ក្រោយ World Cup ចប់ ខ្សែបម្រើក្រុមអាស៊ូរីអ៊ីតាលីកីឡាករ Andrea Pirlo (អាន់ដ្រេ ពើឡូ) បានអះអាងថា គាត់នឹងចូលនិវត្តន៍ ពីក្រុមបាល់ទាត់ជម្រើសជាតិអ៊ីតាលី ក្រោយពេលការប្រកួត World Cup បញ្ចប់ ថ្វីបើក្រុមត្រូវការគាត់ក៏ដោយ ។ កីឡាកររបស់ក្លិបសេះបង្កង់ Juventus រូបនេះបាននិយាយថា នេះជាពេលដែលត្រូវផ្តល់ឱកាសដល់យុវជន អ៊ីតាលី ដើម្បីបង្ហាញសមត្ថភាព ហើយគាត់ក៏ចង់ដកខ្លួនចេញ ។ Pirlo ប្រាប់សារព័ត៌មាន Sky Sports News ថា “ខ្ញុំបានគិតពីការចូលនិវត្តន៍ក្រោយពេល World Cup ចប់ ព្រោះខ្ញុំមានវ័យចំណាស់ ខ្ញុំចង់ឲ្យកីឡាករក្មេងៗបានបញ្ចេញពីសមត្ថភាពរបស់គេ” ។ គួរបញ្ជាក់ថា អ៊ីតាលីនឹងត្រូវជួបជាមួយក្រុមតោកំណាចអង់គ្លេសនៅយប់ថ្ងៃសៅរ៍សម្រាប់យុទ្ធនាការ World Cup ឆ្នាំ ២០១៤ នេះ ៕