បុរសម្នាក់ស្រវឹងស្រាជោគជាំ បានបើករថយន្តមួយគ្រឿងក្នុងល្បឿនយ៉ាងលឿន រួចក៏បានរេចង្កូតជ្រុលទៅបុកបង្កាន់ដៃប្រឡាយទឹកស្អុយ បណ្តាលឱ្យដាច់ធ្លាក់ចូលក្នុងប្រឡាយ តែសំណាងល្អ មិនធ្លាក់ទៅក្រោម និងមិនមានគ្រោះថ្នាក់ដល់នណាម្នាក់នោះទេ ។ ហេតុការណ៍
នេះ បានកើតឡើង កាលពីវេលាម៉ោង៩នឹង៣០នាទីយប់ ថ្ងៃទី២២ ខែមិនា ឆ្នាំ២០១៥ តាមបណ្តោយផ្លូវលេខ៤៨៨ កែងនឹងផ្លូវលេខ១០៥ ស្ថិតក្នុងសង្កាត់ផ្សារដើមថ្កូវ ខណ្ឌចំការមន ។
សាក្សីនៅកន្លែងកើតហេតុ បានឱ្យដឹងថា មុនពេលកើតហេតុ គេបានឃើញបុរសម្នាក់ ទំនងជាស្រវឹងស្រាជោគជាំ បានបើករថយន្តម៉ែកស៊ឺដែសមួយគ្រឿង ពណ៍ខ្មៅ ពាក់ស្លាកលេខ ភ្នំពេញ 2B-1232 ទិសដៅពីកើតទៅលិច ក្នុងល្បឿនយ៉ាងលឿន ខណះមកដល់ចំណុចកើតហេតុ ក៏បានរេចង្កូត ជ្រុលទៅបុកបង្កាន់ដៃប្រឡាយលូទឹកស្អុយ បណ្តាលឱ្យបាក់ ហើយរថយន្តកល់នឹងឃឿន ទៅមុខលែងរួច កុំអីធ្លាក់ទៅខាងក្រោម ចូលក្នុងប្រឡាយទឹក សំណាងល្អ មិនមានគ្រោះថ្នាក់ ដល់នណាម្នាក់នោះទេ ។ ប្រភពដដែលបានបន្តថា ក្រោយកើតហេតុ សមត្ថកិច្ចមូលដ្ឋាន បានចុះមកអន្តរាគមន៍ ដល់កន្លែងកើតហេតុ ហើយបានធ្វើការឃាត់ខ្លួនម្ចាស់រថយន្ត ខណៈបម្រុងឡើងរថយន្តតាក់ស៊ីគេចខ្លួន ឱ្យមកដោះស្រាយគ្នាសងសំណង់ នូវការខូចខាត ដែលខ្លួនបានបង្កឡើង ដោយសារតែចេញពីផឹកស៊ីស្រវឹងនោះ ។
សមត្ថកិច្ចបានឱ្យដឹងថា រថយន្តបង្កខាងលើ ត្រូវបានយកទៅរក្សាទុក នៅអធិការដ្ឋាននគរបាល ខណ្ឌចំការ ដោយសារតែម្ចាស់រថយន្ត ស្រវឹងស្រាខ្លាំងពេក និយាយគ្នាមិនត្រូវ រង់ចាំដោះស្រាយនាពេលក្រោយ ៕
