ភ្នំពេញ ៖ បុរសជាជនសង្ស័យម្នាក់ត្រូវប្រជាពលរដ្ឋព្រួតវាយយ៉ាងទ្រោមខ្លួន ខណៈដែលព្យាយាមកាច់កម៉ូតូមួយគ្រឿងម៉ាកសងឌ្រីមC125 ស៊េរី២០១៤ តែមិនបានសម្រេច ដែលហេតុការណ៍នេះបានកើតឡើងកាលពីវេលាម៉ោង៩និង១០នាទីយប់ថ្ងៃទី៦ខែមិនាឆ្នាំ២០១៤ ត្រង់ចំណុច ក្រុមទី១ សង្កាត់ទួលទំពូង១ ខណ្ឌចំការមន។
ប្រភពព័ត៌មានពីប្រជាពលរដ្ឋដែលនៅកន្លែងកើតហេតុបានឱ្យដឹងថា មុនពេលកើតហេតុគេឃើញជនសង្ស័យ២នាក់ជិះម៉ូតូសង់ឌ្រីមC125 ពណ៌ខ្មៅមួយគ្រឿងមិនចាំស្លាកលេខ បានជិះចូលទៅក្នុងច្រកផ្ទះប្រជាពលរដ្ឋខាងលើ ខណៈនោះបុរសជាជនសង្ស័យម្នាក់បានចុះពីលើម៉ូតូរួចធ្វើសកម្មភាពព្យាយាមកាច់កម៉ូតូមួយគ្រឿងម៉ាកសង់ឌ្រីមC125 ស៊េរី២០១៤ ពណ៌ខ្មៅ ពាក់ស្លាកលេខ ភ្នំពេញ 1 CC-7787 ហើយផ្ដាច់ខ្សែភ្លើងម៉ូតូរួចព្យាយាមបញ្ឆេះម៉ូតូរត់គេច តែត្រូវម្ចាស់ម៉ូតូឃើញស្រែកឮដល់ប្រជាពលរដ្ឋ ដែលនៅជិតខាងចេញមកដេញចាប់ ដល់ចំណុចផ្ទះលេខ៦១ តាមបណ្ដោយផ្លូវ១៥៥ ក៏ចាប់បានជនសង្ស័យម្នាក់ខាងលើ រួចបានព្រួតវាយបណ្ដាលអោយជនសង្ស័យរងរបួសធ្ងន់។
ជនសង្ស័យខាងលើមានឈ្មោះ ហេង ចំរើន អាយុ១៨ឆ្នាំមុខរបរមិនពិតប្រាកដ ស្នាក់នៅសង្កាត់តាខ្មៅ ខេត្តកណ្ដាល។ចំណែកជនសង្ស័យម្នាក់ទៀតបានជិះម៉ូតូរត់គេចខ្លួនបាត់ស្រមោល។ ក្រោយពេលកើតហេតុ ជនរងគ្រោះបានដាក់ពាក្យបណ្ដឹងនៅប៉ុស្ដិ៍នគរបាលទួលទំពូង១ ដើម្បីអោយសមត្ថកិច្ចកសាងសំណុំរឿងបញ្ជូនជនសង្ស័យទៅតុលាការផ្ដន្ទាទោសតាមផ្លូវច្បាប់៕