កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្ដម អ៊ុន ចាន់ដា បានថ្លែងថា ការអភិវឌ្ឍមុខរបរ និងការងាររាជរដ្ឋាភិបាលបានខិតខំកៀរគរ និងជម្រុញការវិនិយោគ ដែលបានបង្កើតឱកាសការងារ សម្រាប់កម្មករនិយោជិតរាប់ម៉ឺននាក់ ថ្លែងបែបនេះក្នុងឱកាសអបអរសាទរខួបអនុស្សាវរីយ៍ លើកទី១៣៨ នៃទិវាពលកម្មអន្តរជាតិ ១ឧសភា ក្រោមប្រធានបទ «សហគ្រាសមួយជាសហគមន៍សុខសាន្តមួយ» ដែលបានធ្វើឡើងនៅសាលាខេត្តកំពង់ចាម នាព្រឹកថ្ងៃទី២៧ ខែមេសា ឆ្នាំ២០២៤ ។
ក្នុងឱកាសនោះដែរ ឯកឧត្ដម អ៊ុន ចាន់ដា បានថ្លែងថា ខេត្តកំពង់ចាមមានរោងចក្រ សហគ្រាស គ្រឹះស្ថានសរុប ៥១៤ សហគ្រាស កម្មករ និយោជិតសរុប ៤១.៥០៩នាក់ ស្រី ២៩.៤៧៧នាក់ ក្នុងនោះឧស្សាហកម្មវាយនភណ្ឌកាត់ដេរ និងផលិតស្បែកជើងមានចំនួន២១កន្លែង កម្មករ និយោជិតចំនួន ២៥.៨៨៨នាក់ ស្រី ២៣.០៣៣នាក់ ក្នុងនោះកម្មករនិយោជិតវិស័យកាត់ដេរសំលៀកបំពាក់ និងស្បែកជើង ម្នាក់ៗ ទទួលបានប្រាក់ចំណូលជាមធ្យម ២៥០ដុល្លារអាមេរិក និងវិស័យផ្សេងៗ ទទួលបានប្រាក់ចំណូល ជាមធ្យម ២៣០ដុល្លារអាមេរិក បើគិតប្រាក់ឈ្នួលរបស់កម្មករ និយោជិតជាមធ្យមប្រចាំឆ្នាំវិស័យ កាត់ដេរសំលៀកបំពាក់ ផលិតស្បែកជើង និងវិស័យផ្សេងៗ ប្រមាណជា ១២០លានដុល្លារអាមេរិក បានរួមចំណែកបង្កើនចំណូលរបស់ប្រជាជនខេត្តកំពង់ចាម ប្រចាំឆ្នាំ (GDP) ក្នុងម្នាក់ៗ ចំនួន ១.៦៩៣ដុល្លារអាមេរិក។
ឯកឧត្ដម អ៊ុន ចាន់ដា អភិបាលខេត្តកំពង់ចាម បានគូសបញ្ជាក់ថា អនុវត្តដោយជោគជ័យនូវយុទ្ធសាស្ត្រចតុកោណទាំង៤ ដំណាក់កាល រាជរដ្ឋាភិបាល នីតិកាលទី៧ បានដាក់ចេញនូវយុទ្ធសាស្ត្របញ្ចកោណ-ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាពនៅកម្ពុជា ដោយផ្តោតការយកចិត្តទុកដាក់យ៉ាងខ្លាំងលើកំណែ ទម្រង់លើគ្រប់វិស័យ។ ជាមួយគ្នានេះវិស័យការងារ ការអនុវត្តលក្ខខណ្ឌការងារ និងសុខដុមនីយកម្ម ទំនាក់ទំនងវិជ្ជាជីវៈ កាន់តែមានភាពប្រសើរឡើង។
តាមរយៈប្រសិទ្ធភាពនៃប្រព័ន្ធអធិការកិច្ច ការងារដែលបានបង្កភាពងាយស្រួល និងទទួលបានការពេញចិត្តពីសំណាក់កម្មករនិយោជិត និយោជក នៅតាមរោងចក្រ សហគ្រាស គ្រឹះស្ថាននានា។ បញ្ហាកូដកម្ម បាតុកម្មត្រូវបាន អន្តរាគមន៍ដោះស្រាយ ដល់ទីកន្លែង សំដៅរក្សាបាននូវភាពសុខដុមក្នុងដំណើរការផលិតកម្ម និង ទប់ស្កាត់សកម្មភាពល្មើសច្បាប់ផ្សេងៗ ផងដែរ ៕
