កំពង់ឆ្នាំង៖ ក្រោយពីកាសែតកម្ពុជាថ្មីបានផ្សាយជាបន្តរបន្ទាប់ អំពីបទល្មើសនៃការកាប់ព្រៃលិចទឹកនិង ការដាក់សម្រាស់ក្នុងតំបន់អភិរក្សពូជត្រីឡូតិ៍ស្តីពាក់កន្ទេល ស្ថិតក្នុងភូមិកោះតាម៉ូវ ឃុំកំពង់ព្រះគគី ស្រុកបរិបូ រណ៍ ខេត្តកំពង់ឆ្នាំង កាលពីសប្តាហ៍មុនរួចមក នាយសង្កាត់រដ្ឋបាលជលផល
បរិបូរណ៍ នាយខ័ណ្ឌរដ្ឋបាលជលផលកំពង់ឆ្នាំង លោកមេឃុំ និងលោកប្រធានសហគមន៍កំពង់ព្រះគរគី បានឆ្លើយបដិសេធថា គ្មានការដាក់សម្រាស់នៅក្នុងឡូតិ៍អភិរក្សនេះឡើយ។មិនតែប៉ុណ្ណោះគេថែមទាំងនិយាយថាការចេញផ្សាយរបស់កាសែតផ្សាយខុសពីការពិតទៀតផង។
ដើម្បីបញ្ជាក់នូវការពិត នៅព្រឹកថ្ងៃទី១៩ ខែតុលា ឆ្នាំ២០១៤ ក្រុមអ្នកយកព័ត៌មានយើងបានជួល និងសហការជាមួយប្រជាពលរដ្ឋ១ក្រុមមាន៩នាក់នៅក្នុងភូមិកោះតាម៉ូវ ទៅរុករកនិងមុជយកសម្រាស់នៅក្នុងដែនអភិរក្ស ខាងលើនេះ។ប៉ុន្តែមុននឹងធ្វើកិច្ចការងារនេះ ក្រុមអ្នកយកព័ត៌មានយើងបានរាយការណ៍ជូនឯ.ឧអភិបាលខេត្ត លោកអភិបាលស្រុកបរិបូរណ៍ លោកនាយខ័ណ្ឌរដ្ឋបាលជលផលកំពង់ឆ្នាំង និងលោកស្នងការនគរបាលខេត្ត អោយបានជ្រាបជាមុន និងរួមសហការ ហើយលោកប្រាប់ថាសូមធ្វើការនេះចុះលោកមិនឃាត់ឃាំងទេ។
នៅវេលាម៉ោង៧និង៣០នាទីព្រឹក ក្រុមអ្នកយកព័ត៌មានយើង និងប្រជាពលរដ្ឋបានចុះទៅដល់ចំណុចព្រែក កោះរ៉ង ដែលប្រជាពលរដ្ឋប្រាប់ថាជាកន្លែងដាក់សម្រាស់របស់ឈ្មោះ ធៀង(អនុប្រធានសហគមន៍) ដើម្បីអោយ អ្នកមុជទឹកចុះរាវរកសម្រាស់ នៅពេលនោះលោក ផាន់ ផល្លា ប្រធានសហគមន៍នេសាទកំពង់ព្រះគរគី និងកូនចៅចំនួន៣នាក់ទៀតបានមកដល់ ហើយព្យាយាមចង់ចាប់ក្រុមអ្នកមុជទឹកយកសម្រាស់នោះ តែក្រោយពីដឹងថា ប្រជាពលរដ្ឋ និងអ្នកមុជទឹកនោះគឺ ក្រុមអ្នកយកព័ត៌មានយើងជាអ្នកជួលមក ទើបគេដកថយទៅវិញហើយគេច ខ្លួនបាត់។
