ព្រះស៊ីហនុ ៖ ចាប់ពីខែមករា រហូតដល់ខែមេសា ឆ្នាំ២០១៤ មានភ្ញៀវទេសចរណ៍មកលេងកម្សាន្តចំនួន៥៦៨១១៤នាក់កើនឡើងជាងឆ្នាំ២០១៣ចំនួន២៥.៩៧ភាគរយ (៣៤២២០៤) កន្លងទៅ។ នេះបើតាមការឲ្យដឹង ពីប្រធានមន្ទីរទេសចរណ៏ ខេត្តព្រះសីហនុ ។ ដោយក្នុងនោះ ភ្ញៀវទេសចរណ៍មកតាមនាវាចំនួន១៨នាវា ស្មើនឹង១០៣៦១នាក់ ភ្ញៀវទេសចរណ៍ មកតាមជើងហោះហើរ មានចំនួន១៣១ជើងស្មើនឹង៧៣៥០នាក់ ហើយភ្ញៀវទេសចរណ៍បរទេស ដែលចូលមកកម្សាន្តនាំមុខគេ គឺភ្ញៀវទេសចរណ៍ជនជាតិចិន និងវៀតណាម។
បច្ចុប្បន្ននៅលើទឹកដីខេត្តព្រះសីហនុ មានសណ្ឋាគារចំនួន៥៣កន្លែង ស្មើនឹង២៦៤៤បន្ទប់ ផ្ទះសំណាក់មានចំនួន១៨៤កន្លែង ស្មើនឹង២៦៧៦បន្ទប់ រួមនិងផ្ទះជួលមួយចំនួនផងដែរ ។ ភោជនីយដ្ឋានមានចំនួន៨៤កន្លែង កាស៊ីណូមានចំនួន៨កន្លែង ខារ៉ាអូខេមានចំនួន៨កន្លែង ឌីស្កូមានចំនួន៦កន្លែង ម៉ាស្សាមានចំនួន១៤កន្លែង និងទីតាំងផ្តល់ព័ត៌មានទេសចរណ៍ មានចំនួន១៥កន្លែង រួមនិងទូកតូចធំ សម្រាប់ដឹកភ្ញៀវដើរកម្សាន្ត តាមកោះចំនួន៤៤គ្រឿងផងដែរ ។
ដោយឡែកសម្រាប់ឆ្មេរសមុទ្រ មានប្រវែងសរុបចំនួន១៧១.៦២គីឡូម៉ែត្រ ក្នុងនោះមានឆ្នេរអូរឈើទាល ឆ្នេរសុខា ឆ្នេរលំហែកាយ ឆ្នេរអូរត្រេះ ឆ្នេរឯករាជ ឆ្នេរជ័យជំនះ ឆ្នេររាម ឆ្នេរព្រែកត្រែង ឆ្នេរកោះសំពោច រួមនិងឆ្នេរជាច្រើនទៀត នៅតាមបណ្តាកោះផងដែរ ។ អ្វីដែលមានដូចបានលើកឡើងខាងលើនេះ គឺជាសក្ដានុពលមួយដ៏សំខាន់ សំរាប់ខេត្តព្រះសីហនុ លើវិស័យទេសចរណ៍ ប៉ុន្តែទាំងនេះ គ្រាន់ជាតួលេខ
តែប៉ុណ្ណោះ រីឯឆ្នេរសមុទ្រ ដែលអាចផ្តល់ឲ្យភ្ញៀវមកលេងកម្សាន្ត ជាសាធារណបានមានចំនួនតិចតួចបំផុត មិនគ្រប់តម្រូវការភ្ញៀវទេសចរណ៍នោះទេ ជាពិសេសថ្ងៃឈប់សម្រាក ឬថ្ងៃបុណ្យជាតិ បុណ្យទានប្រពៃណីជាដើម ដោយសារតែឆ្នេរមួយចំនួនធំ ដូចជា(ឆ្នេរប្រាំជាន់ ឆ្នេរអូរត្រេះ ឆ្នេរព្រែកត្រែង រួមនិងឆ្នេរសំខាន់ៗមួយចំនួនទៀត) ត្រូវបានគ្រប់គ្រងដោយកម្មសិទ្ធិឯកជន ធ្វើរបងហ៊ុមព័ទ្ធបិទជុំជិត ទុកឲ្យនៅទំនេរចោលអស់ទៅហើយ មិនអនុញ្ញាតឲ្យមនុស្សចេញចូលទេ ។
អ្វីដែលបានលើកឡើង ដូចបានរៀបរាប់ខាងលើនេះ គឺជាការរំលឹកទៅដល់ថ្នាក់ដឹកនាំរាជរដ្ឋាភិបាល ឲ្យបានជ្រាបខ្លះៗ នៅអ្វីដែលបានកើតឡើង និងកំពុងកើតនៅលើទឹកដីខេត្តព្រះសីហនុ នាពេលបច្ចុប្បន្ន ដើម្បីមានវិធានការបន្ទាន់ឡើងវិញ នៅភាពអសកម្មនៃតំបន់ឆ្នេរ ដូចបានរៀបរាប់ខាងលើ ក្នុងគោលដៅអភិវឌ្ឍន៍លើវិស័យទេសចរណ៍ ជាមួយនឹងសក្តានុពលឆ្នេរសមុទ្រដែលមានស្រាប់ ។ គូរបញ្ជាក់ផងដែរថា
ប្រជាពលរដ្ឋរស់ នៅលើទឹកដីខេត្តព្រះសីហនុ បច្ចុប្បន្នចំនួន៥០ភាគរយ គឺសុទ្ធសឹងពឹងផ្អែកទាំងស្រុង រកប្រាក់ចំណូលចិញ្ចឹមជីវភាពគ្រួសារ ជាមួយនឹងភ្ញៀវទេសចរណ៍ ដែលរាប់បញ្ចូលចាប់ពីអ្នករត់តាក់ស៊ី ម៉ូតូឌុប អ្នកបំរើការងារ តាមភោជនីយដ្ឋាន ផ្ទះសំណាក់ និងសណ្ឋាគារជាដើម ៕
