កំពង់ធំ៖ ឯកឧត្តម សុខ លូ ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ធំ បានអញ្ជើញចូលរួមជាអធិបតីភាព ដឹកនាំកិច្ចប្រជុំត្រៀមរៀបចំទិវា០៨ឧសភាឆ្នាំ២០២០ ។ ពិធីនេះក៏មានការអញ្ជើញចូលរួមពីលោកលោកស្រីជាប្រធាន អនុប្រធានមន្ទីរជុំវិញខេត្ត កងកម្លាំងបញ្ជាការកទាំង៣ សាខាកាកបាទក្រហមកម្ពុជាខេត្តកំពង់ធំ និងអភិបាលក្រុង/ស្រុកទាំង០៩ ព្រឹកថ្ងៃចន្ទទី០៦កើត ខែពិសាខ ឆ្នាំជូត ទោស័ក ព.ស២៥៦៣ ត្រូវនឹងថ្ងៃទី២៧ ខែមេសា ឆ្នាំ២០២០ នៅសាលាខេត្តកំពង់ធំ។
ក្នុងឱកាសនោះឯកឧត្តម សុខ លូ មានប្រសាសន៍ផ្សព្វផ្សាយពីលិខិតលេខ ១៣៩ កក្រក.ទ.ទ ចុះថ្ងៃទី២០ ខែមេសា ឆ្នាំ២០២០ របស់កាកបាទក្រហមកម្ពុជា ស្ដីពីការកៀរងគររកមូលនិធិតាមបណ្ដាសាខា ក្នុងឱកាសអបអរសាទរខួបទី ១៥៧ ទិវាពិភពលោក កាកបាទក្រហម អឌ្ឍចន្ទក្រហម ០៨ឧសភាក្រោមប្រធានបទ(ខ្ញុំស្រឡាញ់សន្តិភាព ខ្ញុំស្រឡាញ់កាកបាទក្រហមកម្ពុជា)។ ការបង្កើតគណៈកម្មការរៀបចំការគៀងគររកមូលនិធិ និងអំណោយមនុស្សធម៌មានភារកិច្ចដូចជា÷១.រៀបចំធ្វើសេចក្តីអំពាវនាវ បណ្ដាខ្លឹមសារពាក់ព័ន្ធទិវា និងបែងចែកទៅតាមគោលដៅ។ ២.រៀបចំរូបថតផ្សព្វផ្សាយ ពីសកម្មភាពមនុស្សធម៌នៅកន្លែងទទួលអំណោយ។ ៣.ផ្សព្វផ្សាយបញ្ជ្រាបការយល់ដឹងតាមប្រព័ន្ធព័ត៌មាន អំពីសារៈសំខាន់ទិវា ០៨ ឧសភា។ ៤.រៀបចំលិខិតថ្លែងអំណរគុណជូនសប្បុរសជន។ ៥.រាយការណ៍សុំយោបល់គណៈកម្មការកណ្ដាលករណីចាំបាច់។ ៦.បូកសរុបលទ្ធផលកៀរងគររកមូលនិធិប្រចាំថ្ងៃនិងវគ្គបញ្ចប់ ជូនថ្នាក់ដឹកនាំ។
ជាចុងក្រោយឯកឧត្តម សុខ លូ បានសង្កត់ធ្ងន់ទៅលើការសម្អាតបរិស្ថាន សូមឱ្យថ្នាក់ដឹកនាំទាំងអស់ជំរុញផ្សព្វផ្សាយ ពីការសំអាតបរិស្ថាននៅក្នុងខេត្ត ក៏ដូចនៅតាមស្រុកដើម្បីឲ្យក្លាយទៅជាទីក្រុងស្អាត។ សម្រាប់ពលករដែលធ្វើចំណាកស្រុកសព្វថ្ងៃនេះត្រូវតែតាមដានគាត់ជាប្រចាំគ្រប់ពេលវេលាព្រោះគាត់ធ្វើដំណើរជាបន្តបន្ទាប់ដើម្បីបង្ការពីជំងឺកូវីដ-១៩ ៕
