ខេត្តសៀមរាប៖ សាលាកុដ្ឋិមួយខ្នង និងសមទ្ធិផលក្នុងវត្តអារញ្ញគីរីមុនីសុខុមហៅវត្តស្វាយលើស្ថិតនៅភូមិ ជប់លើឃុំស្វាយលើស្រុកស្វាយលើខេត្តសៀមរាប ត្រូវបានធ្វើពិធីបុណ្យសម្ពោធឆ្លង ក្រោមអធិបតីភាពរបស់ឯ.ឧ នូ ផល្លាអភិបាលស្តីទីខេត្តសៀមរាប នាព្រឹកថ្ងៃទី២០ ខែ កុម្ភះ ឆ្នាំ២០១៤ ដោយមានការនិមន្ត អញ្ជើញចូលរួម ពីលោកគ្រូព្រះបាល័ត ខេត្ត និងព្រះភិក្ខុសង្ឃ អស់លោក លោកស្រី ជាក្រុមការងារខេត្ត ក្រុមប្រឹក្សា អាជ្ញាធរស្រុក ឃុំ លោកគ្រូ អ្នកគ្រូ និងសិស្សានុសិស្ស សីលវ័ន្ត សីលវតី ពុទ្ធបរិស័ទចំណុះជើងវត្ត និង ប្រជាជនជាច្រើនកុះករផងដែរ ។ ក្នុងកិច្ចស្វាគមន៍របស់លោក ស៊ិក ប៊ុនស៊ិន អភិបាលនៃគណៈអភិបាលស្រុកស្វាយលើ ក៏បានឲ្យដឹងថា នៅក្នុង ស្រុកស្វាយលើទាំងមូល មានវត្តចំនួន ១៧ មានព្រះសង្ឃសរុប១៣៧អង្គ ក្នុងនោះភិក្ខុ ៥៧អង្គសីលវ័ន្ត សីលវតី៤២នាក់ អាចារ្យ ៣១នាក់ និង គណៈកម្មការវត្ត ៤៣នាក់ ។
លោកបានបញ្ជាក់ថា វត្តស្វាយលើនេះបានកកើតឡើង នៅឆ្នាំ១៨៩៦ តែដោយសង្គ្រាម និង ក្នុងរបបប្រល័យពូជសាសន៍ ត្រូវបានបំផ្លិចបំផ្លាញដោយយកទីវត្តនេះធ្វើជារោង បាយ និង មន្ទីរឃុំឃ្លាំង ។ ក្រោយថ្ងៃជ័យជំនះ ៧មករា ១៩៧៩ ទីវត្តនេះត្រូវបានកសាងឡើងវិញសម្រាប់ជាទីសក្ការៈ របស់ព្រះសង្ឃ និង បងប្អូនពុទ្ធបរិស័ទគោរពបូជា ។
នៅឆ្នាំ២០១១ ដែលមានឯ.ឧឃឹម ប៊ុនសុងឯ.ឧតាន់ ថាន់ណាព្រមទាំងក្រុមការងារខេត្តចុះជួយស្រុក និងបងប្អូនសប្បុរសជន ពុទ្ធបរិស័ទជិត ឆ្ងាយ បានកសាងកុដ្ឋិថ្មីមួយនេះឡើង ដែលមានបណ្តោយ ២៦ម៉ែត្រទទឹង ១០ម៉ែត្រ មានកំពស់ ២ជាន់ ធ្វើអំពីថ្ម ប្រក់ក្បឿង ដែលសាងសង់អស់ថវិកាសរុប ចំនួន៩៨ពាន់៣៨៩ដុល្លា ។
មានប្រសាសន៍សំណេះសំណាលនោះឯ.ឧ នូ ផល្លា ក៏បានបញ្ជាក់ថា ក្នុងចន្លោះឆ្នាំ ១៩៧៥ ដល់១៩៧៩ កម្ពុជា ត្រូវបានធ្លាក់ទៅក្នុងយុគ្គសម័យដ៏ខ្មៅងងឹត និង ជូរចត់ក្នុងប្រវត្តិសាស្ត្រ កម្ពុជា នៃរបប បនប្រល័យពូជ សាសន៍ ប៉ុល ពត ធ្វើឲ្យរចនាសម្ព័ន្ធជាតិ ត្រូវ បានបំផ្លិចបំផ្លាញទាំងស្រុង ក្នុងនោះក៏ មានរចនាសម្ព័ន្ធ ព្រះពុទ្ធសាសនាត្រូវបានកំទេចស្ទើរគ្មានសល់ ព្រមទាំងបានប្រែក្លាយទីវត្តអារាម ដែលជាទីសក្ការៈគោរព បូជា ទៅជាឃ្លាំង ជង្រុកស្រូវ និង មន្ទីរឃុំឃាំង និងកន្លែងសម្លាប់មនុស្ស ។
ឯ.ឧ នូ ផល្លា ក៏បានលើកផងដែរថា ក្រោយជ័យជំនះ ៧មករា១៩៧៩ ក្រោមកិច្ចដឹកនាំរបស់សម្តេចអគ្គមហាទាំងបី ក្រោមកិច្ចដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី បានស្តារ និង ធ្វើឲ្យវិស័យ ព្រះពុទ្ធសាសនាមានការអភិវឌ្ឍន៍ រីកចម្រើន ហើយត្រូវរដ្ឋធម្មនុញ្ញថាជា សាសនារបស់រដ្ឋ។ សមទ្ធិផលនេះ ក៏សបញ្ជាក់ ឲ្យឃើញ ពីភាពរីកចម្រើន និង ស្ថិតស្ថេរគង់វង្ស នៃវិស័យព្រះពុទ្ធសាសនា នៅព្រះរាជាណាចក្រកម្ពុជា ។
