ត្បូងឃ្មុំ៖ កម្លាំងសង្កាត់រដ្ឋបាលជលផលត្បូងឃ្មុំ សហការជាមួយ កម្លាំងអាជ្ញាធរឃុំជីរោទិ៍ទី២ ប៉ុស្តិ៍រដ្ឋបាល និង សហគមន៍នេសាទសាមគ្គីវត្តឃ្មង់ ចុះបង្ក្រាប បទល្មើសនេសាទ ចំណុចបឹងក្រចាប់ ស្ថិតក្នុងឃុំជីរោទិ៍ទី២ ស្រុកត្បូងឃ្មុំ ខេត្តត្បូងឃ្មុំ នៅរសៀលថ្ងៃទី២៩ ខែកក្កដា ឆ្នាំ២០១៤ នេះ ។ 
លោក គឹម ដារិទ្ធ នាយសង្កាត់រដ្ឋបាលជលផលត្បូងឃ្មុំបានឲ្យដឹងថា បន្ទាបពីលោកទទួលព័ត៌មានថា មានបទល្មើសនេសាទ ចំណុចខាងលើភ្លាម លោកបានរាយការណ៍ទៅលោកនាយខណ្ឌរដ្ឋបាលជលផល ដើម្បីសុំគោលការណ៍បង្ក្រាបបទល្មើសជាក់ស្តែង មានការឯកភាព នឹង ដាក់បទបញ្ជា លោកបានដឹកនាំកម្លាំងសហការខាងលើចុះបង្ក្រាប ជាលទ្ធផល កម្លាំងរឹបអូសដកហូតយកវត្ថុតាងបាន រួមមាន លូរស្បៃមុងចំនួន
១៦មាត់ របាំងស្បៃមុងប្រវែង២៦០០ម៉ែត្រ បង្គោលចំនួន១៨២ដើម និងលែងកូនត្រីចំរុះក្នុងបឹងធម្មជាតិជាង២០គីឡូក្រាមផងដែរ ។ លោកនាយបានបន្តទៀតថា ជាទិសដៅសង្កាត់រដ្ឋបាលជលផលត្បូងឃ្មុំ នឹងបង្ក្រាបបទល្មើស ដាក់របាំងស្បៃមុង និង លូរស្បៃមុង យ៉ាងក្តៅគគុកជាបន្តបន្ទាប់ថែមទៀត ៕ សាន វិឡែម ២៩.០៧.២០១៤