នៅចំណុចនេះក្រុមអ្នកមុជទឹកយើងបានអោយដឹងថា មានសម្រាស់ថ្មីៗដែលខ្លះមិនទាន់ជ្រុះសន្លឹកផង រាប់ពាន់ក ដែលជនល្មើសបានបោះបង្គោលជុំវិញមិនអោយប៉ើងតាមទឹកហូរដែលទឹកមានជម្រៅជាង៤ម៉ែត្រ និង នៅចំណុចនេះក្រុមអ្នកមុជទឹកបានមុជយកសម្រាស់ជាង៥០កមកបង្ហាញ។នៅចំណុចព្រែក៤មុខ ជាសម្រាស់របស់ឈ្មោះ តុន កូនចៅនៅក្នុងសហគមន៍ ត្រូវបានក្រុមអ្នកមុជទឹកយើងអោយដឹងថា៖មានកសម្រាស់រាប់ពាន់ក ដូចចំណុចព្រែកកោះរ៉ងដែរ។
ពេលក្រុមអ្នកយកព័ត៌មានយើង និងក្រុមប្រជាពលរដ្ឋយើងកំពុងបើកកាណូតទៅរុករកសម្រាស់បន្តទៀតនៅចំណុចព្រែករណ្តំ ពេលនោះលោក គង់ គឹមហាក់ មេឃុំកំពង់ព្រះគរគី ដែលជិះលើបាឡាលោក យឹម ហ៊ាន នាយប៉ុស្តិ៍រដ្ឋបាលនគរបាលស្តីទីកំពង់ ព្រះ គរគី បានឃាត់ក្រុមកាណូតរបស់ប្រជាពលរដ្ឋ និងកាណូតក្រុមអ្នកយកព័ត៌មានយើង ដោយបាននិយាយខ្លាំង ៗថា៖«ហ៊ានដឹកសម្រាស់ទាំងកណ្តាលថ្ងៃផងហ្អី រកតែមុខប្រជាជនល្អនឹងហើយ និងបានរៀបចំគម្រោងបានល្អទៀតផង គឺត្រូវចាប់ដាក់គុកទាំងអស់(សម្តីខាងលើនេះគឺលោកមេឃុំបានចោទប្រជាពលរដ្ឋថា ជាជនល្មើសម្ចាស់ សម្រាស់ រួមគំនិតជាអ្នកកាសែតរុករក
សម្រាស់ ដើម្បីទំលាក់កំហុសមកលើអាជ្ញាធរ និងសហគមន៍) ប៉ុន្តែក្រោយ ពីបានតវ៉ាគ្នាយ៉ាងតឹងសសៃកជាមួយក្រុមអ្នកកាសែតយើងរួចមក លោកមេឃុំមិនហ៊ានឃាត់ខ្លួនប្រជាពលរដ្ឋ និងក្រុមអ្នកកាសែតយើងទេគឺបាមត្រឹមតែគំរាមប៉ុណ្ណោះ។នៅក្នុងចំណុចកណ្តាលព្រែករណ្តំ គេពិនិត្យឃើញព្រៃលិចទឹកម្តុំនោះ ត្រូវបានគេកាប់មែកអស់នៅសល់តែគល់ ហើយពេលក្រុមអ្នកមុជទឹកចុះរាវរកបានប្រទះឃើញសម្រាស់ថ្មីៗ និងសម្រាស់សល់ពីឆ្នាំមុនមួយចំនួនដែល មានចងភ្ចាប់ជាមួយការ៉ុងនុយអប់ដាក់ក្នុងសម្រាស់អោយត្រីកុំ ងាយស្រួលហ៊ុំចាប់យក។
