ភ្នំពេញ៖ សំរាប់ជំនួបនៃការប្រកួតបាល់ទាត់ ដណ្តើមពានរង្វាន់ធនាគារអេស៊ីលីដា ប្រចាំឆ្នាំ២០១៤ គឺក្រុមសាខាស្រុកស្រីសន្ឋរ បានយកឈ្នះក្រុមសាខាម៉ៅសេទុង ក្នុងលទ្ឋផល៤ទល់នឹង១ នៅលើទីលានខេមរា ស្ថិតក្នុងសង្កាត់ទួលគោក ខណ្ឌឬស្សីកែវ ។ នៅក្នុងតង់ទី១ ក្រុមសាខាស្រុកស្រីសន្ឋរ បានបើកការវាយលុក ទៅលើគូប្រកួតយ៉ាងខ្លាំង ដោយនាំមុខបណ្តោះអាសន្ន៣ទល់នឹង១ ។ ពេលចូលដល់តង់ទី២ ក្រុមសាខាម៉ៅសេទុង ខិតខំប្រឹងប្រែងផ្លាស់ប្តូរបច្ចេកទេសលេងណាស់ដែរ តែមិនមានឱកាសរកគ្រាប់បាល់បានបន្ថែមឡើយ ខណះក្រុមសាខាស្រុកស្រីសន្ឋរ រកបាន១គ្រាប់បន្ថែមទៀត ។
មួយគូទៀត ក្រុមជើងឯកឆ្នាំចាស់ គឺការិយាល័យកណ្តាលគ្រុបឌី ទទួលបាន៣ពិន្ទុបន្ថែមទៀត បន្ទាប់ពីយកឈ្នះក្រុមសាខាចោមចៅ ក្នុងលទ្ឋផល៤ទល់នឹង០ ដែល៤គ្រាប់នោះ ទាត់ចូលដោយកីឡាករសាយ សាវរិទ្ឋ អ៊ុក សាវ៉ាត ឡឹក សុចិត្រា និងយឹម រ័ត្នធា ម្នាក់១គ្រាប់ ។ គ្រាប់បាល់ទាំង៤គ្រាប់នេះ រកបាននៅតង់ទី១ ២គ្រាប់ និងតង់ទី២ ២គ្រាប់ រីឯក្រុមសាខាចោមចៅ រកមិនបានសូម្បីតែ១គ្រាប់ បើទោះបីជាគេមានឱកាសច្រើន នៅក្នុងការគ្រប់គ្រងបាល់ក៏ដោយនោះ ។
ចំណែកឯប្រកួតជាលក្ខណៈមិត្តភាពចំនួន៣គូ គឺក្រុមសាខាពោធិ៍ចិនតុង ឈ្នះក្រុមសាខាស្រុកកោះធំ ខេត្តកណ្តាល ៤ទល់នឹង២ ក្រុមសាខាវិមានចតុមុខ ចាញ់ក្រុមសាខាស្ទឹងមានជ័យទី២ ១ទល់នឹង២ និងក្រុមសាខាទួលគោក ឈ្នះក្រុមសាខាបឹងត្របែក ៥ទល់នឹង១ ។ នេះជាការប្រកួតគ្នាមួយ ដើម្បីសមជើង និងកំដៅសាច់ដុំ ក្រោយពីសំរាកពីការប្រកួតដណ្តើមពានរង្វាន់១សប្តាហ៍ ម្យ៉ាងទៀត ការប្រកួតនេះ បានរឹតចំណងសាមគ្គីភាព មិត្តភាព ភាពស្និតស្នាលរវាងបុគ្គិក និងបុគ្គលិកគ្នាឯក និងបានផ្តល់ឱកាសដល់ពួកគេបានចូលប្រឡូក និងស្រឡាញ់វិស័យកីឡា នៅកម្ពុជាកាន់តែប្រសើរឡើងថែមមួយកម្រិតទៀត ។
សូមបញ្ជាក់ថា វិស័យកីឡាគឺជាផ្នែកមួយយ៉ាងសំខាន់និងជាកំលាំងចលនាដ៏ខ្លាំងក្លាក្នុងការជួយជំរុញឲ្យសង្គមមានការអភិវឌ្ឍន៍រីកចម្រើន ។ ផ្អែកតាមទស្សនៈបែបនេះ រាជរដ្ឋាភិបាលកម្ពុជាបានខិតខំបំផុសចលនាមហាជនឲ្យចូលរួមគាំទ្រ និងលេងកីឡាទាំងអស់គ្នាដើម្បីសុខុមាលភាពនិងជម្រុះនូវភាពអសកម្មនានាក្នុងសង្គម រហូតដល់មានកីឡាករ ការិនីខ្លះមានសមត្ថភាពអាចដណ្ដើមបានមេដាយពីលើឆាកអន្តរជាតិថែមទៀតផង ៕
