ខេត្តបន្ទាយមានជ័យ: ដោយធ្វើស្រែប្រវាស់នឹងមេឃ ឥឡូវនេះ កសិករនៅឃុំតាគង់ ស្រុកម៉ាឡៃ បានកំពុងព្រួយបារម្ភយ៉ាងខ្លាំង ចំពោះស្រូវរដូវវស្សារបស់ពួកគាត់ ប្រមាណជិត ១.០០០ ហិកតា បានកំពុងរងផលប៉ះពាល់ពីការគំរាមកំហែងពីគ្រោះរាំងស្ងួតយ៉ាងខ្លាំង ប្រសិនបើនៅក្នុងអំឡុង ពេល ៣ថ្ងៃ ទៅ១សប្ដាហ៍ ទៅមុខទៀត គ្មានភ្លៀងធ្លាក់ទេនោះ។កសិករនៅភូមិបល្ល័ង្គ ឃុំតាគង់ បាននិយាយ កាលពីថ្ងៃទី២៦ សីហាថាៈ វាលស្រែរបស់ពួកគាត់ មើលពីចម្ងាយទៅ មានពណ៌បៃតង ស្រងាត់មែន ប៉ុន្ដែវាជាចុងស្មៅចង្រៃ និងដើមស្រូវក្រិនៗ ដែលនៅរស់ដោយ ទឹកសន្សើមប៉ុណ្ណោះ។ 
ដើមដងស្រូវក្រិនទាបៗ មិនអាចដុះលូតលាស់ ហើយរឹតតែមិនអាច ហុចផ្កាផ្លែ នៅខែខាងមុខ បានទៀត។ មុននេះស្រូវរដូវប្រាំង ក៏បានខូចខាត ដោយគ្រោះរាំងស្ងួត។ បន្ទាប់មកស្រូវ ពង្រោះ រដូវវស្សា លើកទី១ ក៏ត្រូវខូចខាត មិនអាចដុះបាន ព្រោះតែគ្មានទឹកភ្លៀង។លោក កែ វិន មេឃុំតាគង់ បាននិយាយថាៈ ឃុំនេះ មានផ្ទៃដីដំណាំស្រូវ ប្រមាណ ១២.០០០ ហិកតា។ 
កន្លងមក ក្នុងឆ្នាំនេះ ផ្ទៃស្រូវប្រាំង ជាង ២.០០០ ហិកតា បានខូចខាត ដោយគ្រោះរាំងស្ងួត។ បន្ទាប់មក និងពេលនេះ ផ្ទៃដីស្រូវបង្កើនរដូវ និងស្រូវរដូវវស្សា ជាង ៥.០០០ ហិកតា បានរងផលប៉ះពាល់ ដោយគ្រោះរាំងស្ងួតទៀត។ ពីពេលនេះ ទៅមុខរវាង ៣ ថ្ងៃ ទៅ១សប្ដាហ៍ទៀត បើនៅតែគ្មានភ្លៀងធ្លាក់ ស្រូវរដូវវស្សា ប្រមាណ ៥.០០០ ហិកតា នឹងរងផលប៉ះពាល់ ហើយឈានទៅខូចខាត។លោក កែ វិន បានបន្ដថា តាំងពីខែមេសាមក នៅឃុំនេះ ទទួលបានភ្លៀងតែ ២ មេធំ ប៉ុណ្ណោះ។
ក្រៅពីនោះ មានរលឹមរាយប៉ាយ បន្ដិចបន្ដួច ធ្វើឲ្យស្មៅ និងរុក្ខជាតិធំៗ ដុះលូតលាស់ពណ៌ ខៀវស្រងាត់បាន។ ប៉ុន្ដែសម្រាប់ដំណាំស្រូវ ដែលគ្មានទឹកជោកជាំ និងទឹកត្រាំគល់ស្រូវទេនោះ ពុំអាចលូតលាស់បានទេ។ ដើមស្រូវបានស្វិតស្រពោន និងងាប់ជាបន្ដបន្ទាប់។លោកបាននិយាយ បន្ថែមទៀតថា អកុសលតែឃុំតាគង់ មាន១១ភូមិ បានរងគ្រោះរាំងស្ងួត នៅឆ្នាំនេះ។ ឯឃុំនៃស្រុកអូរជ្រៅ ស្រុកមង្គលបូរី ខេត្តបន្ទាយមានជ័យ និងឃុំនៃស្រុកបវេល ស្រុកសំពៅលូន ខេត្តបាត់ដំបង មានភូមិសាស្ដ្រ ជាប់នឹងឃុំតាគង់ គេមានទឹកភ្លៀងល្មម ដំណាំស្រូវដុះលូតបាន។
កសិករ និងអាជ្ញាធរភូមិឃុំ បានបញ្ជាក់ថាៈ ក្នុងឃុំនេះ មានកូនអូរតូចៗ៤ -៥ខ្សែដែរ ប៉ុន្ដែរាក់ៗ និងខ្លីៗ ពុំអាចមានទឹក ស្រោចស្រពបានទេ។ ពួកគេអំពាវនាវសុំ ទៅក្រសួងធនធានទឹក និងឧតុនិយម រាជរដ្ឋាភិបាល និងដៃគូអភិវឌ្ឍន៍ ជួយស្ថាបនាប្រព័ន្ធទំនប់ប្រឡាយ ដើម្បីបានទឹកស្រោចស្រព ស្រូវរដូវប្រាំងផង ស្រូវដើមរដូវផង និងស្រូវរដូវវស្សាផង។លោកមេឃុំ មានទឹកមុខស្រងូតស្រងាត់ សំលឹងមើលដើមស្រូវតូច ក្រិនៗ ហើយងាប់ នៅលើដីស្រែស្ងួត ហើយប្រេះក្រហែង រួចងើយមើលមេឃ មានពពកក្រាសៗ ពណ៌ខ្មៅ ហើយបួងសួងទាំងអួលអាក់ថាបើព្រះភិរុណ នៅតែពុំព្រមបង្អុរទឹកភ្លៀងមកទេ ឆ្នាំនេះ កូនចៅពលរដ្ឋឃុំតាគង់ ជាង ១០.០០០ នាក់ ច្បាស់ជាអត់បាយ ក្រហាយពោះជាមិនខានឡើយ៕
