កំពង់ឆ្នាំង៖ កូនឈើនៅក្នុង“ស្ថានីយ៏ដាំកូនឈើម្សៅក្រដាស់ហ៊ុនសែនមា.នក ជាង១ហិកតាបានរងការខូចខាត ដោយសារភ្លើងឆេះព្រៃបានឆេះរាលដាល ដែលការឆេះព្រៃនេះស្ថិតក្នុងភូមិ មា.នក កើត ឃុំមា.នក ស្រុកសាមគ្គីមានជ័យ។ករណីនេះបានកើតឡើងវេលាម៉ោង២និង៣០នាទីរសៀលថ្ងៃទី០៣ ខែកុម្ភះ ឆ្នាំ២០១៥ ក្រោយពីមានអន្តរាគមន៍ពីសមត្ថកិច្ចនគរបាលមូលដ្ឋាន ប្រជាពលរដ្ឋ និងការចូលរួមរបស់រថយន្តពន្លត់អគ្គីភ័យស្នងការដ្ឋាននគរបាលខេត្ត ជាបន្តបន្ទាប់មកទើបអាចទប់ស្កាត់ភ្លើងព្រៃនេះបាន។
លោក ដួង ហុង អធិការនគរបាលស្រុកសាមគ្គីមានជ័យបាននិយាយអោយដឹងថា៖ មុនពេលកើតហេតុមានភ្លើងឆេះចេញពីកញ្ច្រាំងស្រែនៅក្បែរស្ថានីយដាំកូនឈើម្សៅក្រដាស់ ហ៊ុនសែន មា.នក បន្ទាប់មកក៏បានរាលឆេះព្រៃ និងបានបន្តឆេះចូលដល់កូនឈើដែលគេដាំក្នុងស្ថានីយ៏តែម្តង ខណៈនោះមន្ត្រីនគរបាលប៉ុស្តិ និងនគរបាលស្រុក រួមជាមួយប្រជាពលរដ្ឋបាននាំគ្នាពន្លត់ប៉ុន្តែមិនអាចទប់ស្កាត់បាន ក៏បានហៅរថយន្តពន្លត់អគ្គីភ័យរបស់ស្នងការនគរបាលខេត្តចំនួន២គ្រឿងទៅជួយបាញ់ទឹកពន្លត់ភ្លើងព្រៃ នោះអស់រយៈពេលជាង១ម៉ោងទើបគ្រប់គ្រងសភាពការណ៏នោះបាន។
លោកអធិការបានបន្តអោយដឹងទៀតថា៖នៅក្នុងករណីនេះកូនឈើក្នុងស្ថានីយជាង១ហិកតាបានរងការខូចខាត ប៉ុន្តែបើសិនគ្មានការអន្តរាគមន៍ពីរថយន្តពន្លត់អគ្គីភ័យរបស់ស្នងការនគរបាលខេត្ត សមត្ថកិច្ចនគរបាលមូលដ្ថាននិងប្រជាពលរដ្ឋទេនោះ ទំហំនៃការខូចនឹងធំជាងនេះ ព្រោះស្ថានីយម្សៅក្រដាស់នេះមានផ្ទៃដីរាប់រយហិកតា និងកូនឈើធ្វើក្រដាស់រាប់ម៉ឺនដើម។
លោកអធិការនគរបាលស្រុកក៏បានអំពាវនាវដល់ប្រជាពលរដ្ឋទាំអស់ក្នុងស្រុកផងដែរថា សូមបងប្អូនប្រជាពលរដ្ឋយើងប្រុងប្រយ័ត្នចំពោះភ្លើងឆេះព្រៃនេះ ព្រោះវាបង្កឡើងដោយសារតែមនុស្សដែលបោះកន្ទុយបារីចោលទៅលើកញ្ច្រាំងស្រូវ ឬទៅលើស្មៅដែលងាប់ក្នុងនៅព្រៃ និងអ្នកដើរយកឃ្មុំ ដែលតែងតែទុកភ្លើងគុបចោល នេះគឺជាដើមហេតុអាចបណ្តាលអោយមានភ្លើងព្រៃដ៏កំណាចឆេះឡើងបាន៕ . ( ឈៀង ថារិទ្ធ )