ខេត្តរតនគិរីៈ សាលប្រជុំនៅសណ្ឋាគាររតនស៊ីធីនាព្រឹកថ្ងៃទី២២ ខែវិច្ឆិកា ឆ្នាំ២០១៤ សាលាដំបូងខេត្តរតនគិរីនៃព្រះរាជាណាចក្រកម្ពុជា បានប្រារព្ធពិធីជួបប្រជុំទី២ឆ្នាំ២០១៤ ជាមួយតុលាការប្រជាជនខេត្តយ៉ាឡាយនៃសាធារណៈរដ្ឋសង្គមនិយមវៀតណាម ដោយមានលោកសូស ឡា ប្រធាន
សាលាដំបូងខេត្តរតនគិរីនិងឯកឧត្តម ដាំង ផានជុង ប្រធានតុលាការប្រជាជនខេត្តយ៉ាឡាយ និងសមាជិសមាធិការនៃស្ថាប័នបតុលាការទាំងពីរខេត្តជាច្រើនរូបទៀត។
ជាលទ្ធផលនៃកិច្ចជំនួបទ្វេរភាគីរវាងតុលាការទាំងពីរនាពេលកន្លងមកតាមកំណត់ហេតុចងចាំចំនួន២ ធ្វើនៅតុលាការប្រជាជនខេត្តយ៉ាឡាយនៃសាធារណរដ្ឋសង្គមនិយមវៀតណាមនិងបានធ្វើបទបង្ហាញនៃច្បាប់អន្តោប្រវេសន៍នៃព្រះរាជាណាចក្រកម្ពុជា ដោយភាគីសាលាដំបូងខេត្តរតនគិរី។ តំណាងតុលាការប្រជាជនខេត្តយ៉ាងឡាយ បានផ្សព្វផ្សាយច្បាប់ស្តីពីអន្តោប្រវេសន៍ និងការស្នាក់នៅ ការខ្ចីផ្លូវឆ្លងកាត់របស់ជនបរទេសនៅប្រទេសវៀតណាម។
កិច្ចប្រជុំបានពិភាក្សា ផ្លាស់ប្តូរយោបល់យ៉ាងផុលផុសលើប្រធានបទស្តីពីច្បាប់អន្តោប្រវេសន៍នេះក៏ដូចជាវិធានការណ៍ទប់ស្កាត់បទល្មើសឆ្លងដែននានារវាងខេត្តទាំងពីរ។
ទន្ទឹមនោះភាគីសាលាដំបូងខេត្តរតនគិរីក៏បានលើកឡើងអំពីសេចក្តីណែនាំលេខ០០២ និងបទបញ្ជាលេខ០០១របស់រាជរដ្ឋាភិបាលពាក់ព័ន្ធ នឹងជនអន្តោប្រវេសន៍ខុសច្បាប់ក្នុងវិធានការណ៍ជាបឋមដោយធ្វើការចាប់បញ្ជូននូវជនអន្តោប្រវេសន៍ខុសច្បាប់ទៅប្រទេសដើមវិញ និងវិធានការណ៍មួយចំនួនក្នុងទិសដៅពង្រឹងសកម្មភាពត្រួតពិនិត្យតាមតំបន់ព្រំដែនដើម្បីរក្សាសន្តិសុខ សណ្តាប់សាធារណៈ នៃប្រទេសទាំង២ ព្រះរាជាណាចក្រកម្ពុជា និងសាធារណៈរដ្ឋសង្គមនិយមវៀតណាម។
កិច្ចប្រជុំក៏បានពិភាក្សាឯកភាពគ្នារៀបចំកិច្ចប្រជុំទ្វេរភាគីលើកទី០១ ឆ្នាំ២០១៥ នៅខែឧសភា ឆ្នាំ២០១៥នៅសាលាដំបូងខេត្តរតនគិរី នៃព្រះរាជាណាចក្រកម្ពុជា។ ចំពោះពេលវេលា និងខ្លឹមសារនៃកិច្ចប្រជុំនឹងជូនដំណឹងមុនក្នុងរយៈពេល១ខែ ដោយកំណត់យកការផ្លាស់ប្តូរយោបល់គ្នាទៅវិញទៅមកនិងស្វែងយល់អំពី “ច្បាប់ព្រហ្មទណ្ឌនិងការកំណត់ទោស(បទល្មើសប្រព្រឹត្តដោយអនីតិជន, បទល្មើសជួញដូរគ្រឿងញៀន) កិច្ចប្រជុំឆ្នាំ២០១៤ សំរាប់លើកទិសដៅប្រជុំឆ្នាំ២០១៥”នៃប្រទេសទាំងពីរ។
កិច្ចប្រជុំបានប្រព្រឹត្តទៅក្នុងបរិយាកាសដ៏ស្និទ្ធិស្នាល រីករាយ សាមគ្គីភាព និងមិត្តភាពដ៏ប្រពៃ។គណៈប្រតិភូទាំងពីរបានសន្យាបន្តកិច្ចសហប្រតិបត្តិការលើវិស័យតុលាការរវាងខេត្តទាំង២ សាលាដំបូងខេត្តរតនគិរី និងតុលាការប្រជាជនខេត្តយ៉ាឡាយឲ្យកាន់តែរឹងមាំ និងល្អប្រសើរជាងមុន។ ពង្រឹងចំណងសាមគ្គីភាពមិត្តភាពដែលមានតាំងពីយូរណាស់មកហើយ រវាងថ្នាក់ដឹកនាំក៏ដូចជាប្រជាជនខេត្តទាំងពីរ(ខេត្តយ៉ាឡាយ និងខេត្តរតនគិរី) ដែលជាកត្តាយ៉ាងសំខាន់មួយក្នុងការរក្សាស្ថេរភាពជំរុញកិច្ចអភិវឌ្ឍន៍របស់ខេត្តនីមួយៗ។
ហើយបានអនុម័តក្នុងកិច្ចប្រជុំ បានធ្វើឡើងជាបួនច្បាប់ជាភាសាវៀតណាមចំនួន២ច្បាប់ និងជាភាសាខ្មែរចំនួន២ច្បាប់ ដោយភាគីម្ខាងរក្សាទុកចំនួន២ច្បាប់(ភាសាខ្មែរ និងវៀតណាម)៕
