Dominic Solanke ហាក់ដូចជាមិនអាក់អន់ស្រពន់ចិត្តនឹងកង្វះឱកាសបង្ហាញមុខក្នុងក្រុមជម្រើស Liverpool ទេ ហើយមានទំនុកចិត្តលើវិធីសាស្ត្ររបស់លោក Jurgen Klopp ក្នុងការអភិវឌ្ឍខ្លួន។
ជម្រើសយុវជនអង់គ្លេសវ័យ២១ឆ្នាំរូបនេះបានបង្ហាញមុខ២៧លើក អំឡុង រដូវកាលទី១នៅពហុកីឡាដ្ឋាន Anfield និងបានបញ្ចប់យុទ្ធនាការដោយមានឱកាសបង្ហាញមុខក្នុងក្រុមជម្រើស១៨នាក់សម្រាប់ការប្រកួតវគ្គផ្តាច់ព្រ័ត្រក្របខណ្ឌឆេមពានលីកជាមួយក្រុម Real Madrid នាពេលកន្លងមក។ Solanke គឺជាកីឡាករដែលលោក Klopp កោតសរសើរ។
ប៉ុន្តែនៅរដូវកាលនេះ Solanke មិនស្ថិតក្នុងរង្វង់កីឡាករជម្រើសដំបូងទេ។ កីឡាកររូបនេះមិនទាន់បានបង្ហាញមុខក្នុងក្រុមជម្រើសឈុតធំរបស់ Liverpool នៅឡើយទេសូម្បីមួយនាទី ប៉ុន្តែធ្លាប់បង្ហាញមុខក្នុងការប្រកួតក្របខណ្ឌ Carabao Cup អំឡុងពេលប្រកួតជាមួយក្រុមចាស់ Chelsea កាលពីខែកញ្ញា។
Solanke គឺជាកីឡាករដែលសហព័ន្ធបាល់ទាត់អង់គ្លេសមានក្តីសង្ឃឹមខ្ពស់។ លោក Gareth Southgate បានផ្តល់ឱកាសដល់ Solanke បង្ហាញមុខក្នុងក្រុមជម្រើសជាតិឈុតធំលើកដំបូងកាលពីខែវិច្ឆិកាឆ្នាំមុន អំឡុងប្រកួតមិត្តភាពជាមួយក្រុមប្រេស៊ីល។ Solanke ធ្លាប់លើកបាល់មាសសម្រាប់ព្រឹត្តិការណ៍ប្រកួតយុវជនក្រោមអាយុ២០ឆ្នាំ។
ទោះបីជាយ៉ាងណា សហព័ន្ធបាល់ទាត់មានការបារម្ភ អំពីការវិវឌ្ឍរបស់កីឡាកររូបនេះដោយសារតែខ្វះឱកាសបង្ហាញមុខក្នុងការប្រកួត។ ប៉ុន្តែសម្រាប់ Solanke មិនយល់ដូច្នេះទេ ហើយសុខចិត្តទទួលយកការសម្រេចចិត្តរបស់គ្រូបង្វឹក ស្របពេលឃើញការរីកចម្រើនរបស់ក្រុម Liverpool ៕
