ភ្នំពេញ ៖ បុរសម្នាក់ដែលត្រូវក្រុមចោរប្លន់ប្រដាប់អាវុធបាញ់មួយគ្រាប់ធ្លាយគូទប្លន់យកម៉ូតូCBRកាលពីមួយខែមុនដែលមិនបានសម្រេចនោះ ពេលនេះក៏ត្រូវបានក្រុមចោរប្លន់យកម៉ូតូម្ដងទៀតម៉ាកផូសហ្សា នៅតែមិនបានសម្រេចទៀត តែត្រូវរងរបួសនារីដែលជាសង្សារ កាលពី
វេលាម៉ោង៩យប់ថ្ងៃទី១១ខែមិនាឆ្នាំ២០១៤ នៅចំណុចផ្លូវបេតុងឃុំថ្មគោល សង្កាត់ចោមចៅ ខណ្ឌពោធិ៍សែនជ័យ។
តាមការអោយដឹងពីបុរសដែលត្រូវគេដេញប្លន់ម៉ូតូខាងលើនេះបានអោយដឹងថា នៅមុនពេលកើតហេតុគេបានជិះម៉ូតូម៉ាកផូសហ្សា ពណ៌ខ្មៅ អត់ស្លាកលេខ ដឹកនារីម្នាក់ជាសង្សារពីរង្វង់មូលចោមចៅគោលបំណងចង់ជិះដើរលេង ស្រាប់តែលេចមុខជនសង្ស័យចំនួន៦នាក់ជិះម៉ូតូ៣គ្រឿងសុទ្ធតែស៊េរីឌ្រីមសង់C125 ទាំងអស់បានជិះដេញតាមរូបគេពីក្រោយ ខណៈមកដល់ចំណុចផ្លូវបេតុងកន្លែងកើតហេតុខាងលើ គេក៏ជិះម៉ូតូលឿនហើយស្រាប់តែមិនដល់ចំណុចកែងផ្លូវបេតុងគេក៏បានឃើញសមត្ថកិច្ចកំពុងឈប់ម៉ូតូល្បាតគេក៏បានជិះទៅរកសមត្ថកិច្ច ស្រាប់តែជនសង្ស័យនោះជិះមកទាន់ហើយក៏ទាញដែកឆាបមួយសំដៅមកចាក់រូបគេជាអ្នកបើកម៉ូតូ ប៉ុន្តែដោយការជិះម៉ូតូលឿនធ្វើអោយក្រុមចោរនោះចាក់ត្រូវនារីដែលត្រូវជាសង្សារកំពុងអង្គុយពីក្រោយត្រូវមួយឆែកឆាបចំបោះដៃផុតខាងឆ្វេងហើយជនល្មើសខាងលើក៏បានជិះម៉ូតូគេចខ្លួនបាត់ស្រមោលភ្លាមៗតែម្ដង។
ទាក់ទិននិងករណីនេះសំណាងដែរមានសមត្ថកិច្ចដែលឈរនៅគោលដៅកំពុងធ្វើការល្បាតកុំអីប្រហែលជាក្រុមចោរប្លន់ដែលតែងតែធ្វើសកម្មភាពប្លន់នៅសង្កាត់ចោមចៅនេះប្លន់បានសម្រេចទៀតហើយ។
បន្ទាប់ពីកើតហេតុជនរងគ្រោះត្រូវបានដឹកតាមម៉ូតូយកមកព្យាបាលនៅមន្ទីរពេទ្យឯកជនវិសាលសុខ២ ដើម្បីព្យាបាលភ្លាមៗ ហើយនារីរងគ្រោះនេះឈ្មោះ ផាន សុផាត ភេទស្រីអាយុ១៩ឆ្នាំមុខរបរជាអ្នកបកប្រែភាសាចិន ស្នាក់នៅ ឃ្យូ អែន អាយ (Q&I) សង្កាត់ចោមចៅ ខណ្ឌពោធិ៍សែនជ័យ ចំណែកបុរសរងគ្រោះឈ្មោះ ខា សុខឌីម ភេទប្រុសអាយុ២៩ឆ្នាំមុខរបរអ្នកម៉ៅការជាងសំណង់ ស្នាក់នៅសង្កាត់ទឹកថ្លា ខណ្ឌសែនសុខ។បច្ចុប្បន្ននារីរងគ្រោះនិងបុរសរងគ្រោះខាងលើសមត្ថកិច្ចកំពុងធ្វើការសាកសួរពីករណីខាងលើនេះ ព្រោះការសន្និដ្ឋានរបស់សមត្ថកិច្ចថារឿងនេះអាចជាករណីស្នេហាត្រីកោណ ឬជាករណីគំនុំ ព្រោះថាបើជនល្មើសចង់ប្លន់យកម៉ូតូមិនមែនដេញតាមតាំងពីរង្វង់ម៉ូតូចោមចៅមកដល់ចំណុចកើតហេតុខាងទើបធ្វើសកម្មភាពប្លន់បែបនេះនោះទេ។
ប្រជាពលរដ្ឋក៏បានដាក់សំណួរទៅលោកមេប៉ុស្ដិ៍ចោមចៅ ម៉ម ហោ ថា តើលោកគួរមានវិធានការណ៍យ៉ាងណាចំពោះរាល់បទល្មើសឆក់ប្លន់ដែលតែងតែកើតមានឡើងនៅក្នុងមូលដែលលោកបានគ្រប់គ្រងនេះ?
គួរបញ្ជាក់ថាកាលពីវេលាម៉ោង ២និង ៥០នាទី យប់រំលងអាធ្រាត្រឈានចូលថ្ងៃទី០៨ ខែកុម្ភៈឆ្នាំ ២០១៤ នៅតាមបណ្តោយផ្លូវវ៉េងស្រេង ស្ថិតក្នុងភូមិត្រពាំងថ្លឹងសង្កាត់ចោមចៅ ខណ្ឌពោធិ៍សែនជ័យ ក្រុមចោរប្លន់ប្រដាប់អាវុធ២នាក់បានធ្វើសកម្មភាពជិះម៉ូតូ១គ្រឿងម៉ាកឌ្រីមសង់C125 ពណ៌ខ្មៅ មិនចាំស្លាកលេខ បានព្យាយាមជិះដេញតាមជនរងគ្រោះខាងលើហើយក៏បានធ្វើសកម្មភាពដកកាំភ្លើងភ្ជង់ជនរងគ្រោះអោយឈប់ម៉ូតូ តែជនរងគ្រោះមិនព្រមឈប់នោះក៏ក្រុមចោរនោះបានបាញ់ប្រហារទៅលើជនរងគ្រោះដែលកំពុងជិះម៉ូតូចំនួន៣គ្រាប់ តែត្រូវមួយគ្រាប់ចំកំប៉េះគូទជនរងគ្រោះបៀមគ្រាប់ជាប់ បណ្ដាលអោយម៉ូតូដួលធ្លាក់ចូលថ្លុកទឹក ដោយឃើញដូចនេះក្រុមចោរខាងលើមើលសភាពការណ៍ដូចមិនស្រួលក៏បានគេចខ្លួនបាត់ស្រមោលពីកន្លែងកើតហេតុភ្លាមៗ៕
