សៀមរាប៖ កុងត្រូលនៅតាមដងផ្លូវសេដ្ឋកិច្ចមួយចំនួននៃខេត្តសៀមរាបកំពុងបង្កភាពភ័យ ខ្លាចដល់ពលរដ្ឋ និង ភ្ញៀវទេសចរ ខណៈពួកគេបានធ្វើការបើករថយន្តប្រដេញដើម្បីទទួលលាភសក្ការៈ ហើយករណីនេះ ពលរដ្ឋស្នើឱ្យអជ្ញាធរមានចំណាត់ការទៅតាមផ្លូវច្បាប់។
អ្នកដឹកអុស និងធ្យូងលក់នៅតាមផ្លូវស្រុកសូទ្រនិគម បានប្រាប់ ថា ជារៀងរាល់ថ្ងៃគាត់តែងតែឃើញមានរថយន្ត និង ម៉ូតូបើកប្រដេញគ្នាយ៉ាង សស្រាក់ សស្រាំនៅតាមដងផ្លូវសាធារណៈ ដើម្បីជំរិតទាលុយពីអ្នករកស៊ី គ្រប់ប្រភេទ ដូចជា អ្នកដឹកអុសឬ ធ្យូងឡើយ ហើយក្រុមអ្នកបើករថយន្តប្រដេញទាំងនោះមិនដឹងជាជំនាញ ឬ អង្គភាព ខាងណាឱ្យពិតប្រាកដនោះទេ។ ជុំវិញការលើកឡើងពីក្តីកង្វល់របស់ពលរដ្ឋខាងលើនេះដែរ គាត់បានសំណូមពរ ឱ្យអា ជ្ញធរជុំវិញខេត្តមេត្តាតាមដាន និង ចាត់ការទៅតាមផ្លូវច្បាប់ចំពោះជនទាំងនោះផង ព្រោះពួក គេប្រព្រឹត្តិផ្ទុយពីបទបញ្ជារបស់ប្រមុខនៃរាជរដ្ឋាភិបាលកម្ពុជា។ ជាពិសេស ក្រុមទាំងនោះ កំពុងបង្កការភ្ញាក់ផ្អើលនិងភ័យខ្លាចដល់ពលរដ្ឋ និង ភ្ញៀវទេសចរដែលធ្វើដំណើរតាមដងផ្លូវ។
លោក ម៉ក់ ប្រុស អភិបាលស្រុកសូទ្រនិគម ស្តីទី បានប្រាប់តាមទូរស័ព្ទនៅរសៀលថ្ងៃទី២៩ខែកក្កដានេះថា បញ្ហា កុងត្រូលជជុះនៅតាមដងផ្លូវក្នុងដែនសមត្ថកិច្ចរបស់ស្រុកសូទ្រនិគមនេះ មានច្បាប់តែមួយកន្លែងទេ របស់ផ្នែករដ្ឋបាលព្រៃឈើជីក្រែងដែលមានមន្ត្រីរដ្ឋបាលព្រៃឈើឈ្មោះ រី ជាអ្នកប្រចាំការ ប៉ុន្តែជុំវិញករណីខាងលើនេះ លោក និង ធ្វើការអញ្ចើញមកសួរនាំនៅសាលាស្រុក។ លោកបន្តថា ចំពោះកន្លែងផ្សេងៗដែលគ្មានច្បាប់ទម្លាប់ហើយឈរជើងនៅទឹកដីស្រុកសូទ្រនិគម លោក និង ចាត់កម្លាំងឱ្យចុះបោសសំអាតដើម្បីឱ្យសមស្របទៅតាមបទបញ្ជារបស់ប្រមុខរាជ្ញរដ្ឋាភិបាល។
លោក ស៊ិក ប៊ុន ស៊ិន អភិបាលស្រុកស្វាយលើបានបំភ្លឺតាមទូរស័ព្ទនៅថ្ងៃដដែលនេះថា នៅស្រុកស្វាយលើ ស្នាក់ការដែលមានច្បាប់មានចំនួន២ របស់រដ្ឋបាលព្រៃឈើចំពោះកន្លែងផ្សេងៗទៀត លោក មិនបានដឹងនោះទេ ប៉ុន្តែលោក និង មានចំណាត់ការចំពោះទៅលើកន្លែងដែលអត់មានច្បាប់ទាំងនោះ។ ស្រដៀងគ្នានោះដែរលោក សូរ សុន អភិបាលស្រុកបន្ទាយស្រីបានប្រាប់ថា លោក និង ចុះល្បាតជាមួយ កម្លាំងប៉េអ៊ឹម ដើម្បីតាមដាន ភាព មិនប្រក្រតី ដែលកើតមាននៅក្នុងទឹកដីស្រុកបន្ទាយស្រី ដោយ ឡែក ចំពោះសមត្ថកិច្ចមួយ ចំនួនដែល ចុះមកគ្មានច្បាប់ទម្លាប់ លោក និង មានវិធានការទប់ស្កាត់ជាមិនខាន។
លោក ភូ សំអាត អភិបាលស្រុកប្រាសាទបាគង បានប្រាប់ថា នៅស្រុករបស់លោក មានស្នាក់ការមួយនៅកែងផ្លូវហាវ៉េ នោះមិនទាន់មានច្បាប់ទំលាប់ត្រឹមត្រូវនេះទេ ប៉ុន្តែគេគ្រាន់តែ ចាំឃ្លាំមើលបទល្មើសព្រៃឈើប៉ុណ្ណោះ ចំណែក ការដាក់កុងត្រូលដើម្បីតាមប្រម៉ាញ់នោះ លោក នឹងមានវិធានការ ប្រសិនបើមាន ករណីនេះមែន ។ បញ្ហាកុងត្រូលជជុះគឺជា បញ្ហាដ៏ក្តៅគគុកមួយ ដែលអាជ្ញធរមានសមត្ថកិច្ចគ្រប់លំដាប់ ថ្នាក់ គួរតែ មានវិធានការ ឱ្យបានតឹងតែង ចំពោះ ជនណា ដែលប្រព្រឹត្តិផ្ទុយពីបទបញ្ជារបស់ ប្រមុខនៃរាជរដ្ឋាភិបាល ហើយដើរធ្វើព្យុះ ធ្វើភ្លៀងតាមតែ អំពើចិត្ត ឱ្យវិលត្រឡប់ មករកភាពត្រឹមត្រូវណាមួយឡើងវិញ៕
