ព្រះវិហា៖ នៅព្រឹកថ្ងៃទី១០ ខែមិថុនា ឆ្នាំ២០១៤នៅកងរាជអាវុធហត្ថខេត្តព្រះវិហារបើកវគ្គហ្វឹកហ្វឺនបំប៉នមុខវិជ្ជាយោធា ចំណេះដឹងទូទៅ និងជំនាញអាវុធហត្ថក្រោមអធិបតីភាពឯកឧត្តម ឧត្តមសេនីយ៍ កង សៅគុណ មេបញ្ជាការកងរាជអាវុធហត្ថខេត្តមានរយៈពេល២០ថ្ងៃដោយចាប់ពីថ្ងៃទី១០ ខែមិថុនា ដល់ថ្ងៃទី៣០ ខែមិថុនា ឆ្នាំ២០១៤ដែលក្នុងវគ្គហ្វឹកហ្វឺននេះមានសិក្ខាកាមចូលរួមចំនួន ៥០នាក់ ។
លោកអនុសេនីយ៍ឯក ជេត វណ្ណៈ នាយការិយាល័យហ្វឹកហ្វឺនកងរាជអាវុធហត្ថខេត្តព្រះវិហារអានរបាយការណ៍ការងារឆមាសទី១ ដែលអង្គភាពអាវុធហត្ថសំរេចបានកន្លងមកជូនគណៈអធិបតីជ្រាប ។ ឯកឧត្តម ឧត្តមសេនីយ៍ កង សៅគុណ មេបញ្ជាការកងរាជអាវុធហត្ថខេត្តព្រះវិហារមានប្រសាសន៍ថាៈ ផែនការហ្វឹកហ្វឺនកងរាជអាវុធហត្ថឆ្នាំ២០១៤របស់ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធលើផ្ទៃ
ប្រទេស ដើម្បីលើកំពស់សមត្ថភាពយល់ដឹង បន្ថែមនូវចំណេះដឹងរបស់នាយ នាយរងអាវុធហត្ថអំពីគោលបំណងនឹងសំណូមពរខ្លឹមសារមេរៀន ធ្វើឲ្យសិក្ខាកាមយល់ដឹងអំពីតួនាទីភារកិច្ច លើការបំពេញបេសកម្មទាំងចំណេះដឹង និងចំណេះធ្វើលើមុខវិជ្ជាយោធា ត្រូវមានស្មារតីទទួលខុសត្រូវមានវិន័យ សីលធម៍ និងគុណមានមនសិការ ការងារ និងអត្តចរិកស្លូតត្រង់ និងធ្វើឲ្យសិក្ខាកាមមានសមត្ថភាពជំនាញអាវុធហត្ថ និងតម្រួតយោធាដែលមានចែងក្នុងអនក្រិត្យលេខ៧៧អនក្រ ។
ឯកឧត្តមក៍បានមានប្រសាសន៍ផ្តាំផ្ញើរដល់សិក្ខាកាមទាំងអស់ដែលចូលរួមហ្វឹកហ្វឺនថ្ងៃនេះ សូមឲ្យយកចិត្តទុកដាក់រៀនសូត្រ ខិតខំព្យាយាមក្រេមយកចំណេះដឹង តាមមុខវិជា្ជនីមួយៗពីគ្រូបង្គោល ដើម្បីយកចំណេះដឹងពីការសិក្សារៀនសូត្រនេះមកបំរើជាតិ និងរាជរដ្ឋាភិបាលឲ្យទទួលបានជោគជ័យ ៕