កំពង់ចាម: ឯកឧត្តម អ៊ុន ចាន់ដា អភិបាលខេត្តកំពង់ចាម អំពាវនាវសូមឲ្យមាតាបិតា ឬអាណាព្យាបាលសិស្ស ត្រូវយកចិត្តទុកដាក់ជំរុញ និងដាស់តឿនកូន-ចៅ ឲ្យខិតខំរៀនសូត្រ ទាំងក្នុងសាលា និងក្រៅសាលាឲ្យបានគ្រប់ពេលវេលា។
ការថ្លែងយ៉ាងដូច្នេះក្នុងក្នុងឱកាសដែលឯកឧត្ដមអភិបាលខេត្ត បានអញ្ជើញចូលរួមអបអរសាទរ និងលើកទឹកចិត្តដល់សិស្សពូកែ កីឡាករមានស្នាដៃល្អក្នុងការប្រកួតកីឡាជាតិ លើកទី១ ឆ្នាំ២០១៩ និងកីឡាករតេក្វាន់ដូ។
ឆ្លៀតក្នុងឱកាសនោះ ឯកឧត្ដម អ៊ុន ចាន់ដា អភិបាលខេត្តកំពង់ចាម បានថ្លែងការកោតសរសើរចំពោះថ្នាក់ដឹកនាំមន្ទីរអប់រំ យុវជន និងកីឡា ខេត្តកំពង់ចាម ដែលមានគំនិតផ្តួចផ្តើមរៀបចំធ្វើពិធីនេះឡើង ដើម្បីអបអរសាទរ និងលើកទឹកចិត្តចំពោះប្អូនៗជាសិស្សានុសិស្ស ដែលយកចិត្តទុកដាក់ខិតខំសិក្សារៀនសូត្របានពូកែ និងខិតខំប្រឹងប្រែងបញ្ចេញនូវទេពកោសល្យ និងបច្ចេកទេសរហូតដណ្តើមបានជ័យលាភី និងមេដាយ ជូនដល់សាលា មន្ទីរអប់រំ ក៏ដូចជាខេត្តកំពង់ចាមទាំងមូលផងដែរ។ នេះក៏ជាសារមួយសម្រាប់ដាស់តឿនដល់ស្មារតីប្អូនៗសិស្សានុសិស្សជំនាន់ក្រោយ ឲ្យមានការភ្ញាក់រឮកខិតខំប្រឹងប្រែងសិក្សារៀនសូត្រដោយយកគម្រូតាមបងៗជំនាន់មុន។
ឯកឧត្ដមអភិបាលខេត្ត បានថ្លែងបន្តថា ក្នុងអាណត្តិទី៦ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណា
ចក្រកម្ពុជា បានដាក់ចេញយុទ្ធសាស្ត្រចតុកោណដំណាក់កាលទី៤ ដោយបានចាត់ទុកការអភិវឌ្ឍធនធានមនុស្សជាអាទិភាពទី១ ហើយក្រសួងអប់រំ យុវជន និងកីឡាក៏បានប្តេជ្ញាចិត្តធ្វើឲ្យបានសម្រេចនូវមុំទី១ ស្តីពីការពង្រឹងគុណភាពអប់រំវិទ្យាសាស្រ្ត និងបច្ចេកវិទ្យា ដោយផ្តល់អាទិភាពលេីការយកចិត្តដាក់លើគ្របង្រៀន ការពង្រីកវិសាលភាពសាលាគ្រប់កម្រិត ការពង្រឹងអធិការកិច្ចគ្រប់ជ្រុងជ្រោយលើការគ្រប់គ្រងសាលារៀន ការជំរុញការអប់រំបច្ចេកទេសនៅមធ្យមសិក្សាទុតិយភូមិ ការអប់រំបំណិនឲ្យស្របតាមទីផ្សារការងារ ការអភិវឌ្ឍកម្មវិធីសិក្សា និងសៀវភៅសិក្សាគោលគ្រប់ជ្រុងជ្រោយ និងការត្រៀមប្រកួតកីឡាស៊ីហ្គេមឆ្នាំ២០២៣ ដែលព្រះរាជាណាចក្រកម្ពុជាយើងធ្វើជាម្ចាស់ផ្ទះ។
