កំពង់ធំៈ ឈ្មួញឈើបានធ្វើសកម្មភាព ដឹកឈើគ្រញូង និងឈើប្រណិតជាច្រើន បានធ្វើសកម្មភាព ដឹកឡើង រ៉ូងដីតែមេព្រៃខេត្តកំពង់ធំ អសមត្ថភាពក្នុងការទប់ស្កាត់ ត្រូវបានគេសង្ស័យថា ប្រហែលជាត្រូវថ្នាំសណ្តំ ពីឈ្មួញបានជាហ៊ានលក់មនសិកាបែបនេះ ។ សកម្មភាពដឹកឈើគ្រញូង ត្រូវបានធ្វើសកម្មភាពទាំងយប់ទាំងថ្ងៃ ដោយមិនខ្វល់ពីច្បាប់ មិនខ្វល់ពីការរលាយហិនហោចនៃព្រៃឈើ ទង្វើដែលបង្ករឲ្យជាប់ត្រគៀករបស់មេព្រៃ បានក្លាយជាមេខ្មូតអស់ហើយដោយសារតែភាពអសកម្ម របស់លោក នាយអធិការរដ្ឋបាលព្រៃឈើខាងជើងបឹងទន្លេសាប មកកាន់តំណែង នៅក្នុងខេត្តកំពង់ធំ បានធ្វើឲ្យមន្ត្រីមេព្រៃទន់ដៃទន់ជើង ទៅតាមការគ្រប់គ្រង់របស់លោក នាយអធិការ ។
ជាក់ស្តែងរថយន្តបាឡែនមួយគ្រឿង បានធ្វើសកម្មភាពដឹកឈើគ្រញូង ឲ្យមេឈ្មួញដ៏ធំ នៅក្នុងខេត្តសៀមរាប តាមចម្លើយសារភាពរបស់ជនសង្ស័យថាខ្លួនបានស៊ីឈ្នួលដឹកឈើឲ្យលោក ធី សក់វែង ដែលជាបងធំប្រចាំខេត្តសៀមរាប និងថៅកែដ៏ធំដុះស្លែរម្នាក់ទៀតនៅក្នុង ខេត្តកំពង់ធំ និងជាមន្ត្រីប៉ូលិសនៃស្នងការដ្ឋានខេត្តកំពង់ធំ មានមុខរបររកស៊ីឈើគ្រញូង តែជនសង្ស័យពុំព្រមប្រាប់ឈ្មោះ លុះខ្លួនបានបើករថយន្តបាឡែនពណ៌ ទឹកប្រាក់ពាក់ស្លាកលេខ ស្វាយរៀង 2A-0503 ឆ្ពោះទៅខេត្តកំពង់ចាម លុះមកដល់ស្រុកសន្ទុក បានទទួលទូរស័ព្ទពីមេរបស់ខ្លួនថា ឲ្យនាំឈើទាំងនោះទំលាក់ទុកមួយកន្លែងសិន ហើយបើករថយន្តគេចខ្លួន។ 
លុះមកដល់ចំនុចភូមិភ្នៅ ឃុំទ្រាល ស្រុកបារាយណ៍ ខេត្តកំពង់ធំ ជនសង្ស័យឈ្មោះ ឡាក់ ពៅ ភេទ ប្រុស អាយុ២៧ឆ្នាំ រស់នៅភូមិស្រែណូយ ឃុំ ស្រែណូយ ស្រុកវ៉ារិន ខេត្តសៀមរាប ក៏ត្រូវបានលោក វរៈសេនីយ៍ត្រី ឃុន ប៊ុនហួ មេបញ្ជាការកងរាជអាវុធហត្ថស្រុកបារាយណ៍ ដឹកនាំកំលាំងក្រោមឳវាទ ឃាត់រថយន្តជាប់ ក្រោមការឯកភាពរបស់មេបញ្ជាការខេត្ត និង លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ បន្ទាប់ពីទទួលបានពត៌មានរថយន្តដឹកបទល្មើស ក្រោយពីត្រួតពិនិត្យក៏មិនប្រទះឃើញឈើសូម្បីតែមួយដុំ តែរថយន្តមានជាប់ស្នាមឈើទំលាក់ថ្មី និងជារថយន្តមុខសញ្ញា ក្រោយមកជនសង្ស័យឈ្មោះ ឡាក់ ពៅ បានបញ្ជារថយន្តសំរុកបុកបារ៉ាស តែសំណាងអាក្រក់ត្រូវបានបុកជាមួយរថយន្តមួយគ្រឿងទៀតដែលចតនៅខាងមុខនិងជាទ្រព្យសម្បត្តិកងរាជអាវុធហត្ថ ក្រោយមកសមត្ថកិច្ចបានប្រតាយប្រតបចាប់ជនល្មើសជាប់ ក្រោយពីឆែកឆេរសមត្ថកិច្ចបានប្រទះឃើញ មានថ្នាំញៀនមួយកញ្ចប់ធំ ប្រភេទម៉ាទឹកកក ដែលជនសង្ស័យទុកជក់នៅពេលបើកបរដឹកឈើគ្រញូងតាមការបញ្ជារបស់មេឈ្មួញ ជនសង្ស័យត្រូវបានកសាងសំណុំរឿងបញ្ជូនទៅតុលាការ ។
សូមបញ្ជាក់ផងដែរថា ការអនុវត្តន៍ច្បាប់បង្ក្រាបបទល្មើសព្រៃឈើ នៅក្នុងខេត្តកំពង់ធំ ស្ទើរតែពុំមានប្រសិទ្ធ ភាព ដោយសារតែនៅពេលខ្លះ ព្រះរាជអាជ្ញាបញ្ជាផ្ទាល់ ឲ្យសមត្ថកិច្ចមេព្រៃ ប៉ូលិស និងអង្គភាពពាក់ព័ន្ឋ ស្ទាក់ចាប់រថយន្ត ដែលកំពុងតែបើកបរដឹកបទល្មើសទាំងកណ្តាលថ្ងៃ និងបន្តកន្ទុយគ្នា តែសមត្ថកិច្ចដែលរួមសហការ ចាំស្ទាក់បែរជាឆ្លើយថា មិនឃើញរថយន្ត ឬស្ទាក់អត់ជាប់ជនល្មើសបុកបារ៉ាស តែទោះជាមានការអះអាងបែបនេះក្តីក៏មិនអាចលាក់នូវកំហុសរបស់ខ្លួនឯងបានដែរ។
ប្រភពពត៌មានច្បាស់ការណ៍បាន បញ្ចាក់ថា លោក ជន់ ហាក់ ជាអង្គរក្សមេព្រៃ និងជាកងរាជអាវុធហត្ថ ត្រូវបានផ្នែករដ្ឋបាលព្រៃឈើកំពង់ថ្ម យកទៅនៅជាមួយដើម្បីរួមសហការបង្ក្រាបបទល្មើសព្រៃឈើ តែឥឡូវបានក្លាយជាអ្នកមើកផ្លូវរត់ការប៉ៅផ្តាច់កំពង់ថ្ម និងជាអ្នកចាំទទួលលុយសំណែនជំនួសមេព្រៃ លោក កើត កាន់ណារី នគរបាលប្រឆាំងបទល្មើសសេដ្ឋកិច្ចក្រសួង ប្រចាំខេត្តកំពង់ធំ ចំនុចថ្នល់បែក មិនបានបង្ក្រេបបទល្មើសនោះទេ តែបែរជាអ្នកចាំរាប់ក្បាលឡាន និងមើលផ្លូវ ឲ្យឈ្មួញដឹកបទល្មើស ដោយ នាក រាជ
