រាជធានីភ្នំពេញ ៖ យុវម្នាក់ត្រូវបានក្រុមក្មេងស្ទាវមួយក្រុមមានគ្នាប្រមាណ១០នាក់ព្រួតគ្នាវាយយ៉ាងចាស់ដៃខណៈពេលចេញពីក្លិបកម្សាន្តមួយកាលពីវេលាម៉ោង២និង២០នាទីរំលងអាធ្រាត្រឈានចូលថ្ងៃទី១៨ខែកុម្ភៈឆ្នាំ២០១៤ តាមបណ្ដោយផ្លូវម៉ៅសេទុងកែងផ្លូវលេខ១១២ ស្ថិតក្នុងសង្កាត់ផ្សារដេប៉ូ៣ ខណ្ឌទួលគោក។ យុវជនរងគ្រោះខាងលើឈ្មោះ សុខ ជា អាយុ១៩ឆ្នាំមុខរបរជាបុគ្គលិករបស់ភោជនីយដ្ឋាន ម៉ាស្ទឺស៊ូគីស៊ុប ស្នាក់នៅក្នុងសង្កាត់កាកាប ខណ្ឌពោធិ៍សែនជ័យ បានរៀបរាប់ក្រុមអ្នកយកព័ត៌មានទាំងទឹកមុខភ័យស្លេកស្លាំងថា មុនពេលកើតហេតុរូបគេរួមជាមួយមិត្តភ័ក្តិប្រមាណ១៥នាក់បានចូលទៅ
កម្សាន្តមួយយីហោ ហាយស្កាយឌីស្កូក្លិប ហើយពួកគេបានចេញមកវិញចង់ត្រឡប់ទៅផ្ទះស្រាប់តែជិះមិនទាន់ចេញពីក្លិបបានឆ្ងាយផង ក៏មានក្រុមក្មេងស្ទាវមួយក្រុមជិះម៉ូតូស៊េរីទំនើបប្រហែលជា៦គ្រឿងប្រដាប់ទៅដោយអាវុធក្នុងដៃ ដូចជា ដាវ ដុំថ្ម និងខ្សែក្រវ៉ាត់ បានដេញតាមពួកគេនិងវាយពួកគេរហូតដល់គេភ័យពេករត់ចោលម៉ូតូរបស់ខ្លួនព្រោះគេមិនដឹងថាមានបញ្ហាអ្វី
ជាមួយក្រុមក្មេងស្ទាវនោះឡើយ។បន្ទាប់ពីកើតហេតុប្រហែល១០នាទីកម្លាំងកងរាជអាវុធហត្ថខណ្ឌទួលគោកបានចុះមកអន្តរាគមន៍ភ្លាមៗនៅកន្លែងកើតហេតុ និងនាំជនរងគ្រោះខាងលើនេះទៅធ្វើការសាកសួរនិងដាក់ពាក្យបណ្ដឹងនៅបញ្ជាការដ្ឋានកងរាជអាវុធហត្ថខណ្ឌទួលគោកផងដែរ៕