រាជធានីភ្នំពេញ ៖ អគ្គិភ័យដ៏ធំមួយបានលេបត្របាក់លំនៅឋានដែលសង់ជាប់គ្នារដឹកលើផ្ទៃដី មួយកន្លែង ស្ថិតក្នុងភូមិទ្រា២ សង្កាត់ស្ទឹងមានជ័យ ខណ្ឌមានជ័យ ក្នុងរយៈពេល២ម៉ោង កាលពីវេលាម៉ោងជាង១១ព្រឹកថ្ងៃទី២៧ កក្កដា ឆេះគ្មានសល់ ប៉ុន្តែមិនមានមនុស្សណាម្នាក់រងគ្រោះក្នុងហេតុការណ៍នេះទេ ខណៈក្មេងពីរនាក់ត្រូវបានគេសង្គ្រោះបានទាន់ពេលវេលា។
ប្រភពព័ត៌មានពីកន្លែងកើតហេតុបានឱ្យដឹងថា ដំបូងគេឃើញផ្សែងខ្មៅខ្មួលខ្មាញ់ហុយចេញពីផ្ទះមួយខ្នងធ្វើអំពីឈើប្រក់សង្ក័សី ជញ្ជាំងឥដ្ឋ និងបង្កឱ្យមានអណ្តាតភ្លើងបានឆាបឆេះឡើងសន្ធោសន្ធៅហើយអ្នកស្រុកមិនមានលទ្ធភាពបាញ់ទឹកពន្លត់ភ្លើងបានឡើយបាន ត្រឹមតែរត់ រៀងៗខ្លួនគ្រប់ៗគ្នា។
ការសង់លំនៅឋានសង់ជាប់គ្នារដឹកអត់រៀបរយបែបនេះបានបណ្តាលឲ្យភ្លើងឆាបឆេះរាលដាលដល់លំនៅឋានផ្សេងៗទៀត យ៉ាងលឿនសរុបអស់៣៥ខ្នង ទើបរថយន្ដបាញ់ទឹកមកជួយពន្លត់ចុងក្រោយតែម្តង។ អ្នកស្រុកនៅកន្លែងកើតហេតុបានរិះគន់ដល់កងកម្លាំងសមត្ថកិច្ច នគរបាលនៃការិយាល័យពន្លត់ និងបង្ការគ្រោះអគ្គិភ័យរាជធានីភ្នំពេញថា ពេលមកដល់កន្លែងកើតហេតុភា្លមៗ នៅបង្អង់សិនមិនប្រញាប់បាញ់ពន្លត់ទេ ទុកឱ្យអណ្តាតភ្លើងឆាបឆេះសន្ធោសន្ធៅរាលដាលធ្ងន់ធ្ងរ ប៉ុន្តែ ចៅសង្កាត់ស្ទឹងមានជ័យ លោក សេង សាញ់ មានប្រសាសន៍ថា ដោយសារតែស្ថានភាពផ្លូវតូចចង្អៀត មិនមានច្រកសម្រាប់រថយន្តពន្លត់អគ្គិភ័យចូលបាញ់ទឹកពន្លត់បានតាម សម្រួលទេ ទើបអណ្តាតភ្លើងឆេះរាលដាលដល់លំនៅឋានឆាប់រហ័សបែបនេះ ។ 
លោកនិយាយថា ឆេះអស់ផ្ទះចំនួន៣៥ខ្នង គឺស្មើនឹង៦០គ្រួសារ ។ លោកវរសេនីយ៍ឯក នេត វន្ថា នាយការិយាល័យនគរបាលពន្លត់ និងបង្ការគ្រោះមហន្តរាយអគ្គិភ័យបានរៀបរាប់ថា ក្នុងឧប្បតិ្តហេតុខាងលើនេះ កម្លាំងរបស់លោកមិនមានចេតនាណាមួយមិនចង់ជួយសង្គ្រោះប្រជាពលរដ្ឋ ដូចមតិមួយចំនួនចោទប្រកាន់នោះទេ ។
លោកនិយាយថា ដោយសារតំបន់នោះស្មុគស្មាញផ្នែកប្រព័ន្ធច្រកចេញចូលសម្រាប់រថយន្ដ បាញ់ទឹកពន្លត់ភ្លើង។ លោក នេត វន្ថា បានឲ្យដឹងផងដែរថា អគ្គិភ័យបានចាប់ផ្តើមឆាបឆេះផ្ទះប្រជាពលរដ្ឋ ចាប់ពីម៉ោង ១១:៣០ នាទីព្រឹករហូតដល់ម៉ោង ១:១០ រសៀលទើបគ្រប់គ្រងស្ថានការណ៍បាន បន្ទាប់ពីមានការអន្តរាគមន៍ពីរថយន្តពន្លត់អគ្គិភ័យចំនួន ២៧ គ្រឿង ព្រោះនៅទីនោះផ្លូវចេញចូលតូចចង្អៀត ទោះជាយ៉ាងនេះក្តី កម្លាំងសមត្ថកិច្ចបានប្រើប្រាស់បច្ចេកទេសក្នុងការសង្គ្រោះ ដោយបាញ់ទឹកពន្លត់ភ្លើងរហូតប្រើប្រាស់ទឹកអស់ជាង៥០រថយន្ដឯណោះ។ ក្នុងនោះដែរ គ្រោះអគ្គិភ័យកន្លងមក បានសម្លាប់មនុស្ស៣នាក់និងរបួស៣នាក់ ។ 
លោកប្រធានការិយាល័យក៏បានអំពាវនាវដល់ប្រជាពលរដ្ឋទាំងអស់ឱ្យចូល រួមប្រុងប្រយ័ត្នបញ្ហាគ្រោះអគ្គិភ័យនេះឱ្យបានគ្រប់ៗគ្នា គឺដូចជាត្រូវមានឧបករណ៍បាញ់ពន្លត់អគ្គិភ័យនៅតាមលំនៅឋានជាដើម ដើម្បីបង្ការអគ្គិភ័យជាយថាហេតុ ។ ទាក់ទិននឹងមូលហេតុនៃគ្រោះអគ្គិភ័យនេះ មិនត្រូវបានដឹងភ្លាមៗទេ ដោយក្រុមមន្ដ្រីឱ្យដឹងថា រង់ចាំធ្វើការស្រាវជ្រាវសិន ដើម្បីរកមូលហេតុដែលបង្កពិតប្រាកដ ៕
