កំពង់ឆ្នាំង៖ លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ច បានអញ្ជើញចូលរួមពិធីបុណ្យឆ្លងទួលប្រាសាទបុរាណព្រះអង្គតុលាការ អតីត ព្រះនាមបយុគ្គស្ថិតនៅភូមិវត្ដ ឃុំលង្វែក ស្រុកកំពង់ត្រឡាច ខេត្ដកំពង់ឆ្នាំង ដើម្បីជាទីសក្ការៈបូជារបស់បងប្អូនប្រជាពលរដ្ឋ តាមគន្លងប្រពៃណីព្រះពុទ្ធសាសនា ព្រោះទួលប្រាសាទបុរាណព្រះអង្គតុលាការ នេះរងការបំផ្លិចបំផ្លាញស្ទើរទាំងស្រុង ក្នុងជំនាន់ របបប៉ុលពត។ប៉ុន្តែមកដល់ឆ្នាំ២០១៣ ទើបលោកជំទាវម៉ែន សំអន និងមន្ដ្រីរាជការ សប្បុរសជន ពុទ្ធបរិស័ទ ជិតឆ្ងាយ បានបន្តជួសជុលកសាងដោយថវិកាចូលរួមសាមគ្គីជិត៦ម៉ឺនដុល្លារដើម្បីឲល្អស្អាតឡើងវិញ សំរាប់អ្នកស្រុក កំពង់ឆ្នាំង ដែល
តែងតែមានជំនឿយ៉ាងខ្លាំងនិងជាទីសក្ការៈគោរពបូជាបន់ស្រន់សុំសេចក្ដីសុខ សេចក្ដីចម្រើន ដែលអ្នក ស្រុកជឿថាបារមីព្រះអង្គតុលាការពូកែស័ក្ដិសិទ្ធិ ក្នុងពាក្យសម្បថចំពោះអ្នកណាមួយ ដែលក្បត់មិនស្មោះត្រង់និងខ្លួន និងរឿងរ៉ាវដែលអយុត្តិធម៏ ។ ពិធីបុណ្យឆ្លងដាក់ឲ្យប្រើប្រាស់នេះបានប្រព្រឹត្ដទៅកាលពីថ្ងៃទី០៦និង០៧ ខែកញ្ញា ឆ្នាំ២០១៤ ដោយមានការចូលរួមពីព្រះសង្ឃ ៣៣អង្គ ពុទ្ធបរិស័ទ សប្បុរសជនក្នុងក្រៅប្រទេស លោក អង្គ វង្សវឌ្ឍានា លោកជំទាវឧកញ្ញ៉ា អុឹង សុីស្រ៊ន់លោកឧកញ្ញា៉ស៊ុយ ស៊ីផាន និងមន្ត្រីរាជការប្រជាពលរដ្ឋ ជាច្រើននាក់ទៀតផង ។ លោកជំទាវម៉ែន សំអន បានបញ្ជាក់ថា៖ ទួលប្រាសាទបុរាណព្រះអង្គតុលាការ (កាលពីដើមគេហៅបយុគ្គ) ត្រូវបានជួសជុលឡើងវិញ តាមសុំណូមពររបស់ប្រជាពលរដ្ឋ ព្រោះទួលប្រាសាទព្រះអង្គតុលាការនេះត្រូវបានបំផ្លិចបំផ្លាញ ខូចខាតស្ទើទាំងស្រុង កាលពីរបបខ្មែរក្រហម។
ក្រោយថ្ងៃរំដោះ៧ មករាឆ្នាំ១៩៧៩និងរហូតមកដល់បច្ចុប្បន្ននេះ ប្រជាពលរដ្ឋតែងតែមកគោរពបូជា បន់ស្រន់ តាមជំនឿសាសនា ប្រពៃណីដូនតា សុំសេចក្ដីសុខ សេចក្ដីចម្រើន ដែលប្រជាពលរដ្ឋមានជំនឿពូកែស័ក្ដិសិទ្ធិតាំងពីសម័យ ទីក្រុងលង្វែកមកម្លះ ។ លោកជំទាវបន្ដថា៖ កន្លងមកលោកជំទាវផ្ទាល់តែងតែមកគោរពបូជានៅទីនេះ ហើយបានឃើញប្រជាពលរដ្ឋជាច្រើនមកធ្វើបុណ្យ និងមកបន់ស្រន់តែមិន សមជាកន្លែង ដែលសមគួរ ពីព្រោះទីនេះត្រូវបានបាក់បែកខូចខាត ស្ទើរទាំងស្រុងតាំងពីសម័យ សង្គ្រាម ។ដូច្នេះលោកជំទាវបានសម្រេចចិត្ដគៀងគររកសប្បុរសជន ពុទ្ធបរិស័ទ ជិតឆ្ងាយ ដើម្បីនាំយកថវិកាមកចូលរួមជួសជុល ឲ្យមានសោភ័ណ្ឌភាពស្អាតឡើងវិញ ដើម្បីឲ្យសាកសមជាកន្លែងសក្ដិការៈបូជា
តាមប្រពៃណីសាសនានៃយើង ។ លោកជំទាវទៀតបន្ដថា៖ ទួលប្រាសាទព្រះអង្គតុលាការនេះ ត្រូវបានជួសជុលឡើងវិញតាមរចនាបទខ្មែរដើមទាំងស្រុង ដែលមានកំពស់១៨ម៉ែត្រ ទទឹង ១២ម៉ែត្រ បណ្ដោយប្រវែង២១ម៉ែត្រ ដោយបានចាប់ផ្ដើមជួសជុលតាំងពីថ្ងៃទី៧ ខែកញ្ញា ឆ្នាំ២០១៣ និងបានរួចរាល់នៅថ្ងៃទី៦ខែកញ្ញា ឆ្នាំ២០១៤នេះ ដើម្បីធ្វើពិធីបុណ្យឆ្លងដាក់ឲ្យបងប្អូនប្រើប្រាស់ តាមប្រពៃណីព្រះពុទ្ធសាសនា នាថ្ងៃនេះ ។ លោកជំទាវក៍បានថ្លែងនូវការអរគុណចំពោះសម្តេចតេជោហ៊ុន សែននិងលោកជំទាវកិត្តិព្រឹទ្ធបណ្ឌិតប៊ុន រ៉ានីហ៊ុន សែន និងសប្បុរជន ក្នុងក្រៅប្រទេសដែលបានចូលរួមឧបត្ថម្ភគាំទ្រ
ក្នុងការជួយ ជ្រុមជ្រែងកសាង នូវទួលប្រាសាទព្រះអង្គតុលាការនេះ តាមទំនាមទម្លាប់ ប្រពៃណីនៃសាសនារបស់យើង ។ តំបន់នេះនិងក្លាយជាទីកន្លែងទេសចរណ៍មួយដ៍សំខាន់សម្រាប់ភ្ញៀវជាតិ អន្ដរជាតិចូលមកទស្សនាកម្សាន្ដ នៅទីនេះនាថ្ងៃអនាគតជាក់ជាពុំខាន ព្រោះកន្លែងនេះជាទីទួលដែលមានបារមីដូនតាគោរព្ធបូជាដ៍ពូកែស័ក្ដិសិទ្ធិលោកជំទាវសង្ឃឹមថាតំបន់នេះប្រាកដជាក្លាយជាកន្លែងទេសចរដ៍សំខាន់បំផុតទៅថ្ងៃអនាគត ៕