កំពង់ចាម: ឯកឧត្តម បណ្ឌិត Takeshi kasai នាយកប្រចាំតំបន់អាស៊ីប៉ាស៊ីហ្វិក នៃអង្គការសុខភាពពិភពលោក (WHO) បានសម្ដែងនូវការអបអរសាទរ និងកោតសសើរចំពោះភាពជោគជ័យក្នុងការគ្រប់គ្រងប្រយុទ្ធប្រឆាំងនឹងជម្ងឺកូវីដ-១៩ ដេីម្បីសង្គ្រោះអាយុជីវិតរបស់ប្រជាពលរដ្ឋ ពីសំណាក់ថ្នាក់ដឹកនាំខេត្តកំពង់ចាម ក៏ដូចជាប្រមុខរាជរដ្ឋាភិបាលកម្ពុជាផងដែរ ។ ការលេីកឡើងយ៉ាងដូច្នេះក្នុងកិច្ចជំនួបពិភាក្សាជាមួយឯកឧត្តម អ៊ុន ចាន់ដា អភិបាលខេត្តកំពង់ចាម ដើម្បីស្វែងយល់អំពីវឌ្ឍនភាពក្នុងវិស័យសុខាភិបាល ជាពិសេសលើកម្មវិធីចាក់វ៉ាក់សាំងកូវីដ-១៩ នារសៀលថ្ងៃទី២ ខែកក្កដា ឆ្នាំ២០២២ ។
ក្នុងជំនួបនេះដែរ ឯកឧត្តមបណ្ឌិត Takeshi kasai បានសម្តែងនូវការកោតស្ញប់ស្ញែងចំពោះរាជរដ្ឋាភិបាលកម្ពុជា និងក្រសួងសុខាភិបាល ក៏ដូចជារដ្ឋបាលខេត្តកំពង់ចាមផងដែរ ដែលមានកិច្ចខិតខំប្រឹងប្រែងក្នុងយុទ្ធនាការចាក់វ៉ាក់សាំង គ្របដណ្ដប់កម្រិតខ្ពស់លើប្រជាពលរដ្ឋ ។ ហើយឯកឧត្ដមក៏បានសម្ដែងនូវការសោកស្ដាយផងដែរចំពោះសមាជិកគ្រួសារដែលបានស្លាប់បាត់បង់ជីវិតដោយសារជំងឺកូវីដ១៩ ក្នុងខេត្តកំពង់ចាម ទាំង៣៤២នាក់។
ឯកឧត្តម Takeshi kasai បានបន្តថា ទោះបីជាយ៉ាងណាក៏ដោយ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានយកចិត្តទុកដាក់យ៉ាងខ្លាំងលើក្រុមគ្រួសារដែលបានស្លាប់បាត់បង់ជីវិតដោយសារជំងឺកូវីដ១៩គ្រប់ៗគ្នា ។ ព្រមទាំងបានកោតសសើរចំពោះការរៀបយុទ្ធសាស្ត្ររបស់ឯកឧត្ដម អ៊ុន ចាន់ដា អភិបាលខេត្តកំពង់ចាម ដែលបានរៀបចំផែនការធ្វើយ៉ាងណាឲ្យប្រជាពលរដ្ឋ ដែលមានការរវល់ការងារស្រែចម្ការ បានទទួលវ៉ាក់សាំងការពារជម្ងឺកូវីដ១៩ ទាំងដូសមូលដ្ឋាន និងដូសជម្រុញឲ្យគ្រប់ៗគ្នា ។
ជាមួយគ្នានោះ ឯកឧត្តម Takeshi kasai បានសម្ដែងនូវការអបអរសាទរ ចំពោះមន្ទីរពេទ្យខេត្តកំពង់ចាម ដែលទទួលបានម៉ាស៊ីនផលិតខ្យល់អុកស៊ីហ្សែន សម្រាប់បម្រើឲ្យការព្យាបាលជំងឺទូទៅ ជាអំណោយរបស់ឯកឧត្ដមបណ្ឌិត ហ៊ុន ម៉ាណែត អគ្គមេបញ្ជាការរង និងជាមេបញ្ជាការកងទ័ពជើងគោក និងលោកជំទាវ ដែលអាចផលិតខ្យល់អុកស៊ីសែនបានក្នុងមួយម៉ោងចំនួន ១០បំពង់ ផងដែរ ៕