ព្រឹកថ្ងៃទី១៦ ខែកញ្ញា ឆ្នាំ២០១៤នេះ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងារថ្នាក់ជាតិចុះជួយខេត្តតាកែវ និងលោកជំទាវ ព្រមទាំងក្រុមការងារ បានអញ្ជើញទៅកាន់បិណ្ឌទី៨ នៅវត្ត គិរី
ចុងកោះ ស្ថិតនៅក្នុងឃុំគីរីចុងកោះ ស្រុកគីរីវង់ ខេត្តតាកែវ។
មានប្រសាសន៍ទៅកាន់ព្រះសង្ឃ និងប្រជាពលរដ្ឋដែលបានចូលរួមក្នុងពិធីកាន់បិណ្ឌនោះ ឯកឧត្តមឧបនាយករដ្ឋមន្ត្រី សុខ អាន បានទួលប្រគេនព្រះសង្ឃ និងជម្រាបដល់ប្រជាពលរដ្ឋថា ក្នុងនាមប្រធានក្រុមការងារថ្នាក់ជាតិចុះជួយខេត្តតាកែវ ឯកឧត្តម ផ្តោតការយកចិត្តទុកដាក់ខ្ពស់បំផុតលើការងារសំខាន់ៗចំនួន៣ ចំពោះមុខ ក្នុងនោះ ទី១ ឯកឧត្តមសូមគាំទ្រយ៉ាងពេញទំហឹង នូវកិច្ចខិតខំប្រឹងប្រែងរបស់ព្រះតេជគុណចៅអធិការវត្តគីរីចុងកោះ ព្រះនាមព្រះសុវណ្ណបញ្ញា សែម សុផុន ព្រះធម្មធរអនុគណស្រុកគីរីវង់ ដែលព្រះអង្គជានាយកអង្គការព្រះពុទ្ធសាសនាដើម្បីសុខភាព នៅទូទាំងខេត្តតាកែវ ។
ជាមួយនឹងការកោតសរសើរដល់ព្រះចៅធិការវត្ត ដែលមានស្នាព្រះហស្ថ ក្នុងបំពេញតួនាទីដ៏សកម្មក្នុងអង្គការមនុស្សធម៌មួយនេះ ដែលបានធ្វើឲ្យមហាជនទូទៅទទួលស្គាល់។ ឯកឧត្តមឧបនាយករដ្ឋមន្ត្រី ក៏សូមសំដែងនូវការលើកទឹកចិត្ត និងជម្រុញឲ្យក្រុមការងារចុះជួយស្រុកគីរីវង់ទាំងមូល យកចិត្តទុកដាក់ខ្ពស់ និងបន្តគាំទ្រ ជ្រោមជ្រែង និងសហការ ក្នុងការដឹកជញ្ជូនអ្នកជម្ងឺ ទាំងចាស់ ទាំងក្មេង ព្រមទាំងជនពិការផងដែរ ក្នុងការបន្តដឹកយកទៅកាន់មណ្ឌលសុខភាព និងការដឹកបន្តទៅដល់មន្ទីរពេទ្យថ្នាក់ជាតិ (កម្ពុជា សូវៀត) នៅរាជធានីភ្នំពេញ ដើម្បីពិនិត្យ និងព្យាបាលបន្ទាន់ ដែលសកម្មភាពនេះ គឺបង្ហាញឲ្យឃើញនូវការលើកកម្ពស់ដល់ជីវភាពរស់នៅរបស់ប្រជាពលរដ្ឋ។
ឯកឧត្តមឧបនាយករដ្ឋមន្ត្រី ក៏ជម្រាបទៅឯកឧត្តម អភិបាល នៃគណៈអភិបាលខេត្តតាកែវឲ្យពិនិត្យបញ្ជីឈ្មោះឡើងវិញ ដោយសហការជាមួយមន្ទីរផែនការ ដើម្បីបានដឹងពីចំនួនមនុស្សចាស់ និងសហការជាមួយអង្គការព្រះពុទ្ធសាសនាដើម្បីសុខភាព ប្រយោជន៍សម្រួលដល់ពួកគាត់នៅពេលជួបប្រទះបញ្ហាជម្ងឺតម្កាត់កើតឡើង ជាមួយនឹងការតម្រូវឲ្យមានការចេញប័ណ្ណសុខភាពជូនដល់ប្រជាពលរដ្ឋ ដោយបង់ថ្លៃសេវាបណ្តាញសង្គមកិច្ច ១ឆ្នាំតម្លៃត្រឹមតែ៥ដុល្លារប៉ុណ្ណោះ ដែលតម្លៃនោះ ឯកឧត្តមឧបនាយករដ្ឋមន្ត្រីអំពាវនាវដល់ក្រុមការងារចុះជួយស្រុកគីរីវង់ជាអ្នកចំណាយ។
