ភ្នំពេញ៖ បុរសម្នាក់បានរងរបួសធ្ងន់ធ្ងរ ខណៈពេលស្រវឹងស្រាជោកជាំបើកម៉ូតូឌ្រីមសេ១២៥ពណ៌ខ្មៅមួយគ្រឿងក្នុងល្បឿនលឿនហើយរេចង្កូតទៅបុកគូទរថយន្តប្រមូលសំរាមក្រុមហ៊ុន ស៊ិនទ្រី មួយគ្រឿងដែលឈប់នៅលើផ្លូវដើម្បីប្រមូលសំរាម កាលវេលាម៉ោង៩នឹង៤៥នាទីយប់ ថ្ងៃទី១៤ ខែ
កញ្ញាឆ្នាំ២០១៤ តាមបណ្តោយមហាវិថីសហព័ន្ឋរុស្ស៊ី ទល់មុខខ្លោងទ្វារវត្តទឹកថ្លា ស្ថិតក្នុងសង្កាត់ទឹកថ្លា ខណ្ឌសែនសុខ។ នៅកន្លែងកើតហេតុសមត្ថកិច្ចមិនទាន់ស្គាល់អត្តសញ្ញារបស់បុរសស្រវឹងស្រារងរបួសធ្ងន់នៅឡើយទេ។
ប្រភពពត៏មាននៅកន្លែងកើតហេតុបានអោយដឹងថាមុនពេលកើតហេតុ គេឃើញបុរសស្រវឹងស្រាជោកជាំម្នាក់បើកម៉ូតូឌ្រីមសេ១២៥ ពណ៌ខ្មៅមួយគ្រឿងពាក់ស្លាកលេខកំពង់ឆ្នាំង 1B-2501 ធ្វើដំណើរយ៉ាងលឿនតាមបណ្តោយមហាវិថីសហព័ន្ឋរុស្ស៊ី ក្នុងទិសដៅពីកើតទៅលិចស្រាប់តែមកដល់ចំណុចកើតហេតុខាងលើក៏បានព្យាយាមបើកវ៉ាម៉ូតូមួយគ្រឿងនៅពីមុខទើបបានរេចង្កូតទៅបុកគូទរថយន្តប្រមូលសំរាមរបស់ក្រុមហ៊ុន ស៊ិនទ្រីមួយគ្រឿងដែលឈប់នៅលើផ្លូវដើម្បីប្រមូលសំរាម ចំពីក្រោយពេញទំហឹង បណ្តាលអោយបុរសស្រវឹងស្រាជោកជាំនោះរងរបួសធ្ងន់ធ្ងរត្រូវបានរថយន្តសាមុយដឹកយកទៅសង្គ្រោះបន្ទាន់នៅគ្លីនិចឯកមួយ។ក្រោយពេលកើតហេតុសមត្ថកិច្ចបានធ្វើការវាស់វែងយកម៉ូតូរបស់ជនរងគ្រោះទៅរក្សាទុកនៅអធិការដ្ឋាននគរបាលខណ្ឌសែនសុខដើម្បីរងចាំក្រុមគ្រួសារមកទទួលយកទៅជួសជុល ចំណែករថយន្តស៊ិន ទ្រីមិនត្រូវបានសមត្ថកិច្ចយកទៅរក្សាទុកទេពីព្រោះសមត្ថកិច្ចទុកអោយរថយន្តខាងលើប្រមូលសំរាម៕
