដឹងទៀតថា៖ កាលពីឆ្នាំមុនកូនគាត់ឈ្មោះ ថោ កៃ ក៏បាន វាយឪពុករូបនេះ អោយរងរបួសដេរជាង ១០ថ្នេរ រួចម្តងមកហើយ ដែលរឿងកាលណោះក៏មិនខុសពីរឿងខាងលើនេះដែរ ព្រោះតែរឿងស្រវឹងខួបរាល់ថ្ងៃ ដែលគួរតែ ជៀសវាងអោយបាន ដើម្បីកុំអោយកើតឡើងអំពើហឹង្សាក្នុងគ្រួសារ និងអាចមានទោសជាប់ក្នុងពន្ធនាគារខេត្តទៀតផង៕
