ខេត្តស្ទឹងត្រែង៖ ទូកម៉ាស៊ីន ១គ្រឿង រួមទាំងឧបករណ៍នេសាទល្មើសច្បាប់ ជាច្រើនប្រភេទទៀត ត្រូវបានក្រុមមន្ត្រីឧទ្យានុរក្សប្រចាំតំបន់រាមសារ និងប្រជាសហគមន៍នេសាទ បង្ក្រាប និងរឹបអូសបានពីជនខិលខូច ដែលលបលួចប្រព្រឹត្តបទល្មើសនេសាទ នៅពេលថ្ងៃ និងពេលយប់ បើទោះបីរដូវនេះជារដូវបិទការនេសាទត្រីក៏ដោយ។
នៅក្នុងរយៈពេល ៣ថ្ងៃមកនេះ (៥-៧ឧសភា២០២៤) ក្រុមអភិរក្សត្រីមេពូជ សហការជាមួយ ក្រុមមន្ត្រីឧទ្យានុរក្សប្រចាំតំបន់រាមសារ ប្រជាសហគមន៍នេសាទសង្កាត់សាមគ្គី និងសហគមន៍ ឃុំអូរស្វាយ-ឃុំកោះស្នែង រួមគ្នាបង្កើនការចុះល្បាតនៅតាមតំបន់សំខាន់ៗ នៅលើផ្ទៃដងទន្លេមេគង្គ ដើម្បីទប់ស្កាត់ការប្រព្រឹត្តបទល្មើសនេសាទ ក្នុងរដូវបិទការនេសាទ ដែលចាប់អនុវត្តពីថ្ងៃទី១ឧសភា២០២៤ នោះមក និងដើម្បីរក្សាបាននូវត្រីមេពូជពងកូន ក៏ដូចធនធានជលផល ផងដែរ។
មន្ត្រីឧទ្យានុរក្សប្រចាំតំបន់រាមសារ នៃទន្លេមេគង្គ ខេត្តស្ទឹងត្រែង លោក នី វី បានប្រាប់អ្នកសារព័ត៌មានឱ្យដឹងថា នៅក្នុងពេលចុះល្បាតច្រើនថ្ងៃមកនេះ ក្រុមការងារបានប្រទះឃើញ ក្រុមជនល្មើសធ្វើសកម្មភាព ដោយប្រើប្រាស់ឧបករណ៍ឆក់ត្រី ទាំងពេលថ្ងៃ និងពេលយប់ ។ លោកថា នៅថ្ងៃទី៥ឧសភា ក្រុមការងាររួមសហការ ជាមួយប្រជាសហគមន៍នេសាទ នៅសង្កាត់សាមគ្គី ក្រុងស្ទឹងត្រែង និងឃុំអូរស្វាយ-ឃុំកោះស្នែង ក្នុងស្រុកបូរីអូរស្វាយសែនជ័យ បង្ក្រាបបាន ២ករណី និងនៅថ្ងៃទី៦ឧសភា បង្ក្រាបបាន ១ករណី ដោយដកហូតសម្ភារ និងឧបករណ៍ល្មើសច្បាប់មួយចំនួន ថែមទៀត ។
លោក នី វី បានបន្តទៀតថា ការបង្ក្រាប ៣ករណីខាងលើ សមត្ថកិច្ចបានប្រទះឃើញ ជនសង្ស័យមួយក្រុមមានគ្នា ២នាក់ ដែលកំពុងធ្វើសកម្មភាពនេសាទខុសច្បាប់ និងជនសង្ស័យ បន្ទាប់ពីឃើញសមត្ថកិច្ចទៅដល់ ក៏បានទម្លាក់ឧបករណ៍នេសាទ ចោលក្នុងទឹក និងបើកទូករត់គេចខ្លួន។
