Manchester City ត្រៀមបន្តកិច្ចសន្យាថ្មីជាមួយ Samir Nasri ក្លិបមេឃខៀវ Manchester City ត្រៀមនឹងបន្តកិច្ចសន្យាថ្មីជាមួយកីឡាករ Samir Nasri នៅពេលដែលកីឡាកររូបនេះវិលត្រឡប់មកធ្វើការវឹកហាត់វិញ ។ មានពាក្យចចាមអារ៉ាមជាច្រើនបានលើកឡើងថា ក្លិបមេឃខៀវកំពុងតែមានគម្រោងចង់បន្តកិច្ចសន្យាថ្មីរយៈពេល៤ឆ្នាំទៀត
ជាមួយកីឡាករសញ្ជាតិបារាំងរូបនេះនៅពេលដែលកិច្ចសន្យារបស់គេត្រូវ បញ្ចប់នៅឆ្នាំក្រោយ ។ ថ្វីបើអតីតកីឡាកររបស់ក្លិបកាំភ្លើងធំ Arsenal រូបនេះទទួលបានជោគជ័យយ៉ាងខ្លាំងក្នុងការលេងក្រោមការដឹកនាំរបស់លោក Manuel Pellegrini នៅរដូវកាលមុនក៏ដោយប៉ុន្តែរូបគេ មិនមានឈ្មោះក្នុងក្រុមមាន់គកបារាំងសម្រាប់ការប្រកួត World Cup នោះទេ ។ គួរបញ្ជាក់ថា Nasri ចូលលេងឲ្យ Manchester City បានចំនួន១២៩ប្រកួតហើយស៊ុត បញ្ចូលទីបាន២២គ្រាប់បន្ទាប់ពីរូបគេផ្លាស់មក Man City កាលពីឆ្នាំ២០១១ក្នុងតម្លៃពលកម្ម ២៥ លានផោន ៕
