ខេត្តកំពង់ធំ៖ លោក វរសេនីយ៍ឯក វូ ទៀនដៀន ប្រធាននយោបាយ យោធាខេត្តប៊ីញភឿក បានដឹកនាំប្រតិភូនៃបញ្ជាការដ្ឋានយោធាខេត្តប៊ីញភឿក កងទ័ពប្រជាជនវៀតណាម អញ្ជើញមកសួរសុខទុក្ខ និងជូនពរឆ្នាំថ្មី ប្រពៃណីជាតិខ្មែរ ដល់ថ្នាក់ដឹកនាំ និងយោធិនចំណុះនៃបញ្ជាការដ្ឋានតំបន់ប្រតិបត្តិការសឹករងកំពង់ធំ នៅ រសៀល ថ្ងៃ ទី០៤ ខែមេសា ឆ្នាំ ២០២២ ។
ឧត្ដមសេនីយ៍ ទោសោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានធ្វើកិច្ចស្វាគមន៍ ទទួលរ៉ាក់ទាក់ ប្រកបដោយភាពកក់ក្តៅ និងមនោសញ្ចេតនា ក្នុងនាមកងទ័ពនៃប្រទេសជាមិត្តជិតខាង ក្នុងកិច្ចសហប្រតិបត្តិ និងសហការល្អ និងបានថ្លែងអំណរគុណ ចំពោះគណបញ្ជាការយោធា ខេត្ត ប៊ីញភឿក ដែលបានជួយឧបត្ថម្ភគាំទ្រ ក្នុងការសាងសង់សមិទ្ធផលមួយចំនួន នៅក្នុងទីបញ្ជាការតំបន់ប្រតិបត្តិការសឹករងកំពង់ធំកន្លងមក។
រួមទាំងបានបញ្ជាក់ថា រយៈពេលជាងពីរឆ្នាំកន្លងមកនេះ ក្នុងការប្រយុទ្ធប្រឆាំងការពារទប់ស្កាត់ការឆ្លងរាលដាលជំងឺកូវីដ -១៩ ថ្នាក់ដឹកនាំនៃបញ្ជាការដ្ឋានយោធាខេត្តប៊ីញភឿក បានជួយឧបត្ថម្ភគ្រឿងបរិក្ខារពេទ្យ សម្រាប់ការពារជំងឺកូវីដ១៩ ជូនដល់យោធិន និងក្រុមគ្រួសារយោធិន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ សម្រាប់ប្រើប្រាសផងដែរ ។
លោក វរសេនីយ៍ឯក វូ ទៀនដៀន បានអំណរគុណថ្នាក់ដឹកនាំ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងអាជ្ញាធរដែនដី គ្រប់លំដាប់ថ្នាក់នៅក្នុងខេត្ត ដែលបានជួយគាំទ្រ ឧបត្ថម្ភនិងបង្ករលក្ខណងាយស្រួល ដល់ក្រុមបច្ចេកទេសជំនាញកា៧២ របស់ខេត្តប៊ីញភឿក ក្នុងការជីករុករកអដ្ឋិធាតុកងទ័ពស្ម័គ្រចិត្តវៀតណាម ដែលបានពលីជីវិត ក្នុងសម័យសង្គ្រាមកន្លងមក ដើម្បីធ្វើមាតុភូមិនិវត្តន៍ ទៅកាន់ប្រទេស ទទួលបានលទ្ធផល ល្អប្រសើរ ។
លោក វរសេនីយ៍ ឯក វូ ទៀនដៀន បាន ឧបត្ថម្ភ ថវិកាមួយ ចំនួនសម្រាប់រៀបចំកម្មវិធីបុណ្យចូលឆ្នាំថ្មី និង បានជូនពរឆ្នាំថ្មី ប្រពៃណីខ្មែរ ជូនថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ និង កងកម្លំាង ទាំងអស់ព្រមទាំងក្រុម គ្រួសារ សូមបានប្រកបដោយសេចក្តីសុខ សេចក្ដី ចម្រើន និង មាន សុខភាព ល្អ ទទួលបាន ជ័យជម្នះ គ្រប់ ភារកិច្ច ដែល រាជរដ្ឋាភិបាល កម្ពុជា ប្រគល់ ជូន ។
ដោយ ប៊ុន រដ្ឋា