ដោយឡែកនៅចំណុចក្បាលពាមព្រែករណ្តំវិញដែលប្រជាពលរដ្ឋអោយដឹងថា ជាចំណុចដាក់សម្រាស់របស់ឈ្មោះ ហោ ជាកូនលោកមេឃុំត្រូវបានអ្នកមុជទឹកមុជរាវរកអោយដឹងថា មានសម្រាស់ប្រមាណជិត១ពាន់កដែលត្រូវបានជនល្មើស បោះ បង្គោលទប់ជុំវិញ និងចងរឹតខ្សែនីឡុងពីលើកុំអោយទឹកហូរប៉ើង។នៅក្នុងចំណុចទាំង៤ស្ថិតក្នុងតំបន់ឡូតិ៍អភិរក្ស នេះ ក្រុមប្រជាពលរដ្ឋមុជទឹកយកបានរាវរកឃើញជាង១០០កប៉ុណ្ណោះ ដើម្បីទុកវត្ថុតាងបង្ហាញសមត្ថកិច្ចជំនាញ និងអាជ្ញាធរ ប៉ុន្តែនៅក្នុងចំណុចទាំង៤នោះ នៅមានសម្រាស់រាប់ពាន់កទៀត ដែលយើងមិនអាចយកអស់។នៅវេលាម៉ោង៨និង៣៦នាទីឯ.ឧ ឈួរ ច័ន្ទឌឿន
អភិបាលខេត្តកំពង់ឆ្នាំងបាននិយាយតាមទូរស័ព្ទអោយក្រុមអ្នកយកព័ត៌មានយើងដឹងថា៖ឯ.ឧបានបញ្ជារអោយលោកអភិបាលស្រុក លោកនាយខ័ណ្ឌ ចុះទៅពិនិត្យជាក់ស្តែងនៅក្នុងតំបន់អភិរក្សខាងលើនេះហើយ ប្រសិនបើមានបទល្មើសនេះពិតមែន ត្រូវតែចាត់ការកសាងសំណុំរឿងជនល្មើសទៅតាមនិតិវិធីបញ្ជូនទៅកាន់តុលាការ។ក្រោយពីមានបញ្ជាររបស់លោកអភិបាលខេត្ត លោកស្នងការនគរបាលខេត្ត លោកនាយខ័ណ្ឌរដ្ឋបាលជលផលកំពង់ឆ្នាំង នៅវេលាម៉ោង១៤និង១៥នាទី យើងបានឃើញលោក ថាន់ សារុំ អភិបាលរងស្រុកបរិបូរណ៌ លោក ម៉ប់ សាមុន នាយរងផ្នែករដ្ឋបាលជលផលផ្សារឆ្នាំង លោក ឈឹម បាន នាយរងសង្កាត់ជលផលបរិបូរណ៌ លោក អធិ ការរងនគរបាលស្រុកបរិបូរណ៍ និងសហការីបានមកដល់
ចំណុចព្រែកពាមរណ្តំ ដើម្បីរួមសហការនិងពិនិត្យ ជាមួយក្រុមអ្នកយកព័ត៌មានយើង និងក្រុមប្រជាពលរដ្ឋដែលមុជយកសម្រាស់នៅក្នុងព្រែកចំណុចពាមរណ្តំ ក្នុង តំបន់អភិរក្សអោយបានឃើញជាក់ស្តែងនឹងភ្នែក។ក្នុងពេលនោះដែរអ្នកមុជទឹកបានមុជ យកសម្រាស់មួយចំនួន ទៀតមកបញ្ជាក់ការពិតជូនមន្ត្រីជំនាញ សមត្ថកិច្ច និងអាជ្ញាធរស្រុកដែលបានចុះមកពិនិត្យក្នុងរឿងនេះ ហើយ អស់លោកក៏បានទទួលស្គាល់ថា ពិតជាមានបទល្មើសដាក់សម្រាស់ និងកាប់បំផ្លាញព្រៃលិចទឹកនៅក្នុងចំណុចខាងលើនេះពិតមែនមិនបដិសេធទៀតទេ។សម្រាស់ទាំងអស់ដែលរាវរកឃើញនេះ ត្រូវបានមន្ត្រីជំនាញជលផល អោយប្រជាពលរដ្ឋដឹកយកមកដាក់នៅទីទួលវត្តកំពង់ព្រះគរគីកាប់ជាកំណាត់តូចៗបំផ្លាញចោល។សកម្មភាពគំរាមចាប់ខ្លួនក្រុមប្រជាពលរដ្ឋស្មោះត្រង់ជួយបង្ហាញបទល្មើស និងក្រុមអ្នកសារព័ត៌មានយើង របស់លោកប្រធានសហគមន៍ និងលោកមេឃុំ នៅព្រឹកថ្ងៃទី១៩ ខែតុលា ឆ្នាំ២០១៤នេះ គឺជា