លោក នី វី បានបន្តឱ្យដឹងទៀតថា នៅវេលាម៉ោងជាង ៣ទៀបភ្លឺ ឈានចូលថ្ងៃទី៧ឧសភា ម្សិលមិញ ក្រុមល្បាតក៏បានប្រទះឃើញ ក្រុមជនល្មើសកំពុងធ្វើសកម្មភាពឆក់ត្រី ខណៈនោះ ក្រុមល្បាតបានប្រដេញចាប់ តែក្រុមជនល្មើសបានរត់ចោលទូកម៉ាស៊ីន និងបានធ្វើការដកហូតវត្ថុតាងទាំងនោះ (ទូកឈើក្បាលស្រួច១គ្រឿង ,ម៉ាស៊ីនកម្លាំង ២០សេសធីបីស៊ី ១គ្រឿង ,អាគុយ ៥០Ah ១គ្រឿង ,ដុំឆក់ស៊េរីថ្មី ១គ្រឿង ,ច្រវ៉ាក់ជាប់កន្ត្រងដងត្រី១ និងខ្សែភ្លើងប្រវែង ៥ម៉ែត្រ ហើយវត្ថុតាងទាំងនេះ ត្រូវបាននាំយកទៅរក្សាទុក នៅស្នាក់ការរងកំបោរ ។
ប្រជាសហគមន៍នេសាទ លោក ថង កង បានបញ្ជាក់ថា ជនសង្ស័យទាំងនេះមានចរិកព្រហើនកោងកាច មិនចូលរួមគោរពច្បាប់ជលផលនោះទេ ព្រោះនៅក្នុងរដូវបិទនេសាទ ជនល្មើសទាំងនេះ បានប្រើប្រាស់ឧបករណ៍ខុសច្បាប់ ដោយធ្វើសកម្មភាពឆក់ត្រីទាំងថ្ងៃ ដោយមិនកោតខ្លាចច្បាប់នោះឡើយ ។
លោក ថង កង បានបញ្ជាក់ទៀតថា ក្នុងនាមប្រជាសហគមន៍នេសាទ សូមអំពាវនាវដល់ប្រជាអ្នកនេសាទទាំងអស់ កុំព្យាយាមប្រើឧបករណ៍នេសាទខុសច្បាប់ បែបនេះទៀត ព្រោះជាទង្វើល្មើសច្បាប់ និងការបំផ្លាញធនធានមច្ឆជាតិរបស់ខ្លួនឯង តែប៉ុណ្ណោះ។
អភិបាលក្រុងស្ទឹងត្រែង លោក សាយ កុសល បានថ្លែង លើកទឹកចិត្តដល់ក្រុមអភិរក្សត្រីមេពូជ និងលោកបានស្នើឱ្យរួមគ្នា បង្កើនសកម្មភាពចុះល្បាតឱ្យបានញឹកញាប់ ចំណែកអាជ្ញាធរ នឹងនៅតែបន្តជួយឧបត្ថម្ភ គាំទ្រ នូវសម្ភារ គ្រឿបរិភោគ ផ្សេងៗបន្ថែមទៀត ដើម្បីបង្កើនប្រសិទ្ធភាពការពារជលផល ដែលជាប្រយោជន៍រួមរបស់យើងទាំងអស់គ្នា នៅក្នុងរដូវបិទនេសាទ ដែលនឹងចាប់អនុវត្តពីថ្ងៃទី១ឧសភា២០២៤ នោះមក។
លោក សាយ កុសល បានស្នើដល់ខណ្ឌរដ្ឋបាលជលផល និងប៉ុស្តិ៍នគរបាលរដ្ឋបាលឃុំ សូមជួយបន្ថែមកម្លាំងអន្តរាគមន៍ ដើម្បីជួយដល់ប្រជាសហគមន៍នេសាទ និងកម្លាំងល្បាត ព្រោះត្បិតសហគមន៍មានគ្នាតិច រីឯដែនអភិរក្សមានទំហំធំ និងមានប្រវែងជាង៤០ គីឡូម៉ែត្រ ឯណោះ មិនអាចគ្រប់គ្រងបានទាំងស្រុងនោះទេ បើគ្មានកម្លាំងជំនួយ៕ដោយ៖ឡុង សំបូរ
