ខ្សែការពារឆ្វេងរបស់ក្រុមឡាទីនអឺរ៉ុបព័រទុយហ្គាល់កីឡាករ Fabio Coentrao (ហ្វាប៊ីអូ ខុនត្រាវ) នឹងត្រូវ បាត់បង់ឱកាសលេង World Cup សម្រាប់ការប្រកួតដែលនៅសេសសល់ទៀតហើយក្រោយពេលរូបគេបានរងរបួស ក្នុងជំនួបជាមួយឥន្ទ្រីដែកអាល្លឺម៉ង់ ។ Coentrao ត្រូវបានប្តូរចេញនៅតង់ទី២ក្នុងការប្រកួតដែលព័រទុយហ្គាល់ចាញ់អាល្លឺម៉ង់៤-០ដែលនេះជាបញ្ហា ដ៏ធំសម្រាប់ក្រុមក្រោយពេលខ្សែការពារ Pepe (ប៉េប៉េ) ក៏ត្រូវបានអជ្ញាកណ្តាលឲ្យកាតក្រហមបណ្តេញចេញ ពីការប្រកួតផងដែរ ។
ក្រោយពេលធ្វើការស្កេនពិនិត្យរួចមក សហព័ន្ធបាល់ទាត់ប្រទេសព័រទុយហ្គាល់បានប្រកាសថា “Coentrao នឹងត្រូវខកខានមិនបានចូលលេងបន្តទៀតនោះទេសម្រាប់ការប្រកួត World Cup ដែលនៅសេសសល់” ។ គួរបញ្ជាក់ថា ការប្រកួតបន្ទាប់របស់ព័រទុយហ្គាល់នឹងត្រូវជួបជាមួយអាមេរិកក្នុងទីក្រុងម៉ាណូសនៅថ្ងៃអាទិត្យ ៕