ភ្នំពេញ ៖ ជនទំនើងម្នាក់ត្រូវកម្លាំងនគរបាលប៉ុស្តិ៍ក្បាលកោះឃាត់ខ្លួន នៅក្នុងហាងកាហ្វេមួយកន្លែង ផឹកស្រាថ្នាំអស់កន្លះលីត្រ និងទឹកដោះឆៅមួយកំប៉ុង មានកម្លាំង ក៏យកកែវគប់បែក ទូរទស្សន៍ របស់ហាងអស់មួយគ្រឿង ។ នាយនគរបាលប៉ុស្តិ៍ក្បាលកោះ លោក មាស ហែល បានឲ្យដឹងថា ការឃាត់ខ្លួនជនទំនើងខាងលើនេះ បានធ្វើឡើងតាមបណ្តឹងរបស់ម្ចាស់ហាង កាលពីរសៀលថ្ងៃទី៨ ខែមេសា ឆ្នាំ២០១៤ នៅចំណុចក្នុងហាងកាហ្វេ ផ្ទះជួល ផ្លូវជាតិលេខ១ ក្នុងភូមិយកបាត សង្កាត់ក្បាលកោះ ខណ្ឌមាន ជ័យ ។ ជនសង្ស័យមានឈ្មោះម៉ៅ វាសនា អាយុ២៥ឆ្នាំ គ្មានមុខរបរពិតប្រាកដ មានទីលំនៅក្នុងភូមិ-សង្កាត់កើតហេតុ ។
តាមប្រភពព័ត៌មានពីនគរបាលប៉ុស្តិ៍ក្បាលកោះបានឲ្យដឹងថា មុនពេលកើតហេតុជនសង្ស័យរូបនេះបានផឹកស៊ីក្នុងផ្ទះរបស់ខ្លួនរហូតដល់ស្រវឹងជោកជាំ នៅផ្ទះរបស់ខ្លួន ក្រោយមក ក៏ចូលមកផឹកកាហ្វេនៅក្នុងហាងកើតហេតុ ផឹកទឹកដោះគោឆៅអស់មួយកំប៉ុងទៀត ក៏កើតមានទំនាស់ពាក្យសម្តីជាមួយអ្នកផឹកកាហ្វេ ដោយមិនដឹងមូលហេតុ ។ លុះមួយសន្ទុះក្រោយមកជនសង្ស័យបែកមានកម្លាំង ហើយក្លាហាន ក៏បានបញ្ចេញចរិកកាចសាហាវ ដោយយកកែវគប់ទៅលើទូរទស្សន៍ LCD ៤០អ៊ិញ ដែលដាក់ជាប់នៅជញ្ជាំងបណ្តាលឲ្យបែក ។
ភ្លាមៗនោះ ជនសង្ស័យមានបំណងគេចខ្លួន តែពេលនោះកម្លាំងនគរបាលប៉ុស្តិ៍បានចុះអន្តរាគមន៍ឃាត់ខ្លួនភ្លាមៗបញ្ជូនមកកាន់ប៉ុស្តិ៍រដ្ឋបាលក្បាលកោះដើម្បីធ្វើកំណត់ហេតុ ។ លោក មាស ហែល នាយប៉ុស្តិ៍នគរបាលក្បាលកោះស្តីទីបានឲ្យដឹងថា ជនទំនើងរូបនេះគឺជាមុខសញ្ញាមិនល្អនៅក្នុងមូលដ្ឋាន តែងតែបង្កការភ័យខ្លាចដល់ប្រជាពលរដ្ឋតាមរយៈចរិកកាចសាហាវ ប៉ុន្តែមិនបានប្រព្រឹត្តបទល្មើសធ្ងន់ធ្ងរនោះទេ ហើយជននេះក៏ស្ថិតក្នុងបញ្ជីខ្មៅរបស់សមត្ថកិច្ចផងដែរ ។
នៅថ្ងៃកើតហេតុជនសង្ស័យរូបនោះបានផឹកស្រវឹងនៅផ្ទះរបស់ខ្លួនរួចមកបង្កការអុកឡុកនៅក្នុងហាងកាហ្វេថែមទៀតរហូតវាយបំផ្លាញទ្រព្យសម្បត្តិរបស់ម្ចាស់ហាង ហើយត្រូវម្ចាស់ហាងប្តឹងទើបឈានដល់ការចាប់ខ្លួនជាក់ស្តែងតែម្តង ។ ក្រោយឃាត់ខ្លួនសង្ស័យបានបញ្ជូនមកកាន់អធិការដ្ឋាននគរបាលខណ្ឌមានជ័យដើម្បីចាត់ការតាមនីតិវិធី ៕ 
