ភ្នំពេញ ៖ រថយន្តឡិចស៊ីស GS300មួយគ្រឿងបានបើកលឿនដូចហោះទៅបុកនិងខឿនផ្លូវបណ្តាលខ្ទេចមួយកំណាត់មុខទាំងស្រុងសំណាងល្អអ្នកជិះក្នុងរថយន្តនមិនមាននណាម្នាក់រងរបួសនោះទេ។ ហេតុការណ៍នេះកើតឡើងកាលពីវេលាម៉ោង ២និង៥នាទីរំលងអាធ្រាត្រឈានចូល ថ្ងៃទី
៨ សីហា ២០១៤នៅលើកំណាត់ផ្លូវជាតិលេខ៦A ត្រោយខាងកើតស្ពានជ្រោយចង្វា ស្ថិតក្នុងសង្កាត់ជ្រោយចង្វា ខណ្ឌជ្រោយចង្វា ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុរថយន្តឡិចស៊ីសGS300 មួយគ្រឿងពណ៌ទឹកប្រាក់ អត់មានពាក់ស្លាកលេខ ដែលជិះដោយមនុស្សប្រុស-ស្រី៤នាក់ក្នុងនោះ បុរស៣នាក់ជាជនជាតិថៃ និងនារីខ្មែរម្នាក់ បានធ្វើដំណើរយ៉ាងលឿនតាមផ្លូវជាតិលេខ៦A ក្នុងទិសដៅពីកើតមកលិច ខណៈមកកន្លែងកើតហេតុ រថយន្តបានបើកឆ្វែលរង្វង់មូល និងបានហោះទៅបុកខឿនផ្លូវតែម្តង បណ្តាលឱ្យរថយន្តរងការខូចខាតមួយកំណាត់មុខទាំងស្រុង ប៉ុន្តែសំណាងល្អអ្នកជិះក្នុងរថយន្តទាំងអស់ពុំមានអ្នករងរបួសនោះទេ។
ក្រោយពេលកើតហេតុសមត្ថកិច្ចបានចុះមកវាស់វែងកន្លែងកើតហេតុ ដោយយករថយន្តរងការខូចខាតខាងលើទៅកាន់ការិយាល័យ ចរាចរផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីធ្វើការដោះស្រាយតាមផ្លូវច្បាប់ ៕
