សៀមរាប ៖ ជនសង្ស័យភេទប្រុសទាំងពីរនាក់នេះ ១ មានឈ្មោះ ភាព លី អាយុ ១៧ ឆ្នាំ ២ ឈ្មោះ រឿន សុភ័ក្ត្រា ហៅ ភិន អាយុ ២១ ឆ្នាំ ជនសង្ស័យទាំងពីរមានទីលំនៅក្នុងភូមិ ជ្រៃ ឃុំ កណ្តែក ស្រុក ប្រាសាទបាគង ខេត្តសៀមរាប ។ ត្រូវបានសមត្ថកិច្ចធ្វើការចាប់ឃាត់ខ្លួនបានជាបន្តបន្ទាប់រួចយកមកកាន់ការិយាល័យនគរបាលជំនាញដើម្បីធ្វើការសួនាំជាប់ពាក់ព័ន្ធក្នុងករណីប្រើប្រាស់និងជួញដូរគ្រឿងញៀនខុសច្បាប់ ។
លោកវរសេនីយ៍ទោ អ៊ុំ សាអាត នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបបានឲ្យដឹងថាដោយអនុវត្តជាប្រចាំតាមការយកចិត្តទុកដាក់ខ្ពស់ពីសំណាក់លោក ឩត្តមសេនីយ៍ទោ សត ណាឌីស្នងការនគរបាលខេត្តសៀមរាបក៏ដូចជាដើម្បីធ្វើឲ្យការអនុវត្តនូវគោលនយោបាយភូមិឃុំមានសុវត្ថិភាពឲ្យកាន់តែមានប្រសិទ្ធភាពខ្ពស់ ។ 
ជាក់ស្តែងនៅថ្ងៃទី១១ខែសីហាឆ្នាំ២០១៤កន្លងទៅកម្លាំងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបបានសហការណ៍ជាមួយកម្លាំងនៃអធិការដ្ឋាននគរបាលស្រុកប្រាសាទបាគងខេត្តសៀមរាបបានធ្វើការតាមដានស្រាវជ្រាវនិងឈានដល់ការបង្ក្រាបចាប់ឃាត់ខ្លួនជនសង្ស័យភេទប្រុសទាំង២នេះបាន តែម្តង។
ក្នុងកិច្ចចុះប្រតិបត្តិការណ៍ខាងលើសមត្ថកិច្ចបានបន្តឲ្យដឹងទៀតថាបន្ទាប់ពី សមត្ថកិច្ចជំនាញបានធ្វើការចាប់ឃាត់ខ្លួនជនសង្ស័យបានហើយនោះនៅមុខសមត្ថកិច្ចជនសង្ស័យបានឆ្លើយសារភាពថាពួកគេពិតជាបានប្រព្រត្តឹនៅករណីទាំងអស់ខាងលើពិតប្រាកដមែនដោយសមត្ថកិច្ចបានធ្វើការដកហូតបាននូវគ្រឿងញៀនប្រភេទម៉ាទឹកកក ១ កញ្ចប់តូច ដែលមានទម្ងន់ ០ , ៥ ក្រាម និង ឩបករណ៍ច្នៃជក់គ្រឿងញៀនខុសច្បាប់មួយចំនួនទៀត ។ បច្ចុប្បន្នជនសង្ស័យនិងវត្ថុតាងត្រូវបានសមត្ថកិច្ចកសាងសុំណុំរឿងបញ្ជូនទៅកាន់សាលាដំបូងខេត្តសៀមរាបហើយកាលពីព្រឹកថ្ងៃទី១៣ខែសីហាឆ្នាំ២០១៤នេះដើម្បីចំណាត់ការទៅតាមនិតិវិធីបន្ត ៕ ដោយខេង ខេមរា
