ឧត្តរមានជ័យ ស្ត្រីមានប្តី ថែមទាំងមានកូន៣នាក់ ត្រូវជនសង្ស័យវាយឱ្យសន្លប់រួចចាប់រំលោភបានសំរេច ហើយបានវាយបន្ថែមបំណងសំលាប់បំបិទមាត់ តែសំណាងល្អបានអ្នកនៅក្នុងភូមិ ទៅឃើញដេកសន្លប់នៅព្រៃក្រោយផ្ទះរបស់ខ្លួនក៏បានផ្តល់ដំណឹងដល់សាច់ញាតិរួចនាំយកមកមន្ទីរពេទ្យបង្អែកស្រុកអន្លង់វែង។
ស្រី្តរងគ្រោះខាងលើឈ្មោះ ធាម ខេម អាយុ២៨ឆ្នាំ មានមុខរបរលក់អីវ៉ាន់ចាបហួយបច្ចុប្បន្នរស់នៅភូមិទួលក្រួស ឃុំថ្លាត ស្រុកអន្លង់វែង ខេត្តឧត្តរមានជ័យ នៅវេលាម៉ោង ៦ល្ងាច ថ្ងៃទី១០ ខែមិថុនា ឆ្នាំ២០១៤។ ឱ្យដឹងពីប្រជាពលរដ្ឋម្នាក់មកពីចំការ បានប្រទះឃើញដេកសន្លប់អាក្រាតកាយនៅក្បែរកំពតព្រៃ នៅខាងក្រោយផ្ទះចំងាយប្រហែល ១គីឡូម៉ែត្រ និងមានអាការៈមមើលមមាយស្រែឱ្យគេជួយ ពេលនោះអ្នកភូមិក៏បានស្លៀកបំពាក់ឱ្យរួចផ្តល់ដំណឹងដល់ប្តីរបស់ស្ត្រីរងគ្រោះ និងសាច់ញាតិ តែដោយអាការៈធ្ងន់ធ្ងរពេកក៏បញ្ជូនទៅមន្ទីរពេទ្យ។
តាមឱ្យដឹងពីបុរសជាប្តីរបស់ស្ត្រីរងគ្រោះឈ្មោះ ឆូយ អាន អាយុ៣៥ឆ្នាំ បានរៀបរាប់ថា នៅវេលាម៉ោងប្រហែល៥ល្ងាច គាត់បានត្រឡប់មកពីចំការ តែពេលមកដល់ផ្ទះក៏សួររកប្រពន្ធ ពេលនោះកូនរបស់គាត់ប្រាប់ថា ទៅដឹកគោនៅព្រៃក្រោយផ្ទះ ដោយយូរពេកមិនឃើញត្រឡប់មក ឃើញតែគោបាត់មនុស្សសង្ស័យថា ខ្យល់គរ ប្រុងនឹងទៅតាម ក៏ស្រាប់តែអ្នកភូមិមកប្រាប់ថា ប្រពន្ធរបស់ខ្លួនសន្លប់គ្មានខោអាវនៅព្រៃក្រោយផ្ទះ។
តាមឱ្យដឹងពីស្ត្រីរងគ្រោះបានរៀបរាប់ថា នៅពេលដែលខ្លួនកំពុងតែដឹកគោ ស្រាប់តែមានមនុស្សប្រុសម្នាក់មកចាប់ខ្លួនអូសចូលព្រៃ ព្រមទាំងវាយមកលើខ្លួនជាច្រើនដៃ ត្រូវករ និងក្បាល ហើយខ្លួនក៏ប្រវាយប្រតប និងស្រែឱ្យគេជួយ តែដោយសារជនសង្ស័យវាយជាច្រើនដៃចំពេញផ្ទៃមុខ និងករ ក៏បានសន្លប់បាត់ទៅ ហើយនៅពេលដឹងខ្លួនក៏មកដល់មន្ទីរពេទ្យតែម្តង។
