កំពង់ចាម: ស្របពេលដែលបងប្អូនប្រជាពលរដ្ឋ ក្នុងឃុំព្រាំងព្រះ ស្រុកព្រៃឈរ ខេត្តកំពង់ចាម កំពុងតែមានការខ្វះខាតទឹកសម្រាប់ប្រេីប្រាស់ ដោយសារអាកាសធាតុស្ងួតហួតហែង នាព្រឹកថ្ងៃទី២ ខែមេសា ឆ្នាំ២០១៩នេះ ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម អមដំណើរដោយមន្ត្រីពាក់ព័ន្ធ បានអញ្ជើញចុះធ្វើការប្រគល់អណ្តូងទឹក ចំនួន៤០អណ្តូង ជូនប្រជាពលរដ្ឋ សម្រាប់ប្រេីប្រាស់។ 
សូមបញ្ជាក់ផងដែរថា ក្នុងអំឡុងខែកុម្ភៈកន្លងទៅថ្មីៗនេះ ដោយសារតែក្នុងតំបន់ឃុំត្រពាំងព្រះ ស្រុកព្រៃឈរ ជួបការខ្វះខាតទឹក ឯកឧត្តម គួច ចំរើន អភិបាលខេត្តកំពង់ចាម បានឲ្យមន្ត្រីពាក់ព័ន្ធចុះធ្វើការសិក្សា ដើម្បីផ្តល់អណ្តូងទឹក ជូនបងប្អូនប្រជាពលរដ្ឋ ឲ្យទាន់តម្រូវការ ដោយសារតែតំបន់នេះ គ្មានប្រភពទឹក ប្រសិនបើមិនមានវិធានការជាបន្ទាន់នោះទេ ប្រជាពលរដ្ឋពិតជាពិបាកជាក់ជាពុំខាន និងដើម្បីស្របតាមប្រសាសន៍របស់ប្រមុខរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្តេចបានយកចិត្តទុកដាក់ចំពោះប្រជាពលរដ្ឋ ដែលនឹងអាចទទួលផលប៉ះពាល់ ដោយសារតែគ្រោះរាំងស្ងួត ហេតុនេះថ្នាក់ដឹកនាំនៅមូលដ្ឋាន ជាពិសេស ឯកឧត្តមគួច ចំរើន បានខិតខំ ស្វែងរកជំនួយ ពីអង្គការក្នុង ឬក្រៅរដ្ឋាភិបាលនានា ដើម្បីរិះរកមធ្យោបាយ ដោះស្រាយទឹកជូនពួកគាត់ ។
ជាក់ស្តែងនៅក្នុងពេលនេះផ្ទាល់ ឯកឧត្តម គួច ចំរើន អភិបាលខេត្តកំពង់ចាម បានអញ្ជើញសម្ពោធដាក់ឲ្យប្រើប្រាស់ជាផ្លូវការនូវអណ្តូង ទឹក ស្នប់ ចំនួន៤០អណ្តូង ដែលជាអំណោយរបស់អង្គការ CBN និងអង្គការកាកេហេ ជូនបងប្អូនប្រជាពលរដ្ឋ ក្នុងឃុំត្រពាំងព្រះ ស្រុកព្រៃឈរ ទុកសម្រាប់ប្រេីប្រាស់។ 
មានប្រសាសន៍នាឱកាសនោះដែរ ឯកឧត្តម គួច ចំរើន អភិបាលខេត្តកំពង់ចាម បានពាំនាំនូវប្រសាសន៍ សាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជូនដល់ប្រជាពលរដ្ឋនៅក្នុងឃុំត្រពាំងព្រះ ។ 
ថ្លែងក្នុងពិធីនោះដែរ ឯកឧត្តមអភិបាលខេត្ត ក៏បានសំណូមពរដល់បងប្អូនប្រជាពលរដ្ឋ ត្រូវយកចិត្តទុកដាក់ ក្នុងការតាមដានមើលចំពោះអគ្គិសនីដែល បានប្រើប្រាស់ហើយត្រូវបិទអោយបានត្រឹមត្រូវ បើពុំនោះទេ ដែលវាអាចទុស្សេ បង្កជាគ្រោះអគ្គិភ័យទៀតផង ដែលបណ្តាលឲ្យបាត់បង់ទ្រព្យសម្បត្តិរបស់យើង។
ជាមួយគ្នានោះឯកឧត្ដមអភិបាលខេត្ត ក៏បានអំពាវនាវដល់បងប្អូនប្រជាពលរដ្ឋទាំងអស់ ត្រូវបង្កើនការសហការចូលរួមជាមួយអាជ្ញាធរ និងសមត្ថកិច្ចជំនាញនៅក្នុងការអនុវត្តវិធានការបង្ការ ទប់ស្កាត់ ធ្វើយ៉ាងណា កុំឲ្យមានករណីគ្រោះ អគ្គិភ័យ កើតឡើង ជាពិសេស នារដូវក្ដៅនេះ ត្រូវបង្កើនការប្រុងប្រយ័ត្នគ្រប់ពេល ចំពោះរាល់ដើមហេតុទាំងឡាយ ដែលអាចបង្កឲ្យកើតមានគ្រោះអគ្គិភ័យ ដូចជាភ្លើងចង្រ្កាន ភ្លើងចង្កៀង ភ្លើងទៀនធូប ភ្លើងដុតសំរាម ភ្លើងកម្ទេចបារី ចរន្តអគ្គិសនី ផ្ទាំងសូឡា ហ្គាស ឧស័្មន និងរាល់វត្ថុផ្សេងៗទៀត ដែលងាយឆេះ និងងាយផ្ទុះឆេះជាដើម។
ឯកឧត្តមអភិបាលខេត្ត ក៏បានជំរុញឲ្យអាជ្ញាធរមូលដ្ឋានគ្រប់ផ្នែក គ្រប់ថ្នាក់ គ្រប់ជំនាញ ត្រូវយកចិត្តទុកដាក់ ត្រួតពិនិត្យជាប់ជាប្រចាំ អំពីបញ្ហាទឹកប្រើប្រាស់ និងស្រោចស្រព ជូនប្រជាពលរដ្ឋ ដើម្បីធានាបាននូវការប្រើប្រាស់គ្រប់គ្រាន់ នារដូវប្រាំងនេះផងដែរ ៕
