ព្រះវិហារ៖ ក្រុមការងារចុះជួយឃុំស្រអែម ស្រុកជាំក្សាន្ត ខេត្តព្រះវិហារ រួមជាមួយអជ្ញាធរ ឃុំ ស្រុក នៅថ្ងៃទី២៩ខែតុលាឆ្នាំ២០២០នេះ បានរៀបចំកម្មវិធីប្រណាំងទូកខ្នាតតូចរយះពេល៣ថ្ងៃ ស្ថិតនៅអាងទឹកធម្មជាតិសម្តេចតេជោអូរស្វាយ ស្ថិតក្នុងភូមិធម្មជាតិសម្តេចតេជោ ឃុំស្រអែម ស្រុកជាំក្សាន្ត ខេត្តព្រះវិហារ ដើម្បីបង្ករការសប្បាយរីករាយជូនបងប្អូនប្រជាពលរដ្ឋ។
ពិធីនេះស្ថិតក្រោមវត្តមានឯកឧត្តម ជូ តុងអាន អនុប្រធានក្រុមការងារចុះជួយស្រុកជាំក្សាន្ត និងឃុំស្រអែម តំណាងឯកឧត្តម ស្រី ឌឹក ប្រធានក្រុមការងាររាជរដ្ឋាភិបាល ចុះជួយស្រុកជាំក្សាន្តនិងឯកឧត្តម ដួង សំនៀង ប្រធានក្រុមការងារចុះជួយឃុំស្រអែម ដោយមានការចូលរួមពីក្រុមការងារ និងអជ្ញាធរភូមិ ឃុំ ស្រុកជាច្រើនរូបទៀត។
ឯកឧត្តម ជូ តុងអាន ក៍បានថ្លែងដោយរំលឹកផងដែរថា៖ភូមិធម្មជាតិសម្តេចតេជោ ត្រូវបានរៀបចំកសាងឡើងដោយសម្តេចអគ្គមហាសេនាបតីតេជោហ៊ុន សែននាយករដ្ឋមន្ត្រីនៃកម្ពុជានិងសម្តេចកិត្តិព្រឹទ្ធបណ្ឌិតប៊ុន រ៉ានីហ៊ុនសែននៅឆ្នាំ២០០៨។ ចំណែកស្រះអាងទឹកធម្មជាតិសម្តេចតេជោអូរស្វាយដែលកំពុងរៀបចំប្រណាំងទូកនៅពេលនេះ ក៍ចាប់ផ្តើមកសាងឡើងតំណាលគ្នានិងភូមិធម្មជាតិសម្តេចតេជដែរ។
ឯកឧត្តម ជូ តុងអាន បានថ្លែងទៀតថា៖ ក្នុងអំឡុងឆ្នាំ២០១៤ពិធីអ៊ុទូកនេះ ក៍បានរៀបចំធ្វើឡើងផងដែរ ដោយកាលនោះយកពោះវៀនកង់ឡានមកឆ្នៃធ្វើជាទូក។ លុះឆ្នាំក្រោយៗទៀតបានទៅខ្ចី និងជួលទូកឈើពីកន្លែងផ្សេងៗ ដោយមានប្រវែងនិងទំហ៊ំមិនស្មើគ្នាទេ ប៉ុន្តែធ្វើយ៉ាងណាអោយបានអ៊ុប្រណាំងលេង ក្នុងគោលបំណងបង្កលក្ខណះអោយកូនចៅក្នុងតំបន់បានចូលរួមទស្សនាលេងសប្បាយនិងអភិរក្សវិសយ័កីឡាដែលជាកេរដំណែលពីដូនតា។
ឯកឧត្តមបញ្ជាក់ទៀតថា ទើបតែឆ្នាំនេះដោយមានការណែនាំចង្អុលបង្ហាញពីឯកឧត្តម ស្រី ឌឹក និងឯកឧត្តម ដួង សំនៀង និងមានការចូលរួមពីក្រុមការងារចុះជួយឃុំស្រអែម ទើបកម្មវិធីប្រណាំងទូកនេះ បានធ្វើឡើងយ៉ាងអធិកអធម។ ឯកឧត្តមជូ តុងអាន ក៍បានថ្លែងជម្រាបជូនបងប្អូនប្រជាពលរដ្ឋពីតម្លៃ នៃសន្តិភាព បើគ្មានសន្តិភាពយើងក៍គ្មានឱកាសជួបជុំគ្នាដោយសប្បាយរីករាយដែរ ជាមួយគ្នានោះត្រូវបន្តគាំទ្រសម្តេចតេជោហ៊ុន សែន ដើម្បីអោយសន្តិភាពស្ថិតស្ថេរគង់វង្សយូរអង្វែង ម្យាងទៀតត្រូវរក្សាអនាមយ័ក្នុងការរស់នៅ ពិសេសត្រូវការពារខ្លួនកុំអោយឆ្លងជំងឺកូវីដ១៩៕សួនលីណា