ការគំរាមកំហែងទៅ លើក្រុមប្រជាពលរដ្ឋស្មោះត្រង់ដែលស្ម័គចិត្តសហការបង្ហាញការពិត និងជាការគំរាមកំហែងមកលើសិទ្ធសេរីភាព មកលើក្រុមអ្នកសារព័ត៌មានយើងក្នុងការចុះយកព័ត៌មានពិត បំបែកសំណុំរឿងក្នុងការដាក់សម្រាស់ និងកាប់បំ ផ្លាញព្រៃលិចទឹកនៅក្នុងតំបន់អភិរក្សឡូតិ៍ស្តីពាក់កន្ទេលខាងលើនេះ។
ប្រជាពលរដ្ឋនៅក្នុងភូមិកោះតាម៉ូវនិងក្រុមអ្នកសារព័ត៌មានយើង សំណូមពរយ៉ាងទទូចដល់ឯ.ឧ ណៅ ធួក ប្រធានរដ្ឋបាលជលផល,ឯ.ឧ ឈួរ ច័ន្ទឌឿន អភិបាលខេត្តកំពង់ឆ្នាំង សម្ថកិច្ច និងមន្ត្រីជំនាញ ជួយស្រាវជ្រាវវែកមុខនិងចាប់ខ្លួនជនល្មើសអោយបាន ដោយពួកគេបានធ្វើសកម្មភាពកាប់បំផ្លាញព្រៃលិចទឹក និងយកសម្រាស់មកដាក់នៅក្នុងតំបន់អភិរក្សខាងលើគឺជាបទល្មើសយ៉ាងធ្ងន់ធ្ងរមិនគួរអត់អោនអោយឡើយ។នៅក្នុងរឿងបទល្មើសខាងលើនេះ ប្រជាពលរដ្ឋនៅក្នុងឃុំកំពង់ព្រះគរគី មានការខឹងយ៉ាងខ្លាំងផងដែរគឺ ស្នើសុំថ្នាក់លើដកលោក ផាន់ ផល្លា ចេញពីប្រធានសហគមន៍នេសាទព្រោះថា៖កន្លងមកធ្លាប់លោកបានទារយក ប្រាក់ពីប្រជានេសាទដាក់របាំងក្នុងរដូវបិតនេសាទពី២លានទៅ២លានកន្លះ និងទារយកប្រាក់ពី
ការដាក់សម្រាស់ ក្រៅតំបន់អភិរក្សក្នុងឆ្នាំនេះរហូតដល់៥០ម៉ឺនរៀលក្នុងសម្រាស់មួយកន្លែងៗ ហើយគេបានឃុបឃិតជាមួយជន ល្មើសជាសាច់ញាតិបងប្អូន អោយដាក់សម្រាស់នៅក្នុងតំបន់អភិរក្សថែមទៀតផង។ចំណែកលោក គង់ គឹមហាក់ មេឃុំកំពង់ព្រះគរគីវិញ ដែលអសកម្មនឹងការងារបណ្តែតបណ្តោយអោយកើតមានបទល្មើសយ៉ាងធ្ងន់ធ្ងរនៅក្នុង តំបន់អភិរក្សនៅក្នុងមូលដ្ឋានខ្លួនទទួលខុតត្រូវ តើគួរចាត់ការយ៉ាងណាដែរ ឬទុអោយគាត់ធ្វើបែបតទៅទៀត…!៕
