ភ្នំពេញៈ ក្រោយកម្ពុជាទទួលបានសន្តិភាព ស្ថិរភាព មក ការអភិវឌ្ឍក៏មានដំណើរការទៅមុខ អ្នកវិនិយោគក៏បានមកបណ្តាក់ទុនរកស៊ីនៅកម្ពុជាជាហូរហែ ក្នុងនោះក៏មានផ្សារទំនើបនានាក៏កំពុងផុសឡើងព្រោងព្រាត ជាពិសេសនៅរាជធានីភ្នំពេញ។ ជាក់ស្តែងផ្សារទំនើប អ៊ីអន របស់ ជប៉ុន
នឹងបានបើកដំណើរការជាផ្លូវការនៅកម្ពុជា នៅថ្ងៃទី៣០ មិថុនា ខាងមុខ បន្ទាប់ពីដំណើរការសាងសង់អស់មួយឆ្នាំកន្លះដោយមានក្រុមហ៊ុនលក់ រាយដែលមានម៉ាកយីហោល្បីៗជាច្រើនទាំងក្នុងស្រុក និងអន្តរជាតិ ដែលក្រុមហ៊ុនលក់រាយសរុបដល់ ១៨៦ ក្រុមហ៊ុនក្នុងនោះក្រុមហ៊ុនក្នុងស្រុកមាន ៤២ ឯនោះ។
លោក Soichi Okazaki នាយកប្រតិបត្តិក្រុមហ៊ុន អ៊ីអន ខូអិលធីឌី ដែលជាក្រុមហ៊ុនមេរបស់ផ្សារទំនើប អ៊ីអន កម្ពុជា បានលើកឡើងពីកាលបរិច្ឆេទនៃការបើកសម្ពោធជាផ្លូវការនេះនៅក្នុងសន្និសីទសារព័ត៌មានរបស់ក្រុមហ៊ុនកាលពីថ្ងៃសៅរ៍ថា ក្រុមហ៊ុនបានចំណាយពេលសិក្សាពីសក្តានុពលទីផ្សារនៅ កម្ពុជា រយៈពេលបីឆ្នាំមុននឹងសម្រេចចិត្តដាក់ទុនវិនិយោគ ២០៥ លានដុល្លារក្នុងការបង្កើតផ្សារទំនើប អ៊ីអន នៅកម្ពុជានេះ។ ផ្សារទំនើប អ៊ីអន ដែលមានទីតាំងតាមបណ្តោយវិថី សុធារស ចន្លោះពីស្ថានទូត រុស្ស៊ី ប្រចាំនៅ កម្ពុជា ទៅសណ្ឋាគារ សូហ្វីតែល មានផ្ទៃដីសរុប ៦៨ ០០០ ម៉ែត្រការ៉េសាងសង់ឡើងដោយមានបួនជាន់ហើយមានផ្ទៃក្រឡាអគារសរុប ១០៨ ០០០ ម៉ែត្រការ៉េ។
ផ្សារទំនើបនេះអាចផ្តល់ឱកាសការងារដល់ប្រជាជនកម្ពុជា សរុបប្រមាណ ២ ៥០០ នាក់មានទីតាំងសម្រាប់ចតរថយន្តបានដល់ ១ ៤០០ គ្រឿង និង ម៉ូតូ ១ ៦០០ គ្រឿង។ យោងតាមបញ្ជីឈ្មោះក្រុមហ៊ុនដែលបានជួលទីតាំងនៅផ្សារទំនើប អ៊ីអន បានបង្ហាញថា ផ្សារទំនើបរបស់ ជប៉ុន នេះនឹងក្លាយជាបណ្តុំហាងទំនើបៗដែលមានយីហោជាលក្ខណៈអន្តរជាតិ ដូចជា ប្រភេទហាងលក់ម្ហូបអាហារ ហាងកាហ្វេ ហាងសម្លៀកបំពាក់គ្រឿងអេឡិចត្រូនិក ហាងបែបកម្សាន្ត និងរោងភាពយន្តជាលក្ខណៈអន្តរជាតិជាដើម៕
