កំពង់ធំៈ បេនឡានអាណាធិបតេយ្យ ត្រូវបានធ្វើសកម្មភាពរញ៉េរញ៉ៃ ពេញដងផ្លូវសាធារណៈ យកចំណីផ្លូវជាតិលេខ៦ ធ្វើជាចំណត់ឡាន ចាប់ពីមុខភោជនីយ៍ដ្ឋាន ស៊ីគីម៉ិចរហូតដល់គល់ស្ពានស្ទោង ដែលមានប្រវែងជិត១០០០ម៉ែត្រ ត្រូវបានអាជ្ញាធរស្រុកស្ទោង បណ្តែតបណ្តោយឲ្យតាក់ស៊ីចាប់ម៉ូយយ៉ាងជក់ជិត ដោយមិនខ្វល់ពីសំណាក់លោក ប៉ូលិស សណ្តាប់ធ្នាប់ និងអាជ្ញាធរសូម្បីតែបន្តិច និងជាហេតុបង្ករភាពក្តីក្រហាយដល់អ្នកធ្វើដំណើរលើផ្លូវសាធារណៈ ។
ជារៀងរាល់ព្រឹកគេតែងតែសង្កេតឃើញ តៃកុងកាត់ស៊ីប្រដេញម៉ូតូឌុប ដេញដណ្តើមម៉ូយគ្នា ប្រសាចពេញថ្នល់បង្ករភាពភ័យខ្លាចដល់អ្នកធ្វើដំណើរ ពីការបាត់បង់នូវទ្រព្យសម្បត្តិនិងគ្រោះថ្នាក់ដោយប្រការផ្សេងៗ ដោយសារតែកន្លងមកអ្នកធ្វើដំណើរបានរអ៊ូរទាំងពីការបាត់បង់សម្ភារៈដោយគ្មានការទទួលខុសត្រូវពីម្ចាស់ឡាន តែទោះជាមានភាពមិន ប្រកតីបែបនេះក្តីក៏ ក៏ពុំមានការកែសម្រួលចរាចរណ៍ និងរៀបចំសណ្តាប់ធ្នាប់ពីសំណាក់ប៉ូលិសនោះទេ គឺមានតែដើរ យកលុយឡានយ៉ាងរំភើយ។
ប្រជាពលរដ្ឋ បានងឿងឆ្ងល់យ៉ាងខ្លាំងចំពោះអាជ្ញាធរស្រុកស្ទោង និងអ្នកទទួលម៉ៅការភាស៊ីបេនឡាន ថាប្រហែលជា មានការឃុបឃិតគ្នាស៊ីសំណូកសូកប៉ាន់ជាមិនខានឡើយ ដោយសារតែបេនឡានស្រុកស្ទោងពុំមានកន្លែងឲ្យចតឡានបានត្រឹមត្រូវនោះទេ បែរជានាំគ្នាយកការ៉ាស់សាំងធ្វើជាបេនឡាន យកថ្នល់ធ្វើជាបេនឡាន យកសួនច្បារធ្វើជា បេនឡាន ដោយមិនមានការទទួលខុសត្រូវ បង្ករការកកស្ទះចរាចរណ៍ពេញផ្លូវ
មិនតែប៉ុណ្ណោះអ្នកទទួលម៉ៅការភាស៊ី ពុំមានការរៀបចំណត់ឲ្យមានសុវត្តិភាពត្រឹមត្រូវ ដល់អ្នកធ្វើដំណើរ និងអ្នករត់តាក់ស៊ី បែរជាដើរយកតែភាស៊ីមិនតែប៉ុណ្ណោះបានឃុបឃិតគ្នាយកចំណត់រថយន្តសង់ជាតូបឲ្យអាជីវករលក់ជំនួសការចតរថយន្ត រីឯរថយន្តកាត់ស៊ីបែរជា យកចំណីផ្លូវធ្វើជាចំណតជំនួសវិញ ជាហេតុធ្វើអោយមានការសង្ស័យថា មានការឃុបឃិតពុករលួយពីសំណាក់អាជ្ញាធរស្រុក និងអ្នកដេញថ្លៃភាស៊ី ដោយសារតែគេឃើញជាច្រើនអណ្ណតិមកហើយ ពុំមានការផ្លាស់ប្តូរអ្នកម៉ៅការភាស៊ី បេនឡាននោះទេ ហើយការអភិវឌ្ឍន៍ក៏ពុំមានការរីកចម្រើនបន្តិចសោះឡើយ ។
ប្រជាពលរដ្ឋជាច្រើនសំណូមពរឲ្យអាជ្ញាធរស្រុក និងកំលាំងសមត្ថកិច្ច ជួយកែសម្រួលភាពរញ៉េរញ៉ៃ លុបចោលទាំងស្រុង នូវការដេញ ប្រទាញដណ្តើមម៉ូយគ្នានាំឲ្យមានគ្រោះថ្នាក់ និងរៀបចំចំណតរថយន្តឲ្យបានត្រឹមត្រូវកុំឲ្យយក ចំណីផ្លូវធ្វើជាចំណតរថយន្ត នឹងថែរក្សាសំអាតបរិស្ថានអានាម័យ ព្រមទាំងសំណូមពរឲ្យធ្វើការដេញថ្លៃជាសាធារណៈ ក្នុងការទទួលខុសត្រូវកែលំអរអភិវឌ្ឍន៍ចំណតរថយន្ត ។ ដោយ នាគរាជ
