សៀមរាប៖ យោងតាមប្រភពបានឲ្យដឹងថា កម្លាំងសមត្ថកិច្ចចម្រុះដឹកនាំដោយតំណាងអយ្យការអមសាលាដំបូងខេត្តសៀមរាប បានចុះពិនិត្យដេប៉ូឈើមួយកន្លែង ត្រង់ចំណុចភូមិរលួសខាងលិច ឃុំរលួស ស្រុកប្រាសាទបាគង ខេត្តសៀមរាប ។
ហេតុការណ៍ចុះបង្ក្រាបនេះ បានធ្វើឡើងនៅវេលាម៉ោង០៨និង៣០នាទី នៅថ្ងៃទី០៧ ខែកក្កដា ឆ្នាំ២០២១ រកឃើញឈើល្មើសច្បាប់មួយចំនួន រីឯម្ចាស់ដេប៉ូម្នាក់និងគូកន២នាក់ទៀតត្រូវសមត្ថកិច្ចឃាត់ខ្លួនសួរនាំ។
លោកឧត្តមសេនីយ៍ត្រី ម៉ក់ ធារ៉ា ស្នងការរងទទួលការិយាល័យនគរបាលប្រឆាំងបទល្មើសសេដ្ឋកិច្ចខេត្តសៀមរាប បានមានប្រសាសន៍ថា កម្លាំងសមត្ថកិច្ចដែលដឹកនាំដោយលោក ថេង សំណាង ព្រះរាជអាជ្ញារងអមសាលាដំបូងខេត្តសៀមរាប នគរបាលប្រឆាំងបទល្មើសសេដ្ឋកិច្ចខេត្តសៀមរាប និងខណ្ឌរដ្ឋបាលព្រៃឈើខេត្តសៀមរាប បានចុះពិនិត្យដេប៉ូឈើឈ្មោះ តាំង សុខនី ត្រង់ចំណុចភូមិ រលួសខាងលិច ឃុំរលួស ស្រុកប្រាសាទបាគង ខេត្ត សៀមរាប។ វត្ថុតាងមានដូចជា៖ ១-ឈើ ប្រភេទសុក្រម ចំនួន ១៧៤ដុំ, ស្មើ៧៧៤២ ម៉ែត្រគូប។លោកបញ្ជាក់ថា ចំពោះវត្ថុតាងខាងលើត្រូវបានដកយកទៅរក្សាទុកនៅខណ្ឌរដ្ឋបាលព្រៃឈើស្រុកបន្ទាយស្រី ដើម្បីអនុវត្តបន្តតាមនីតិវិធីច្បាប់ស្តីពីព្រៃឈើនោះ។
ប្រភពខាងលើ បានឲ្យដឹងថា ដោយមានការសង្ស័យ និងមានការក្លែងបន្លំភូតកុហកផងដែរនោះ សមត្ថកិច្ចបានសម្រេចសួរនាំមនុស្សចំនួន៣នាក់ក្នុងនោះម្នាក់ឈ្មោះ ស្រេង ប្រណី ដែលជាអតីត ថៅកែឈ្មួញឈើគ្រញូងប្រចាំទិសឧត្តរនិងកូកនចំនួន២នាក់ទៀត។
គួររម្លឹកផងដែរថា នៅដើមឆ្នាំ២០២១នេះ ឈ្មួញឈើឈ្មោះ ស្រេង ប្រណី បានដើរធ្វើព្យុះធ្វើភ្លៀងរហូតមកបានក្លាយជាថៅកែដេប៉ូឈើ ហើយក្រោយមកក៏ធ្លាប់ជាប់ពន្ធនាគារម្តងរួចមកហើយដែររឿងឆបោកនោះ នៅពេលនេះគេចាំមើលថា តើលោក ស្រេង ប្រណី និងបក្សពួករបស់ខ្លួនអាចជាប់ម្តងទៀតទេដោយសារស្តុកឈើគ្មានច្បាប់ក្នុងដេប៉ូដែលដើរអួតអាងប្រាប់គេថាមានច្បាប់។យ៉ាងណាម៉ិញមហាជនបានសាទរទៅចំណាត់ការរបស់សមត្ថកិច្ចដែលមានវិធានការក្តៅៗដើម្បីទប់ស្កាត់នៃការកាប់បំផ្លាញព្រៃឈើបន្ថែមទៀតពីសំណាក់ក្រុមឆ្លៀតឱកាសដែលពូកែអែបអបលូនក្រាបក្រោមតុដើម្បីបានកាប់ឈើក្នុងតំបន់អភិរក្សជាដើម៕ ដោយវេហាស៍
