សមាគមអ្នកនាំចេញអង្កររបស់ថៃឱ្យដឹងថា ការនាំចេញអង្ករនៅក្នុងអំឡុងពេល៨ខែដើមឆ្នាំនេះ បានកើនឡើងជិត៦០% ពីមួយឆ្នាំទៅមួយឆ្នាំ ឬស្មើនឹងបរិមាណ៦,៥៩លានតោន នេះដោយសារតែតម្រូវការខ្លាំងក្នុងទីផ្សារជាច្រើន គួបផ្សំនឹងការផ្គត់ផ្គង់ខ្ពស់ពីឃ្លាំងស្តុករបស់រដ្ឋាភិបាល ។
តាមតួលេខសមាគមបង្ហាញថា តម្លៃទឹកប្រាក់នៃការនាំចេញអង្កររបស់ប្រទេសថៃ បានកើនឡើង២២,៤% ពីមួយឆ្នាំទៅមួយឆ្នាំផងដែរ ឬស្មើនឹង៣,២៤ពាន់លានដុល្លារ ។ លោក Charoen Laothamtas ប្រធានសមាគមលើកឡើងថា តម្រូវការហក់ឡើងយ៉ាងសន្ធឹកសន្ធាប់ចាប់តាំងពីខែកក្កដាកន្លងទៅនេះ ពិសេសអង្ករនៅក្នុងប្រទេសអាហ្វ្រិកមួយចំនួន ។
នៅក្នុងរយៈពេល៨ខែដំបូងនៃឆ្នាំ២០១៣ ប្រទេសថៃនាំអង្ករចេញបានត្រឹមតែ៤,១៤លានតោនបុ៉ណ្ណោះក្នុងតម្លៃ ទឹកប្រាក់២,៦៥ពាន់លានដុល្លារ។ ចំណែកក្នុងអំឡុងខែមករា ដល់ខែសីហា ឆ្នាំ២០១៤នេះ ប្រទេសបេណាំង (អាហ្វ្រិកខាងលិច) នាំចូលអង្ករពីថៃបាន៨៥២.៥០២តោន តាមពីក្រោយដោយនីហ្សេរីយ៉ា៤៧៤.៥៦១តោន, ចិន៤៣២.២២០តោន, កូតឌីវ័រ៣៨៣.៦៦៣តោន និងអាហ្វ្រិកខាងត្បូង៣៣៥.៥២៩តោន ។
ក្នុងខែសីហាបានបង្ហាញឱ្យឃើញពីបរិមាណនៃការ នាំចេញអង្ករខ្ពស់បំផុតប្រចាំខែ រហូតមកទល់នឹងពេលនេះដែលមានចំនួន៩២៥.០២៣តោន កើន៣,៥% ពីមួយឆ្នាំទៅមួយឆ្នាំ ។ ជាមួយគ្នានេះដែរ ការនាំចេញអង្ករផ្កាម្លិះក្នុងខែសីហា មានចំនួន១៥២.៨៦៥តោន កើន១៥% ពីមួយខែទៅមួយខែ ។ ក្នុងនោះសហរដ្ឋអាមេរិកជាអ្នកនាំចូលអង្ករប្រភេទនេះច្រើនជាងគេ បំផុតប្រមាណជា២៧.៥៣១តោនតាមពីក្រោយ ដោយទីក្រុងហុងកុង និងសិង្ហបុរី ។
លោក Charoen បន្ថែមថា តម្លៃនាំចេញអង្ករសក្នុងខែកញ្ញា បានឡើងថ្លៃជាងខែសីហា ដោយសារតែតម្រូវការក្នុងស្រុកខ្ពស់នៅក្នុងរដូវដែលផុតការប្រមូលផល ។ កាលពីថ្ងៃទី១ តុលា តម្លៃអង្ករស៥% ត្រូវបានដាក់តម្លៃ៤៣៣ដុល្លារក្នុងមួយតោន ខណៈតម្លៃអង្ករវៀតណាម៤៤០ដុល្លារទៅ៤៥០ដុល្លារ, ឥណ្ឌា៤២០ដុល្លារទៅ៤៣០ដុល្លារក្នុងមួយតោន និងប៉ាគីស្ថាន ។ ជាងនេះទៅទៀត សមាគមបានវាយតម្លៃថា ការនាំចេញអង្កររបស់ថៃក្នុងខែកញ្ញា សម្រេចបាន៩០ម៉ឺនតោន ដោយសារតែតម្រូវការនៅតែខ្ពស់ដដែល ៕
