ខេត្តព្រះវិហារ ក្រោមអធិបតីភាពឯកឧត្តម សុខ ខាវ៉ាន់ រដ្ឋលេខាធិការ នឹងជាតំណាងរបស់ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល លោក គង់ មករា ប្រធានមន្ទីរឧស្សាហកម្ម រ៉ែ និងថាមពលខេត្តត្រូវបានចូលកាន់មុខតំណែងប្រធានមន្ទីររ៉ែ និងថាមពលខេត្តព្រះវិហារ ។
លោក គង់ មករា ប្រធានមន្ទីររ៉ែ និងថាមពលខេត្តដែលទើបចូលកាន់មុខតំណែងថ្មីបានឡើងធ្វើការប្តេជ្ញាចិត្តថាៈ ដើម្បីឆ្លើយតបចំពោះឧបការៈគុណដ៍ឧត្តុងឧត្តម និងការផ្តល់ទំនុកចិត្តរបស់ឯកឧត្តមរដ្ឋលេខាធិការ ឯកឧត្តមអភិបាលរងខេត្ត ឯកឧត្តមសមាជិកក្រុមប្រឹក្សាខេត្ត ខ្ញុំសូមធ្វើការប្តេជ្ញាចិត្តចូលរួមអនុវត្តកម្មវិធីកំណែទំរង់ស៊ីជម្រៅគ្រប់វិស័យរបស់
រាជរដ្ឋាភិបាល ខិតខំពុះពារការលំបាក និងដោះស្រាយបញ្ហាប្រឈមនានា ដោយឈរលើស្មារតីទទួលខុសត្រូវខ្ពស់រួមចំណែកអនុវត្តផែនការសកម្មភាព និងទិសដៅរបស់ក្រសួងនឹងខេត្តអោយបានល្អប្រសើរ ខិតខំបំពេញភារៈកិច្ចក្នុងតួនាទីជាប្រធានមន្ទីររ៉ែ និងថាមពលឲ្យបានល្អប្រសើរសាកសមជាសេនាធិការរបស់ក្រសួងនឹងខេត្តជាពិសេសលើវិស័យជំនាញដែលពាក់ព័ន្ធទៅនឹងធនធានរ៉ែ ប្រេងកាត និងថាមពល ។
ឯកឧត្តម គោ ស៊ុំប៊ុនសឿត អភិបាលរងខេត្តព្រះវិហារទទួលបន្ទុកឧស្សាហ៍កម្ម រ៉ែ និងថាមពលមានប្រសាសន៍សំណេះសំណាល នឹងអានរបាយការណ៍អំពីស្ថានភាពនឹងភូមិសាស្ត្រ និងបានជំរាបជូនឯកឧត្តមរដ្ឋលេខាធិការអំពីការរីកចំរើនយ៉ាងឆាប់រហ័សនូវហេដ្ឋារចនាសម្ព័ន្ឋនានាដែលប្រជាពលរដ្ឋនៅខេត្តព្រះវិហារទទួលបានពីរាជរដ្ឋាភិបាលក្រោមការដឹកនាំរបស់សម្តេចតេជោ ហ៊ុន សែន ។
ឯកឧត្តម សុខ ខាវ៉ាន់ មានប្រសាសន៍សំណេះសំណាលនឹងពាំនាំប្រសាសន៍ផ្តាំផ្ញើរបស់ឯកឧត្តមរដ្ឋមន្ត្រីក្រសួងរ៉ែ និងថាមពលថាៈ ក្នុងឱកាសដ៍សប្បាយរីករាយនេះខ្ញុំសូមអបអរសាទរចំពោះលោក គង់ មករា ដែលបានទទួលការគាំទ្រពីក្រសួងរ៉ែ និងថាមពល នឹងគណៈអភិបាលខេត្តដែលតែងតាំងជាប្រធានមន្ទីររ៉ែ និងថាមពលប្រចាំខេត្តព្រះវិហារ
ទន្ទឹមនឹងនេះខ្ញុំសូមពាំនាំពាក្យផ្តាំផ្ញើមួយចំនួនជូនលោកប្រធានមន្ទីរគឺក្តាប់ឲ្យបាននូវគោលនយោបាយរាជរដ្ឋាភិបាលទាក់ទងទៅនិងវិស័យរ៉ែ និងថាមពលដោយរួមបញ្ចូលទាំងអគ្គីសនី និងឧស្ម័ន ផែនការអភិវឌ្ឍន៍របស់ក្រសួងក្នុងវិស័យនេះ ត្រូវយកចិត្តទុកដាក់ពង្រឹងសាមគ្គីភាពផ្ទៃក្នុង ក្នុងបុព្វហេតុជំរុញការអភិវឌ្ឍន៍វិស័យរ៉ែ និងថាមពល ។
