ម្ចាស់ការពារតំណែងជើងឯកចាស់អេស្ប៉ាញបានធ្លាក់ត្រឹមវគ្គចែកពូលបន្ទាប់ពីប្រកួតចាញ់ឈីលី២-០ កាលពីយប់មិញខណៈដែលហូឡង់បានទម្លាក់អូស្ត្រាលីដូចគ្នាដោយបានយកឈ្នះក្នុងលទ្ធផល៣-២ ។ អេស្ប៉ាញបានបើកការវាយសម្រុកឈីលីយ៉ាងខ្លាំងប៉ុន្តែមិនទទួលបានលទ្ធផលឡើយផ្ទុយទៅវិញក្រុមឈីលី បែរជាមានឱកាសរកបានមួយគ្រាប់វិញនៅនាទីទី២០ដោយថ្វីជើងរបស់កីឡាករ អេឌូអាឌូ វ៉ាហ្គាស់ (Eduardo Vargas )។ ជិតនឹងបញ្ចប់តង់ទី១ទៅហើយនៅនាទីទី៤៣ ឈីលីរកបានមួយគ្រាប់ទៀតដោយកីឡាករ Charles Aranguiz (ឆាឡេស អារ៉េងហ្គីស) ។ ចប់តង់ទី១ ឈីលីនាំមុខអេស្ប៉ាញ២-០ ។ លុះចូលដល់តង់ទី២ក្រុមទាំងពីរ មិនអាចរកគ្រាប់បាល់បានទៀតនោះទេហើយរក្សាលទ្ធផលនេះរហូតបញ្ចប់ការប្រកួត ។
ដូចនេះបានន័យថា អេស្ប៉ាញ បានធ្លាក់ត្រឹមវគ្គចែកពូលចំណែកឈីលីឡើងទៅវគ្គបន្ត ។ ចំណែកឯជំនួបរវាងហូឡង់និងអូស្ត្រាលីវិញ ហូឡង់បានឡើងទៅវគ្គបន្តឯអូស្ត្រាលីជាក្រុមដែលត្រូវធ្លាក់ ។ ហូឡង់បានយកឈ្នះអូស្ត្រាលីក្នុងលទ្ធផល៣-២ដែល៣គ្រាប់នេះរកបានដោយកីឡាករ Arjen Robben នៅនាទីទី២០, កីឡាករ Robin van Persie (រ៉ូប៊ីន វ៉ាន់ ភើស៊ី) នៅនាទីទី៥៨ និងកីឡាករ Memphis Depay (មេមភីស ឌីផេ) នៅ
នាទីទី៦៨ ។ ដោយឡែក២គ្រាប់របស់អូស្ត្រាលីគឺរកបានដោយកីឡាករ Tim Cahill នៅនាទី២១ និងកីឡាករ Mile Jedinak (មីល ជេឌីណាក់) ស៊ុតប៉េណាល់ទីនាទីទី ៥៤ ។ គួរបញ្ជាក់ថា នៅពូលBនេះ ហូឡង់និងឈីលីចាប់ដៃគ្នាឡើងទៅវគ្គបន្តដោយមាន៣ពិន្ទុដូចគ្នាខណៈអេស្ប៉ាញនិងអូស្ត្រាលីត្រូវធ្លាក់ដោយមាន០ពិន្ទុ ៕