ឯកឧត្តមអភិបាលខេត្តស្តីទី ក៏បានបញ្ជាក់ផងដែរថាក្រោមកិច្ចដឹកនាំប្រកបដោយគតិបណ្ឌិតដ៏ខ្ពង់ខ្ពស់សម្តេចទាំងបី ពិសេសក្រោមគោលនយោបាយឈ្នះៗរបស់សម្តេចតេជោ ហ៊ុន សែន នាយករដ្ឋមន្ត្រី បានធ្វើឲ្យតំបន់សមរភូមិប្រយុទ្ធ ប្រែក្លាយ ជាតំបន់អភិវឌ្ឍន៍លើ គ្រប់វិស័យ ពិសេសនៅក្នុងភូមិសាស្ត្រស្រុកស្វាយលើ ដែលជាសមរភូមិក្តៅនាសម័យសង្គ្រាមកាលជាង១៧ឆ្នាំមុននេះ។
ក្នុងនោះដែរ ឯកឧត្តមក៏បានលើកឡើងពីសកម្មភាព នយោបាយចាស់ សកម្មភាពថ្មីរបស់រាជរដ្ឋាភិបាល ក្នុងការផ្តល់កម្មសិទ្ធិដីធី្ល ជូនដល់ ប្រជាជន ដែលធ្វើឡើងដោយក្រុមយុវជនស្ម័ត្រចិត្តសម្តេចតេជោ ពិសេសបងប្អូនប្រជាជននៅស្រុកស្វាយលើនេះតែម្តង ។ ឯ.ឧនូ ផល្លាក៏បានលើកផងដែរថាសមទ្ធិផលនេះ ក៏កើតឡើងដោយកម្លាំងមហាសាមគ្គី សំដៅទ្រទ្រង់ព្រះពុទ្ធសាសនា ឲ្យ ស្ថិតស្ថេរ រីកចម្រើនទៅតាមស្ថានភាពសង្គមជាតិ ហើយទីវត្តអារាម ក៏ជាទីជំរកអប់រំរិយាធម៌ ដល់ពុទ្ធបរិស័ទ យុវជន ដែលជាទំពាំងស្នងឬស្សី និង ជាឱកាសល្អ ក្នុងការរួបរួមគ្នា ដើម្បីថែរក្សាការពារ សេចក្តីសុខសាន្ត សង្គមជាតិ ដោយប្រកាន់យកព្រះពុទ្ធឱវាទជាប្រទីបបំភ្លឺផ្លូវ ក្នុងការអប់រំសីលធម៌ ចរិយាធម៌ សេចក្តីថ្នៃថ្នូរ សមនឹងទស្សនៈ ដែលថា ព្រះពុទ្ធសាសនាជាកម្លាំងដឹកនាំចរិយាធម៌សង្គម ក្នុងការលុបបំបាត់អំពើហិង្សាសង្គម ។
ព្រមទាំងបានផ្តាំផ្ញើដល់អាជ្ញាធរគ្រប់ជាន់ថ្នាក់ ទាំងព្រះភិក្ខុសង្ឃ និង ពុទ្ធបរិស័ទ ត្រូវធ្វើការអភិវឌ្ឍន៍ទីវត្ត បណ្តុះបណ្តាលធនធានមនុស្ស ទាំងផ្លូវពុទ្ធចក្រ និង អាណាចក្រ ពិសេសការពង្រីកនូវវិស័យពុទ្ធកៈសិក្សា អភិវឌ្ឍន៍ អភិរក្សនូវវប្បធម៌ ប្រពៃណី ទំនៀមទំលាប់របស់ជាតិ ដោយស្រុកស្វាយលើ ក៏ជាចំណាប់អារម្មណ៍របស់ភ្ញៀវទេសចរណ៍ជាតិ អន្តរជាតិដែលមានប្រាង្គប្រាសាទ និង រមណីយដ្ឋានធម្មជាតិភ្នំគូលែនជាដើម។ ដើម្បីការភ្ជាប់និក្ស័យក្នុងពុទ្ធសាសនានៅស្រុកស្វាយលើនេះឯ.ឧ នូ ផល្លា ក៏បានប្រគេននូវបច្ច័យចំនួន ១លានរៀល ដើម្បីសម្រាប់ប្រើប្រាស់នៅក្នុងពិធីធ្វើបុណ្យឆ្លងនេះផងដែរ ។
បន្តមកគណៈអធិបតី បាននិមន្ត និងអញ្ជើញកាត់ខ្សែបូរជានិមិត្តរូប បើកសម្ពោធកុដ្ឋិថ្មីនេះប្រគេនដល់ព្រះសង្ឃ និងពុទ្ធបរិស័យ បានប្រើប្រាស់ជាផ្លូវការក្នុងវិស័យព្រះពុទ្ធសាសនា ចាប់ពីថ្ងៃនេះតទៅ ព្រមទាំងបានរៀបចំធ្វើពិធីឆ្លងសាលាទៅតាមគន្លងប្រពៃណីសាសនាផងដែរ ៕