ឯកឧត្តមអភិបាលខេត្ត បានសង្កត់ធ្ងន់ថា ចំពោះមាតាបិតា ឬអាណាព្យាបាលសិស្ស ត្រូវយកចិត្តទុកដាក់ជំរុញ និងដាស់តឿនកូន-ចៅ ឲ្យខិតខំរៀនសូត្រ ទាំងក្នុងសាលា និងក្រៅសាលាឲ្យបានគ្រប់ពេលវេលា ត្រូវយកចិត្តទុកដាក់ក្នុងការអប់រំលើផ្នែកសីលធម៌រស់នៅប្រចាំថ្ងៃ ដើម្បីកុំឲ្យពួកគេក្លាយទៅជាក្មេងទំនើង ដែលដើរមិនចូលផ្ទះ ឬមិនចូលសាលា។ ជាពិសេសត្រូវអប់រំ និងតាមដានកូន-ចៅជាប្រចាំ កុំឲ្យពួកគេធ្លាក់ខ្លួនទៅប្រើប្រាស់ និងចែកចាយគ្រឿងញៀន និងអំពើអនាចារផ្សេងៗ ជាមួយគ្នានោះត្រូវគោរពច្បាប់ចរាចរណ៍ផ្លូវគោក បើជិះម៉ូតូត្រូវពាក់មួកសុវត្ថិភាព បើជិះរថយន្តត្រូវពាក់ខ្សែក្រវ៉ាត់គ្រប់ពេលធ្វើដំណើរផងដែរ ។
លោកលី ម៉េងសាន ប្រធានមន្ទីរអប់រំយុវជននិងកីឡាខេត្តកំពង់ចាម បានឲ្យដឹងថា ផ្នែកប្រឡងសិស្សពូកែ ជ្រើសរើសសិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងទី១២ សម័យប្រឡង ២២ មេសា ២០១៩ នៅខេត្តសៀមរាប លទ្ធផលទទួលបាន ថ្នាក់ទី៩ (ផ្នែកគណិតវិទ្យា) យុវសិស្ស ស៊ុន គឹមស្រល នៅវិទ្យាល័យ ន.រណឬទ្ធិ-គន្ធបុប្ផា ស្រុកព្រៃឈរ ជាប់ចំណាត់លេខ ៤។ និងថ្នាក់ទី១២ (ផ្នែកគណិតវិទ្យា) យុវសិស្ស សាន គឹមស័ង នៅវិទ្យាល័យព្រះសីហនុ ក្រុងកំពង់ចាម ជាប់ចំណាត់លេខ ១។
ដោយឡែកការប្រកួតកីឡាសិស្សថ្នាក់ជាតិលើកទី១ ចាប់ពីថ្ងៃទី១០ ដល់ថ្ងៃទី១៩ ខែមិថុនា ឆ្នាំ២០១៩នេះ ផ្នែកកីឡាវាយកូនឃ្លី កីឡាតេក្វាន់ដូ WT, កីឡាការ៉ាតេ និងកីឡាវាយសី នៅរាជធានីភ្នំពេញ លទ្ធផលទទួលបានមេដាយមាស ចំនួន០៤គ្រឿង មេដាយប្រាក់ ចំនួន០៦គ្រឿង និងមេដាយសំរឹទ្ឋ ចំនួន ១៦គ្រឿង សរុបចំនួន ២៦គ្រឿង ផ្នែកកីឡាវាយកូនខ្លី កីឡាតេក្វាន់ដូ WT, កីឡាការ៉ាតេ និងកីឡាវាយសី ផងដែរ ៕