ខេត្តកំពង់ធំ៖ ដោយយល់ឃើញថា វិស័យព្រៃឈើមានសារៈសំខាន់ណាស់ សម្រាប់ការរស់រាន្ទមានជីវិត របស់មនុស្សសត្វ ទើបរាជរដ្ឋាភិបាលបាន បានសម្រេចបង្កើតឲ្យសហគមន៍សម្រាប់ឲ្យប្រជាពលរដ្ឋដែលរស់ នៅក្នុងសហគមន៍ ចូលរួមការពារព្រៃឈើនិងអាស្រ័យផលក្នុងសហគមន៍ព្រមទាំងបន្តការដាំដុះនៅក្នុងសហគមន៍ ដែលសហគមន៍អូសោមបានបង្កើតជាប្រពៃណី ដាំកូនឈើប្រចាំឆ្នាំស្របពេលដែលពិធីបុណ្យរុក្ខទិវាដាំកូនឈើ៩ កក្កដាជារៀងរាល់ឆ្នាំ។
នៅព្រឹកថ្ងៃទី ១២ ខែកក្កដាឆ្នាំ ២០១៤នេះ សហគមន៍ព្រៃឈើអូសោម សហការជាមួយខណ្ទរដ្ឋបាលព្រៃឈើកំពង់ធំ ព្រមទាំងប្រជាពលរដ្ឋដែលរស់នៅក្នុងសហគមន៍ ជាង២០០នាក់បាន ចូលរួមដាំកូនឈើ ដែលមាន ប្រភេទឈើ កកោះ បេង គ្រញូង ក្រឡាញ់ ផ្តៀក នាងនួន ស្រល់ ធ្នង់ ឬស្សី ឈើទាល ជិត៩០០០ដើម លើផ្ទៃដី ១៥ហិចតា នៅក្នុងសហគមន៍អូសោម ស្ថិតនៅភូមិសាលាវិស័យ ឃុំសាលាវិស័យ ស្រុកប្រាសាទ បាល្ល័ង្គ ខេត្តកំពង់ធំ ក្រោមការចូលរួមដោយលោក គឹម ចន្ថា នាយរងអធិការដ្ឋានរដ្ឋបាលព្រៃឈើខាងជើងបឹង ទន្លេសាប លោក តិប ញាតា នាយខណ្ទរដ្ឋបាលព្រៃឈើកំពង់ធំ។ 
លោក ឡាង សារ៉ូ អភិបាលស្រុកប្រសាទបាល្ល័ង្គ បានមានប្រសាសន៍ណែនាំឲ្យប្អូនក្មួយ ចូលរួមការពារព្រៃឈើនិង ស្រឡាញ់ព្រៃឈើ ផ្សារភ្ជាប់និងធម្មជាតិនិងជម្រុញឲ្យ អង្គការមហាជនចូលរួមដាំកូនឈើ ក្នុងគោលដៅគាំទ្រ ដល់សកម្មភាពថែរក្សាព្រៃឈើ សត្វព្រៃ និង ជម្រុញឲ្យមានការដាំកូនឈើគ្រប់ប្រភេទឡើងវិញ ពីព្រោះថា ព្រៃឈើ ជាសរសៃឈាមកសិកម្ម ជាអាយុ ជីវិតរបស់ប្រជាកសិករ និងជាប្រភពនៃកំណើនសេដ្ឋកិច្ចជាតិ ដូច្នេះយើងត្រូវតែចូលរួមថែរក្សា ការពារព្រៃឈើនិងសត្វព្រៃ ដាំដើមឈើឲ្យបានគ្រប់គ្នា មន្ត្រីរាជការ អង្គការជាតិ និងអន្តរាជាតិ កងកម្លាំងប្រដាប់អាវុធ គ្រប់ប្រភេទ និងអាជ្ញាធរដែនដីគ្រប់លំដាប់ថ្នាក់ ត្រូវចូលរួមដាំដុះព្រៃឈើ និងថែរក្សាការពារព្រៃឈើ សត្វព្រៃឲ្យបានគង់វង្ស។ 
លោក គឹម ចន្ថា នាយរងអធិការខាងជើងបឹងទន្លេសាប បានមានប្រសាសន៍ថានេះជាចក្ខុវិស័យរយះពេលវែងរបស់រាជរដ្ឋាភិបាល នៅក្នុងកិច្ចការពារធនធានធម្មជាតិ និងបន្តការគាំទ្រដល់សហគមន៍ការពារព្រៃឈើ ព្រមទាំងបានកោតសរសើរយ៉ាងខ្លាំងចំពោះស្នាដៃ ដែលបានបង្ហាញឲ្យឃើញនូវលទ្ធផលជាដុំកំភួន ក្នុងការ អភិរក្សនិង ការគាំទ្រយ៉ាងសកម្មរបស់អង្គការបៃតង ក្នុងការដឹកនាំប្រជាសហគមន៍ឲ្យនាំគ្នាថែរក្សាព្រៃឈើ នៅក្នុងសហគមន៍ វាជាការពិតណាស់ ព្រៃឈើអាចខ្វះមនុស្សបាន តែមនុស្សមិនអាចខ្វះព្រៃឈើបាននោះទេ ព្រៃឈើមានសារៈសំខាន់ចំពោះមនុស្ស ចាប់តាំងពីកើត រហូតដល់ស្លាប់ ព្រមទាំងបានផ្តល់នូវប្រយោជន៍ ជាច្រើនដល់មនុស្ស តែមនុស្សបែរជានាំគ្នាបំផ្លាញព្រៃឈើ ដូច្នេះយើងទាំងអស់គ្នាត្រូវតែស្រឡាញ់ព្រៃឈើ និងបន្តការដាំដុះបន្តទៀត។