ការងារអទិភាពទី២ គឺឯកឧត្តមឧបនាយករដ្ឋមន្ត្រី សុខ អាន ក៏បានលើកទឹកចិត្តដល់ក្រុមការងារថ្នាក់ជាតិឲ្យខិតខំជួយសម្រួលដល់ប្រជាពលរដ្ឋ ក្នុងការជម្រុញចលនាសហគមន៍កសិកម្ម និងសិក្សាស្វែងរកលទ្ធភាពដើម្បីធានាសម្រួលដោះស្រាយបញ្ហាជូនដល់ប្រជាពលរដ្ឋ ដែលប្រឈមនឹងការខ្ចីប្រាក់ពីមីក្រូហិរញ្ញវត្ថុឯកជន ហើយពុំទាន់មានលទ្ធភាពសងនោះ គឺក្នុងនយោបាយរបស់រាជរដ្ឋាភិបាល នឹងជួយបង្កើតសហគមន៍កសិករ ប្រយោជន៍ដើម្បីជួយចងក្រងប្រជាពលរដ្ឋនៅក្នុងភូមិនីមួយៗឲ្យជួយភាគហ៊ុន ក្នុងកម្រៃ១ម៉ឺន ឬ២ម៉ឺនរៀលក្នុង១ភាគហ៊ុនៗ និងយកប្រាក់ទាំងនោះមកតម្កល់នៅទីចាត់ការសហគមន៍នៅក្នុងភូមិ ឃុំនោះ និងខិតខំជួយដោះស្រាយបញ្ហាជូនកសិករ ដូចជាជួយផ្គត់ផ្គង់ពូជស្រូវ និងជីកសិកម្មដែលមានគុណភាពខ្ពស់ ប៉ុន្តែតម្រូវឲ្យប្រជាពលរដ្ឋទិញ ឬក៏ខ្ចីក្នុងតម្លៃថោកជាងទីផ្សារឯកជន និងការជួយបច្ចេកទេសដាំដុះថែមទៀតផង ដើម្បីបានទិន្នផលខ្ពស់ បូករួមជាមួយការរកទីផ្សារលក់ក្នុងតម្លៃខ្ពស់ជូនប្រជាកសិករ។ ការធ្វើបែបនេះ គឺនឹងអាចទ្រទ្រង់ ដោះស្រាយនូវទុក្ខកង្វល់ជូនប្រជាពលរដ្ឋបានល្អប្រសើរមួយកម្រិត។
ក្រៅពីនេះ ការងារអាទិភាពទី៣ គឺឯកឧត្តមឧបនាយករដ្ឋមន្ត្រីសុខ អាន នឹងពិនិត្យឡើងវិញអំពីបញ្ហាទំនាស់នានា ដែលកើតមានឡើងនៅតាមផ្សារមួយចំនួន រវាងអ្នកគ្រប់គ្រងផ្សារ និងអាជីវករ ធ្វើយ៉ាងណាសម្រួលដល់អាជីវករឲ្យបានសប្បាយ រីករីកក្នុងជីវភាព និងការប្រកបមុខរបររបស់ខ្លួន ហើយតំណាងអ្នកគ្រប់គ្រងផ្សារ ត្រូវគោរពតាមកិច្ចសន្យា។ ក្នុងការដោះស្រាយបញ្ហានេះ ដោយជោគជ័យ គឺចាំបាច់ទាមទារឲ្យមានការចូលរួមពីថ្នាក់ ឃុំ ស្រុក និងខេត្ត ដើម្បីរៀបចំបង្កើតឲ្យបាននូវសហគមន៍អាជីវករផ្សារ ក្នុងការធានាផលប្រយោជន៍រួមរបស់អាជីវករទាំងអស់ក្នុងផ្សារនីមួយៗ និងជម្រុញឲ្យមានបង្កើត « ក្រុមទីប្រឹក្សាបញ្ញតិករផ្សារ» ផងដែរ ដើម្បីសិក្សា ពិនិត្យ កិច្ចសន្យាឡើងវិញ ក្នុងក្របខណ្ឌស្រាវជ្រាវឯកសារគតិយុត្តពាក់ព័ន្ធនានា ដោយមានការចូលរួមពីក្រុមប្រឹក្សាស្រុក អភិបាលស្រុក អាវុធហត្ថស្រុក និងតំណាងផ្សារ និងអាជីវករ ព្រមទាំងមុខសញ្ញាផ្សេងៗទៀតដែលមានសមត្ថភាពចូលរួមដោះស្រាយមានឈ្មោះក្នុងក្រុមការងារនេះ ក្នុងករណីអ្នកគ្រប់គ្រងផ្សារមិនបានអនុវត្តត្រឹមត្រូវ និងរំលោភលើកិច្ចសន្យា។
ក្នុងឱកាសជួបសំណេះសំណាលក្នុងពិធីនោះដែរ ឯកឧត្តមឧបនាយករដ្ឋមន្ត្រី សុខ អាន ក៏បានប្រគេនថវិកាក្នុងការកសាងវត្តប្រមាណជាង១០លានរៀល និងប្រគេននូវទេយ្យវត្ថុ រួមមាន អង្ករ ត្រីខ មី ថែមទាំងប្រមូលបាននូវប្រាក់ផ្គត់ផ្គង់ដល់មូលនិធិព្រះពុទ្ធសាសនាដើម្បីសុខភាពចំនួន១២០០ដុល្លារសហរដ្ឋអាមេរិក។ ក្រៅពីនេះ ឯកឧត្តមឧបនាយកររដ្ឋមន្ត្រី សុខ អាន និងក្រុមការងារ ក៏បានប្រគេនទេយ្យវត្ថុ និងថវិកាមួយចំនួនទៀតសម្រាប់ពិធីកាន់បិណ្ឌវេនទី៩ ដល់ព្រះសង្ឃក្នុងវត្តឧទុម្ពរក្រោម ឃុំព្រះបាទជាន់ជុំ ស្រុកគីរីវង់ ខេត្តតាកែវ៕
