ភ្នំពេញ៖ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហា ក្សត្រ នៃព្រះរាជាណាចក្រកម្ពុជា និង សម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរជាទីសក្ការៈដ៏ខ្ពង់ខ្ពស់ ព្រះអង្គទាំងទ្វេបានសព្វ ព្រះរាជហឫទ័យ ស្ដេចយាងទៅកាន់ទីក្រុងប៉េកាំង សាធារណរដ្ឋប្រជាមានិតចិន ហើយកាលពីវេលាម៉ោង ៩ ព្រឹកថ្ងៃទី២៥ ខែសីហា ឆ្នាំ២០១៤ តាមព្រះទីនាំង យន្តហោះពិសេស ដើម្បីគង់ប្រថាប់ពិនិត្យ និង ព្យាបាលព្រះរាជសុខភាព ព្រម ទាំងបំពេញព្រះរាជទស្សនកិច្ចនៅខេត្តមួយក្នុងប្រទេសចិនផងដែរ។
អញ្ជើញដង្ហែព្រះរាជដំណើរ ព្រះករុណាព្រះមហាក្សត្រ និង សម្ដេចម៉ែ ដល់ព្រលានយន្តហោះអន្តរជាតិភ្នំពេញ មានវត្តមានសម្ដេចអគ្គមហាពញាចក្រី ហេង សំរិន ប្រធានរដ្ឋសភា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្ដម ទេព ងន អនុប្រធានទី២ ព្រឹទ្ធសភា រាជវង្សានុវង្ស និង មន្ត្រីអ្នកមុខអ្នកការជាច្រើនរូបទៀត។ ដោយឡែក លោកជំទាវឯកអគ្គរដ្ឋទូតចិនប្រចាំកម្ពុជាក៏មានវត្តមានក្នុងឱកាសនោះផងដែរ។
ក្នុងព្រះរាជសាររបស់ព្រះករុណា ព្រះមហាក្សត្រចុះថ្ងៃទី២៣ខែសីហាឆ្នាំ ២០១៤ ផ្ញើជូនជនរួមជាតិមានខ្លឹមសារថា ទូលព្រះបង្គំខ្ញុំ ព្រះករុណាខ្ញុំ និង សម្ដេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់ សូមព្រះ អនុញ្ញាត និង អនុញ្ញាតពីសម្ដេចព្រះមហាសង្ឃរាជទាំងពីរគណៈ ព្រះថេរានុ ត្ថេរៈគ្រប់ព្រះអង្គ សម្ដេច ឯកឧត្ដម លោកជំទាវ អស់លោក លោកស្រី លោកតា លោកយាយ មាមីង បងប្អូន ក្មួយៗ ជនរួមជាតិទាំងអស់ អវត្តមានពីមាតុប្រទេស ចាប់ពីថ្ងៃទី២៥ខែសីហាឆ្នាំ២០១៤តទៅ និង ធ្វើដំណើរទៅកាន់ទីក្រុងប៉េកាំង ដើម្បី ពិនិត្យព្យាបាលព្រះរាជសុខភាព និង បំពេញព្រះរាជទស្សនកិច្ចទៅកាន់ ខេត្តមួយ នៃសាធារណរដ្ឋប្រជាមានិតចិន ។ ក្នុងពេលអវត្តមាន ខ្ញុំព្រះករុណាខ្ញុំ ខាងលើ នេះ សម្ដេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា និង ទទួលជួយ ទូលព្រះបង្គំខ្ញុំ ព្រះករុណាខ្ញុំ ក្នុងឋានៈជាប្រមុខរដ្ឋស្ដីទី នៃព្រះរាជា ណាចក្រកម្ពុជា។
ព្រះករុណា ព្រះមហាក្សត្រ និង សម្តេចព្រះមហាក្សត្រី ព្រះវររាជមាតា ជាតិខ្មែរជាទីសក្ការៈដ៏ខ្ពង់ខ្ពស់បំផុត បានយាងនិវត្តន៍ពីប្រទេសចិនកាលពីថ្ងៃទី ២៥ខែមីនា ឆ្នាំ២០១៤បន្ទាប់ពីបានយាងព្រះរាជដំណើរកាលពីថ្ងៃទី១៩ខែកុម្ភៈ ឆ្នាំ២០១៤ទៅកាន់ទីក្រុងប៉េកាំង ដើម្បីពិនិត្យ និង ព្យាបាលព្រះរាជសុខភាព នោះ។ នៅក្នុងប្រទេស ជាញឹកញាប់ព្រះករុណាជាអម្ចាស់ជាទីសក្ការៈដ៏ខ្ពង់ខ្ពស់ បំផុតព្រះអង្គបានសព្វព្រះរាជហឫទ័យយាងសាកសួរសុខទុក្ខ និង ប្រោសព្រះ រាជទានព្រះរាជអំណោយសប្បុរសដល់ប្រជារាស្ត្ររងគ្រោះ ដោយគ្រោះធម្មជាតិ និង ប្រជារាស្ត្រជាកសិករនៅតាមបណ្តាខេត្តនានាទូទាំងប្រទេស ដោយក្តី អាណិតស្រឡាញ់ ព្រមទាំងមានព្រះរាជបន្ទូលពីព្រះរាជបណ្តាំសាកសួរសុខទុក្ខ ពីសំណាក់សម្តេចព្រះមហាក្សត្រី ព្រះវររាជមាតាជាតិខ្មែរ សម្តេចម៉ែ សម្តេច យាយ សមេ្តច យាយទួត ជូនប្រជារាស្ត្រជាកួន ជាចៅ ចៅទួត ចៅលួតរបស់ ព្រះអង្គ ដែលព្រះអង្គតែងតែយកព្រះរាជហឫទ័យទុកដាក់ជានិច្ចពីសុខទុក្ខ និង ការលំបាកក៏ដូចជាជីវភាពរស់នៅរបស់ប្រជារាស្ត្រព្រះអង្គគ្រប់ពេលវេលា ។
ព្រះករុណា ព្រះមហាក្សត្រជាទីគោរពសក្ការៈដ៏ខ្ពង់ខ្ពស់បំផុតក៏តែងតែ មានព្រះ រាជបន្ទូលកោតសរសើរចំពោះរាជរដ្ឋាភិបាលកម្ពុជា ក្រោមការដឹកនាំដ៏ ប៉ិនប្រសព្វរបស់សម្តេចតេជោនាយករដ្ឋមន្ត្រី និង កាកបាទក្រហមកម្ពុជា ដែលមាន សម្តេចកិត្តិព្រឹទ្ធបណ្ឌិតជាប្រធានព្រមទាំងថ្នាក់ដឹកនាំខេត្ត អាជ្ញាធរ ដែនដីគ្រប់ លំដាប់ថ្នាក់ដែលបានយកចិត្តទុកដាក់ពីសុខទុក្ខ និង ជីវភាពរស់នៅ របស់ប្រជាពលរដ្ឋក្នុងទូទាំងប្រទេស ក្នុងមូលដ្ឋានរបស់ខ្លួនផ្ទាល់បានទាន់ពេល វេលា ដែលបានធ្វើឲ្យព្រះរាជហឫទ័យរបស់ព្រះអង្គផ្ទាល់ និង ព្រះរាជហឫទ័យ របស់ សម្តេចព្រះវររាជមាតាជាតិខ្មែរ សម្តេចម៉ែមានភាពកក់ក្តៅក្រៃលែង៕