កំពង់ចាម៖ លោក រិទ្ធ សារី នាយករងរដ្ឋបាលសាលាស្រុកបាធាយ នៅព្រឹកថ្ងៃទី17 ខែមីនា ឆ្នាំ2021នេះ បានឲ្យដឹងថា÷ លោក យួន វណ្ណៈ អាយុ 51ឆ្នាំ មានតួនាទី អនុប្រធានការិយាល័យ សង្គមកិច្ច និងសុខមាលភាពសង្គម ប្រពន្ធឈ្មោះ ជា ស្រីមុំ រស់នៅភូមិ-ឃុំ-ស្រុកបាធាយ ខេត្តកំពង់ចាម បានជាប់ពាក់ព័ន្ធនិងកូនប្រុសបង្កើតដែលមានផ្ទុក វិជ្ជមានកូវីដ-19។
លោក រិទ្ធ សារី បន្តថា÷ នៅព្រឹកថ្ងៃទី17 ខែមីនា ឆ្នាំ2021នេះ លោក យួន វណ្ណៈ បានមករាយការណ៌ដល់រដ្ឋបាលស្រុកបាធាយថា÷ កាលពីថ្ងៃទី 12 ខែមីនា ឆ្នាំ2021 កូនប្រុសរបស់គាត់ម្នាក់ឈ្មោះ មាន សុវណ្ណណែត អាយុ 20ឆ្នាំ ធ្វើការនៅភ្នំពេញ ហើយពួកគាត់ទាំងពីរនាក់ឪពុកកូនបានជួបប្រាស្រ័យទាក់ទងគ្នានៅកន្លែងធ្វើការរបស់ សុវណ្ណណែត នៅភ្នំពេញ ហើយពេលនោះ សុវណ្ណណែត មិនបានមកស្រុកជារូបគាត់ទេ ប៉ុន្តែគេបានផ្ញើរលុយសម្រាប់ចងដៃការបងប្អូនតាមរយៈរូបគាត់ជាឪពុក។ លុះដល់យប់ថ្ងៃទី16 ខែមីនា ឆ្នាំ 2021 សុវណ្ណណែត បានទូរស័ព្ទមកប្រាប់រូបគាត់ថា សុវណ្ណណែត មានផ្ទុកវិជ្ជមានកូវីដ-19 ហើយពេលនេះគេកំពុងសម្រាកព្យាបាលនៅសណ្ឋាគារមួយនៅភ្នំពេញ។
បន្ទាប់ពីទទួលបានព័ត៌មាននេះពីអាជ្ញាធរស្រុកបាធាយ ភ្លាមៗនោះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានគណៈកម្មការខេត្ត ប្រយុទ្ធប្រឆាំងនឹងជំងឺកូវីដ-19 លោកបានចាត់ឲ្យអាជ្ញាធរស្រុក និងមន្ត្រីសុខាភិបាលចុះទៅដល់ផ្ទះរបស់លោក យួន វណ្ណៈ ដើម្បីធ្វើការសាកសួរព័តមានបន្ថែម ជាពិសេសអ្នកពាក់ព័ន្ធក្នុងកំឡុងពេលដែលលោក យួន វណ្ណៈ មកពីជួបកូនប្រុសរបស់គាត់វិញ។
ខណៈនោះ លោក យួន វណ្ណៈ បានប្រាប់ឲ្យអាជ្ញាធរដឹងថា រូបគាត់មិនបានទៅដើរលេងខាងក្រៅទេ ទងកាលនៅភ្នំពេញ និងពេលមកដល់ស្រុកបាធាយវិញ ប៉ុន្តែធ្លាប់បានទៅជួយលក់ដូរប្រពន្ធក្នុងមន្ទីរពេទ្យបង្អែក ស្រុកបាធាយ និងទៅធ្វើការនៅការិយាល័យរបស់គាត់នៅសាលាស្រុកបាធាយ។
លោក យួន វណ្ណៈ បន្តថា ចំពោះអ្នកដែលប្រាស្រ័យទាក់ទងជិតស្និទ្ធ ជាមួយរូបគាត់គឺមានតែអ្នកស្រី ជា ស្រីមុំ ដែលជាប្រពន្ធរបស់គាត់ ក្រៅពីនោះមានមនុស្សមានមនុស្សប្រហែល30នាកផ្សេងទៀត បានប្រាស្រ័យទាក់ទងដោយប្រយោលប៉ុណ្ណោះ។
ដោយឡែកអ្នកពាក់ព័ន្ធ ក្នុងចន្លោះថ្ងៃទី12 ដល់ថ្ងៃទី17 ខែ មីនា ឆ្នាំ2021 តាមរយៈនៃការស្រាវជាវរបស់អាជ្ញាធរបានរកឃើញថា អ្នកពាក់ព័ន្ធនិងឈ្មោះខាងលើមានសរុប 51នាក់ ក្នុងនោះមន្ត្រីរាជការសាលាស្រុក 30នាក់ និងអ្នកពាក់ព័ន្ធជាមួយអ្នកស្រី ជា ស្រីមុំ មាន21 នាក់ ហើយពេលនេះ អ្នក51 នាក់ខាងលើ ត្រូវបានអាជ្ញាធរ និងមន្ត្រីសុខាភិបាលតម្រូវឲ្យធ្វើចត្តាលីស័ក នៅតាមផ្ទះរៀងៗខ្លួន ក្រោមការជួយឧបត្ថម្ភ ជ្រុំជ្រែង ពីគណៈកម្មការខេត្ត ប្រយុទ្ធប្រឆាំងនឹងជំងឺកូវីដ-19 ដែលមានឯកឧត្តម អ៊ុន ចាន់ដា អភិបាលនៃគណៈអភិបាល ខេត្តកំពង់ចាម ជាប្រធាន។
សូមជម្រាបថា÷ មកដល់ពេលនេះ អ្នកទាំងពីរនាក់ប្តីប្រពន្ធ ត្រូវបានអាជ្ញាធរ និងមន្ត្រីសុខាភិបាលបញ្ជូនទៅធ្វើចត្តាឡីស័ក រយៈពេល14ថ្ងៃ នៅមណ្ឌលចត្តាឡីស័កកម្រិត2 ក្រុងកំពង់ចាម៕
