ដុងថាប់-វៀតណាម: រដ្ឋបាលខេត្តបន្ទាយមានជ័យទាក់ទាញក្រុមហ៊ុនស្បៀងនិងក្រុមហ៊ុនថ្នាំការពាររុក្ខជាតិអាងយ៉ាងដែលល្បីឈ្មោះនៅភូមិភាគខាងត្បូងវៀតណាម ទៅបណ្ដាក់ទុនវិនិយោគលើការដាំដុះស្រូវ មានទិន្នផលនិងគុណភាពខ្ពស់រួចកែឆ្នៃអង្ករនាំចេញផងនិងបង្កើតក្រុមហ៊ុនផលិតថ្នាំកសិកម្មការពាររុក្ខជាតិនៅខេត្តនេះ។
លោក គោស៊ុំ សារឿត អភិបាលខេត្តបន្ទាយមានជ័យដឹកនាំប្រតិភូបំពេញទស្សនកិច្ចនៅខេត្តដុងថាប់ប្រទេសវៀតណាមនិង ក្នុងនោះបានចូលទៅស្វែងយល់ដំណើការរកស៊ីរបស់ក្រុមហ៊ុនស្បៀងនិងថ្នាំកសិកម្មការពាររុក្ខជាតិ (An Giang Plant protection joint stock company)នៅស្រុកតិនហុងខេត្តដុងថាប់ កាលពីថ្ងៃទី៨ សីហា ២០១៤។
លោកបានបញ្ចុះបញ្ចូលទាក់ទាញក្រុមហ៊ុននេះដែលមានសាខានៅប្រទេសកម្ពុជាស្រាប់ទៅបណ្ដាក់ទុនរកស៊ីនៅខេត្តបន្ទាយមានជ័យ។ លោកត្រឹន វ៉ាន់ឡុង ជំនួសមុខអោយលោក វិន វ៉ាន់ថង អគ្គនាយកក្រុមហ៊ុនAGPPSបាននិយាយថា: ក្រុមហ៊ុនបានបង្កើតឡើងនៅឆ្នាំ២០០៨ តែដល់ឆ្នាំ២០១២ទើបបានដំណើរការពេញបន្ទុក។ ក្រុមហ៊ុនមានដំណើការប្រាំផ្នែកមាន ផ្នែករោងចក្រសម្ងួតស្រូវ ផលិតអង្ករ ផលិតពូជ ផ្នែកបច្ចេកទេសថ្នាំការពារ មានបុគ្គលិកសម្រប់ចុះជួយធ្វើស្រែបង្ហាញ និងការពារជម្ងឺផ្សេងៗក្នុងវាលស្រែ។
កសិករធម្មតាតែងប្រឈមនឹងទទួលបានផលខ្ពស់តែធ្លាក់ថ្លៃ។ លោកបន្តថា: ក្រុមហ៊ុនបានធ្វើដៃគូជាមួយកសិករ ទាំងជួយលើបច្ចេកទេស ដាំដុះថែទាំនិងកំចាត់កត្តាចង្រៃ ព្រមទាំងទិញស្រូវផ្ទាល់ពីកសិករក្នុងតម្លៃសមស្រប។ ក្រុមហ៊ុនមានបុគ្គលិកបច្ចេកទេស១០០០នាក់ សហការនឹងកសិករ១.៩៩៣ស្រែ ក្នុងនោះមាន៧៤ស្រែគំរូ។ហើយកសិករចូលរួមជាសមាជិកជាង២.៦០០គ្រួសារ មានផ្ទៃដីជាង ៦.០០០ហិចតានៅ៨កន្លែងទីទៃពីគ្នា។
លោក យ៉ាន់ ចន្ថា នាយករងក្រុមហ៊ុននេះប្រចាំកម្ពុជាបានអោយដឹងថា: ផ្នែកផលិតនៅរោងចក្រកិនស្រូវនៅស្រុកតឹនហុងក្នុង១ថ្ងៃសម្ងួត ស្រូវបាន១.២០០តោនក្នុង១ថ្ងៃនិង កិនអង្ករបានជាង២០តោនក្នុង១ម៉ោង។នៅក្នុងខ្សែសង្វាក់ផលិតកម្មក្រុមហ៊ុនបានជោគជ័យលើអាជីវកម្មខ្លួនយ៉ាងច្រើន ទាំងនៅវៀតណាមនិងទាំងនៅកម្ពុជា។
លោក គោស៊ុំ សារឿត អភិបាលខេត្តបន្ទាយមានជ័យបានទាក់ទាញក្រុមហ៊ុននេះអោយទៅដាក់ទុនរកស៊ីនៅខេត្តខ្លួន ព្រោះខេត្តមានសក្ដានុពលលើវិស័យកសិកម្ម កសិ់ឧស្សាហកម្ម ពាណិជ្ជកម្ម សេវាកម្មទេសចរណ៍ ប៉ុន្តែនៅខ្វះខាតអ្នកបច្ចេកទេសនិងទុន។ លោក និយាយបន្តថា:ខេត្តមានផ្ទៃដីដាំដុះស្រូវ ២២៣.០០០ហិចតា ផ្ទៃដីដាំដំឡូងម៉ីជាង៦ម៉ឺនហិចតា។ ខេត្តចង់អោយវិនិយោគិនត្រូវបង្កើតរោងម៉ាស៊ីនស្រូវទំនើបហើយធំ សម្រាស្រូវ និងនាំអង្ករចេញ៕ដោយឃិន គន្ធា