សៀមរាប : លោកអនុសេនីយ៍ឯក នួន ស័ក្កិចំរើនរិទ្ធ អធិការរងនគរបាលក្រុងសៀមរាបទទួលបន្ទុកព្រហ្មទ័ណ្ឌបានឲ្យអ្នកដឹងថាដោយ អនុវត្តតាមការយកចិត្តទុកដាក់ខ្ពស់ជាប្រចាំពីសំណាក់លោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាបក៏ដូចជា ដើម្បីធ្វើឲ្យការ អនុវត្តនូវគោលនយោបាយភូមិឃុំមានសុវត្ថិភាពឲ្យកាន់តែមានប្រសិទ្ធភាពខ្ពស់ថ្វេរដងព្រោះខេត្តសៀមរាបជាតំបន់ទេសចរណ៍ផងនោះ ។
ជាក់ស្តែងកាលពីរសៀលថ្ងៃទី៣០ ខែ តុលា កន្លងទៅ កម្លាំងនគរបាលនៃអធិការដ្ឋាននគរបាលក្រុងសៀមរាបព្រមទាំងកម្លាំងនគរបាលព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តសៀមរាបបានសហការណ៍គ្នាយ៉ាងល្អធ្វើការបង្ក្រាបទីតាំងបើកអោយមានការលេងល្បែងស៊ីសងជល់មាន់ជាយូរមកហើយនៅត្រង់ចំណុចអតីតភូមិភាគ៤ស្ថិតក្នុងភូមិខ្វៀន សង្កាត់គោកចកក្រុង និង ខេត្តសៀមរាប ។
លោកអនុសេនីយ៍ឯក នួន ស័ក្កិចំរើនរិទ្ធ បានបន្តឲ្យដឹងទៀតថា ក្នុងកិច្ចចុះប្រតិបត្តិការណ៍ធ្វើការបង្ក្រាបទីតាំងបើកកន្លែងជល់មាន់ដុះស្លែរនៅតំបន់ខាងលើនេះសមត្ថកិច្ចបានធ្វើការ បង្ក្រាបនិងរឹបអូសយកបាននូវវត្ថុតាងជាច្រើនរួមមានសង្វៀងជល់មាន់ ចំនួន ពីរ មាន់ចំនួន ៤ ក្បាល និង សម្ភារមួយចំនួន ឡានកាម៉ារី សេរី ៩៥ មួយ គ្រឿង និង ម៉ូតូអ្នកចូលទៅលេង
ចំនួន ២២ គ្រឿង ផងដែរ ។ លោកអនុសេនីយ៍ឯក នួន ស័ក្កិចំរើនរិទ្ធ អធិការរងនគរបាលក្រុងសៀមរាបបាននិយាយអោយដឹងទៀតថា នៅពេលដែលសមត្ថកិច្ចទៅដល់កន្លែងជល់មាន់ដុះស្លែរដែលកំពុងតែនាំគ្នាលេងយ៉ាងគគ្រឹកគ្រេងនោះក្រុមអ្នកញៀនលេងល្បែងជល់មាន់បាននាំគ្នារត់ចែកជើងគ្នាព្រាត បន្សល់ទុកតែវត្ថុតាងនៅនិងកន្លែង ។
បច្ចុប្បន្នវត្ថុតាងទាំងអស់ខាងលើត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលក្រុងសៀមរាបដើម្បីចំណាត់ការទៅតាមនិតិវិធីជាបន្ត ។ ជាប់ពាក់ព័ន្ធជុំវិញបទល្មើសខាងលើប្រភពព័ត៍មានពីប្រជាពលដែលរស់នៅក្នុងតំបន់នោះបានសម្តែងនូវការពេញចិត្តយ៉ាងខ្លាំងចំពោះសមត្ថកិច្ចក្នុងកិច្ចចុះប្រតិបត្តិការណ៍ធ្វើការបង្ក្រាបទីតាំងបើកកន្លែងជល់មាន់ដុះស្លែរ មួយកន្លែងនេះផងដែរ ។
ដែលពីមុនកន្លែងជន់មាន់នេះមិនងាយនិងមានសមត្ថកិច្ច ឫ ក៏ អាជ្ញាធរមានសមត្ថកិច្ចណាហានធ្វើការបង្ក្រាបនោះទេទើបតែពេលនេះដើម្បីអនុវត្តនូវគោលនយោបាយភូមិឃុំមានសុវត្ថិភាពឲ្យកាន់តែមានប្រសិទ្ធភាពខ្ពស់នោះទើបសមត្ថកិច្ចសម្រេចបានលិទ្ធផលជាផ្លែផ្កាបែបនេះ៕
ដោយ លោក ខេង ខេមរា
