ភ្នំពេញ ៖ បុរសជនជាតិចិនម្នាក់បើករថយន្តកូរ៉ូឡាមួយគ្រឿងបោះពួយក្នុងល្បឿនលឿន ខណៈមកដល់ចំណុច ផ្លូវកោងបួងចង្កូតមិនទាន់ក៏បុកម៉ូតូហុងដាឌ្រីមមួយគ្រឿងចំពេញទំហឹងបណ្ដាលអោយបុរសម្នាក់របួសផុង លលាដ៏ក្បាលស្លាប់ភ្លាមៗនៅកន្លែងកើតហេតុយ៉ាងអាណោចអាធ័ម ចំណែករថយន្តបង្ករងការខូចខាត ដាច់កាឡេកង់មុខខាងឆ្វេងទៅមុខលែងរួច។ ហេតុការណ៍នេះបានកើតឡើងកាលពីវេលាម៉ោង១០ និង៣០នាទី យប់ថ្ងៃទី២៥ខែកញ្ញាឆ្នាំ២០១៤ ត្រង់ចំណុចមុខផ្ទះគ្លីនិក រ័ត្ន គឹមសាន ជំនាញព្យាបាលច្រមុះ ត្រចៀក ផ្ទះលេខ៣០០ ក្បែរផ្សារប៉េសេចាស់ តាមបណ្ដោយផ្លូវលេខ៣៧១ ស្ថិតក្នុងសង្កាត់បឹងទំពុន ខណ្ឌមានជ័យ។
ជនរងគ្រោះឈ្មោះ ជា សុខឈៀង ភេទប្រុសអាយុ២៥ឆ្នាំមុខរបរជាកម្មកររោងចក្រ មានទីលំនៅភូមិព្រែកថ្លឹង សង្កាត់ជើងឯក ខណ្ឌដង្កោ មានប្រពន្ធឈ្មោះ ចិន ឋានៈ ទើបតែសំរាលកូនស្រីបានរយៈពេល១ខែ។ ចំណែកបុរសជនជាតិបើកបរថយន្តបង្កមិនទាន់ស្គាល់អត្តសញ្ញាណនៅឡើយទេ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុមានរថយន្តកូរ៉ូឡាមួយគ្រឿង ពណ៌ស្ករ ពាក់ស្លាកលេខ ភ្នំពេញ 2E-2135 បើកបរដោយបុរសជនជាតិចិនម្នាក់ធ្វើដំណើរតាមបណ្ដោយផ្លូវលេខ៣៧១ ក្នុងល្បឿនយ៉ាងលឿន ទិសដៅពីកើតទៅលិច ខណៈមកដល់ចំណុចកើតហេតុជាផ្លូវកោងរថយន្តកូរ៉ូឡា បួងចង្កូតរថយន្តមិនទាន់ក៏បានបើកបុកម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ កណ្ដាល 1N-7771 ជិះដោយបុរសរងគ្រោះចេញពីផ្ទះ ធ្វើដំណើរតាមបណ្ដោយផ្លូវលេខ៣៧១ បំណងទៅលេងផ្ទះ បងស្រីនៅម្ដុំបឹងត្របែក ក្នុងទិសដៅច្រាស់គ្នាចំពេញទំហឹងបណ្ដាលអោយជនរងគ្រោះផ្លោងហោះទៅបុក សំយ៉ាបផ្ទះគ្លីនិកព្យាបាលច្រមុខត្រចៀកកំពស់ប្រមាណ៤ម៉ែត្រហើយធ្លាក់មកវិញរងរបួសផុងប្រេះលលាដ៍ក្បាល និងខ្ទេចប្រអប់ជើងខាងឆ្វេងស្លាប់ភ្លាមៗយ៉ាងអាណោចអាធ័មនៅកន្លែងកើតហេតុ ចំណែករថយន្តបង្កព្យាយាម បើករត់បានចំងាយប្រមាណ៧០ម៉ែត្រក៏ទៅមុខលែងរួចដោយសាររងការខូចខាតដាច់កាឡេកង់មុខខាងឆ្វេង ចំណែកបុរសជនជាតិចិនក៏ត្រូវប្រជាពលរដ្ឋឃាត់ទុកក្នុងរថយន្តមិនអោយរត់ទៅណារង់ចាំសមត្ថកិច្ចជំនាញមកទើបប្រគល់ខ្លួនអោយ។ បន្ទាប់ពីកើតហេតុសមត្ថកិច្ចជំនាញបានធ្វើការវាស់វែងនិងប្រគល់សពជនរងគ្រោះ អោយទៅក្រុមគ្រួសារយករៀបចំធ្វើបុណ្យតាមប្រពៃណី ចំណែកម៉ូតូនិងរថយន្តសមត្ថកិច្ចបានស្ទូច យកទៅរក្សាទុកនៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញ ដើម្បីធ្វើការដោះស្រាយតាមផ្លូវច្បាប់៕
